ગીરસોમનાથ / સૌરાષ્ટ્રના ખેડૂતોમાં હાહાકાર.! અચાનક કપાસનો પાક ઉભે ઉભો સુકાઈ જવા લાગ્યો, પ્રતિ વિઘા 18 થી 19 હજારનું નુકસાન, જાણો થયું શું?

• ગીરસોમનાથમાં કપાસના પાકને વ્યાપક નુકસાન
• સુકારા નામના રોગે કપાસ ખેડૂતોને રડાવ્યા
• પાક ફુટવાની તૈયારીએ સુકારા રોગનો હુમલો
• ખેડૂતોને પ્રતિ વિઘા 18થી 19 હજારનું નુકસાન

ગીર સોમનાથામાં કપાસની ખેતી કરતા ખેડૂતો રોગચાળાને લઇ મુશ્કેલીમાં મુકાયા છે. ગીર સોમનાથ સહિત રાજ્યના અનેક જિલ્લઓમાં કપાસમાં આવેલા સુકારા નામના રોગને કારણે ખેડૂતોની મુશ્કેલીમાં વધારો થયો છે. ગીર સોમનાથના ઉના અને ગીર ગઢડા તાલુકામાં મોટા પ્રમાણમાં કપાસનું વાવેતર થાય છે. આ વર્ષે ખેડૂતોએ 18 હજાર હેક્ટરની આસપાસ કપાસનું વાવેતર કર્યું હતું. જો કે સુકારાના રોગને કારણે ગીર વિસ્તારના ખેડૂતોનો કપાસનો પાક સુકાઇ ગયો છે. 

કપાસનું ઉત્પાદન ખુબ જ ઓછું થાય તેવી શક્યતા
સુકારાના રોગને કારણે ખેડૂતોને પ્રતિ વિઘા 18થી 19 હજારનું નુકસાન થયું છે. બીજી બાજુ આ રોગને લઇ કૃષિ વિજ્ઞાન કેન્દ્રનું કહેવું છે કે વહેલી પાકતી જાતોમાં આ સમસ્યા જોવા મળી રહી છે. ત્યારે આગોતરું વાવેતર થવાથી મોટાભાગના કપાસના ખેડૂતોને નુકસાન થઇ રહ્યું છે. અગાઉ ગીર સોમનાથમાં મોટા પ્રમાણમાં કપાસનું વાવેતર થતું હતું.જો કે ગુલાબી ઇયળ સહિતના રોગોને કારણે કપાસનું વાવેતર ઘટ્યું છે. તેવામાં સુકારાના રોગને કારણે ખેડૂતોને વ્યાપક નુકસાન સાથે જિલ્લામાં કપાસનું ઉત્પાદન ખુબ જ ઓછું થાય તેવી શક્યતા છે.

ખેડૂતોએ શું કહ્યું ?
ખેડૂતો જણાવી રહ્યાં છે કે, કપાસના પાક પાછળ ઘણી મહેનત કરી તેમજ રૂપિયા ખર્ચી પાક તૈયાર કર્યો છે. હવે જ્યારે આ પાકમાંથી પૈસા ઉભા કરવાના સમયમાં આ રોગ આવી જતા અમારી મહેનત અને પૈસા પર આ રોગ ફરી વળ્યો છે. જો કે હાલ આ રોગથી અમે ખેડૂતો મુઝવણમાં મુકાયા છીએ