- ધો. 10 તેમજ સામાન્ય પ્રવાહના વિદ્યાર્થીઓ જોઈ રહ્યા છે આતુરતાથી રીઝલ્ટની રાહ
- મે નાં બીજા સપ્તાહમાં ધો. 10 નું રીઝલ્ટ જાહેર કરવામાં આવે તેવી શક્યતા
- ધો. 10 નાં પરિણામની તારીખ હજુ જાહેર કરવામાં આવી નથી
ઉલ્લેખનીય છે કે બીજી મેના રોજ ધોરણ-૧૨ સાયન્સનું રિઝલ્ટ જાહેર થયું હતું ત્યાર બાદ હવે ૧૨ કોમર્સ-આર્ટ્સ ઉપરાંત ધોરણ-૧૦ની બોર્ડની પરીક્ષા આપનારા વિદ્યાર્થીઓ પણ પોતાનાં રિઝલ્ટની આતુરતાથી રાહ જોઈ રહ્યા છે. ગત વર્ષના ટ્રેન્ડ અનુસાર શિક્ષણ બોર્ડ દ્વારા મેનાં બીજા સપ્તાહમાં ધોરણ-૧૦ની બોર્ડની પરીક્ષાનું પરિણામ જાહેર કરવામાં આવે તેવી ધારણા છે. આમ મે માસનું બીજું સપ્તાહ પરિણામ સ્પેશિયલ બની રહે તેવી શક્યતા છે. આ વર્ષે તમામ પરિણામો ગત વર્ષની તુલનાએ વહેલાં જાહેર થઇ શકે છે ધોરણ- ૧૨ સામાન્ય પ્રવાહનું પરિણામ પણ બીજા સપ્તાહમાં જાહેર થઇ શકે છે.
ધોરણ- ૧૦ની પરીક્ષા ૨૦૨૩ માર્ચ ૧૪થી ૨૮ દરમિયાન લેવામાં આવી હતી
ગુજરાત માધ્યમિક અને ઉચ્ચતર માધ્યમિક શિક્ષણ બોર્ડની સત્તાવાર વેબસાઇટ gseb.org પર ગુજરાત બોર્ડ ધો-૧૦નું પરિણામ જાહેર કરશે. પરીક્ષા માટે હાજર થયેલા ઉમેદવારોએ માર્કશીટને એક્સેસ કરવા માટે તેમનો રોલ નંબર દાખલ કરવો જરૂરી રહેશે. ગુજરાત બોર્ડ દ્વારા ધોરણ- ૧૦માંનું પરિણામ ૨૦૨૩ની તારીખ, સમય જાહેર કરાયાં નથી પરંતુ માહિતી અનુસાર પરિણામ આવતા અઠવાડિયે જાહેર કરવામાં આવે તેવી શક્યતા છે. બોર્ડની ધોરણ- ૧૦ની પરીક્ષા ૨૦૨૩ માર્ચ ૧૪થી ૨૮ દરમિયાન લેવામાં આવી હતી. આ પરીક્ષામાં પાસ થવા માટે વિદ્યાર્થીએ દરેક વિષયમાં ઓછામાં ઓછા ૩૩ માર્ક્સ મેળવવા જરૂરી છે. આ વર્ષે કુલ ૯.૫૬ લાખ વિદ્યાર્થી ધોરણ-૧૦ની પરીક્ષા માટે રજિસ્ટર્ડ થયા છે . આ માટે રાજ્યના ૩૩ જિલ્લામાં ૯૫૮ પરીક્ષા કેન્દ્ર ઊભાં કરવામાં આવ્યાં હતાં. ગત વર્ષે ધોરણ-૧૦નું કુલ સરેરાશ પરિણામ ૬૫.૧૮ ટકા આવ્યું હતું.
સીબીએસઈ બોર્ડ પણ ટૂંક સમયમાં પરિણામ જાહેર કરી શકે છે
આ વર્ષે સીબીએસઈ બોર્ડ પણ ટૂંક સમયમાં પરિણામ જાહેર કરી શકે છે અંદાજે ૩૮ લાખ વિદ્યાર્થીએ પરીક્ષા આપી હતી. પરિણામો બોર્ડની ઓફિશિયલ વેબસાઇટ cbse.gov.in અને cbseresults.nic.in પર જાહેર કરવામાં આવશે. ઉપરાંત વિદ્યાર્થીઓ ડિજિલોકર, એસએમએસથી અને ઉમંગ એપ પર પણ તેમનું પરિણામ જોઈ શકે છે.
CBSEના વિદ્યાર્થીને રાહત
સેન્ટ્રલ બોર્ડ ઓફ સેકન્ડરી એજ્યુકેશન (CBSE)એ નવા સત્રમાં અનેક ફેરફારો કર્યા છે. તે મુજબ હવે હવે પ્રેક્ટિકલ પરીક્ષામાં નાપાસ થનારા વિદ્યાર્થીએ થિયરી પરીક્ષા નહીં આપવી પડે. તેમણે માત્ર પ્રેક્ટિકલ પરીક્ષા જ આપવાની રહેશે. ગત વર્ષ સુધી જે વિદ્યાર્થી પ્રેક્ટિકલમાં નાપાસ થતા હતા તેમણે પ્રેક્ટિકલ અને થિયરી બંને પરીક્ષા આપવી પડતી હતી. જેમાં હવે ફેરફાર કરવામાં આવ્યો છે. પ્રેક્ટિકલ પરીક્ષા પણ શાળા કક્ષાએ જ લેવામાં આવશે. બીજી તરફ શૈક્ષણિક વર્ષ૨૦૨૩-૨૪ થી CBSE બોર્ડના વિદ્યાર્થી માટે હવે કમ્પાર્ટમેન્ટ પરીક્ષાઓ લેવામાં નહીં આવે. તેના બદલે બોર્ડ પૂરક પરીક્ષાઓનું આયોજન કરશે. કમ્પાર્ટમેન્ટ અને ઈમ્પ્રૂવમેન્ટ પરીક્ષાનું નામ બદલીને પૂરક પરીક્ષા કરવામાં આવ્યું છે.
