IPL 2026 / સાઈ સુદર્શને રચ્યો ઇતિહાસ, સૌથી ઝડપી 3000 T20 રન સાથે KKR સામે ચમક્યો

Sai Sudharsan એ IPL 2026માં ફરી એકવાર પોતાની શાનદાર બેટિંગથી ક્રિકેટ ચાહકોનું દિલ જીતી લીધું છે. 16 મે, શનિવારે Gujarat Titans અને Kolkata Knight Riders વચ્ચે રમાયેલી હાઈસ્કોરિંગ મેચમાં સાઈ સુદર્શને માત્ર 28 બોલમાં અણનમ 53 રનની ઇનિંગ રમી હતી. તેની ઇનિંગમાં 6 ચોગ્ગા અને 3 છગ્ગાનો સમાવેશ થતો હતો. મેચ દરમિયાન એક સમયે તે ઇજાગ્રસ્ત થતા 23 રન પર મેદાન બહાર ગયો હતો, પરંતુ પછી ફરી બેટિંગ કરવા આવ્યો અને ટીમ માટે મહત્વપૂર્ણ અડધી સદી ફટકારી.

સાઇ સુદર્શનનો ઇતિહાસ

ઈડન ગાર્ડન્સ ખાતે રમાયેલી આ મેચ દરમિયાન સુદર્શને એક મોટું સિમાચિહ્ન પણ હાંસલ કર્યું. તેણે T20 ક્રિકેટમાં પોતાના 3000 રન પૂર્ણ કર્યા અને સૌથી ઓછી ઇનિંગમાં આ સિદ્ધિ મેળવનાર બેટ્સમેન બન્યો. સુદર્શને માત્ર 78 ઇનિંગમાં 3000 T20 રન પૂર્ણ કર્યા. આ પહેલા આ રેકોર્ડ ઓસ્ટ્રેલિયાના Shaun Marsh ના નામે હતો, જેમણે 85 ઇનિંગમાં આ સિદ્ધિ મેળવી હતી. આ યાદીમાં D'Arcy Short, Devon Conway અને Chris Gayle જેવા મોટા નામો પણ સામેલ છે.

સિઝન ખૂબ જ જોરદાર

સાઈ સુદર્શન માટે આ સિઝન ખૂબ જ જોરદાર રહી છે. તેણે સતત ચાર મેચમાં 50થી વધુ સ્કોર બનાવ્યો છે, જે ગુજરાત ટાઇટન્સ માટે એક નવો રેકોર્ડ છે. તેણે ટીમના પૂર્વ કેપ્ટન Hardik Pandya અને વર્તમાન કેપ્ટન Shubman Gill ના સતત ત્રણ 50+ સ્કોરના રેકોર્ડને પાછળ છોડી દીધો છે. આ IPL સીઝનમાં સુદર્શને અત્યાર સુધી સાત વખત 50થી વધુનો સ્કોર બનાવ્યો છે, જે ટીમ માટે સૌથી વધુ સ્કોરના રેકોર્ડની બરાબરી કરે છે.

આ પણ વાંચો : ઈડન ગાર્ડન્સમાં KKR નો ધમાકો: હાઈ-સ્કોરિંગ મેચમાં ગુજરાત ટાઇટન્સને 29 રનથી હરાવ્યું

છેલ્લા 7 સ્કોર

સાઈ સુદર્શનના છેલ્લા સાત સ્કોર પર નજર કરીએ તો તેની સતતતા સ્પષ્ટ જોવા મળે છે. તેણે 100, 87, 6, 57, 55, 61 અને હવે 53* રન બનાવ્યા છે. આ પ્રદર્શનથી તે હાલમાં IPL 2026ના સૌથી વિશ્વસનીય બેટ્સમેન તરીકે ઉભરી રહ્યો છે. મેચની વાત કરીએ તો Shubman Gill એ 85 રન અને Jos Buttler એ 57 રનની મહત્વપૂર્ણ ઇનિંગ રમી હતી. ગુજરાત ટાઇટન્સ માટે આ બીજી એવી મેચ હતી જેમાં ટીમના ત્રણ બેટ્સમેનોએ 50થી વધુનો સ્કોર બનાવ્યો હતો. બીજી તરફ KKR માટે Finn Allen એ 93 રન, Angkrish Raghuvanshi એ અણનમ 82 રન અને Cameron Green એ અણનમ 52 રનની ઇનિંગ રમી હતી. મેચમાં કોલકાતા નાઈટ રાઈડર્સે પહેલા બેટિંગ કરીને 2 વિકેટે 247 રનનો વિશાળ સ્કોર ઉભો કર્યો હતો. જવાબમાં ગુજરાત ટાઇટન્સ 4 વિકેટે 218 રન સુધી જ પહોંચી શક્યું અને તેમને 29 રનથી હારનો સામનો કરવો પડ્યો. IPL 2026માં અત્યાર સુધીમાં 52 વખત 200થી વધુનો સ્કોર નોંધાયો છે, જે લીગના ઇતિહાસમાં સૌથી વધુ છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ