સ્પોર્ટ્સ / 10 છગ્ગા અને 20 ચોગ્ગા સાથે 239 રન ઠોક્યા, નિવૃત્તિ પાછી ખેંચી આવેલા ખેલાડીની તોફાની બેટિંગ

એવું કહેવાય છે કે ખેલાડી રમત છોડી શકે છે, પણ રમવાનું ક્યારેય ભૂલતો નથી. આ વાત સાબિત કરી છે દક્ષિણ આફ્રિકાના સ્ટાર ખેલાડી ક્વિન્ટન ડી કોકે. નિવૃત્તિ લીધા પછી બે વર્ષ બાદ જ્યારે તે પાકિસ્તાન સામેની ODI શ્રેણીમાં વાપસી કરવા આવ્યો, ત્યારે બધાને આશ્ચર્યમાં મૂકી દીધા. જાણે ક્યારેય ક્રિકેટથી દૂર રહ્યો જ ન હોય તેમ તેણે ધમાકેદાર રમત દેખાડી.

દક્ષિણ આફ્રિકાના વિકેટકીપર-બેટ્સમેન ક્વિન્ટન ડી કોકે પાકિસ્તાન પ્રવાસ દરમિયાન રમાયેલી ત્રણ મેચની ODI શ્રેણીમાં કુલ 239 રન બનાવ્યા. તેણે 30 ચોગ્ગા અને છગ્ગાની મદદથી આ રન બનાવ્યા હતા — જેમાં 20 ચોગ્ગા અને 10 છગ્ગાનો સમાવેશ થાય છે. તેની બેટિંગ જોઈને ક્રિકેટપ્રેમીઓમાં ઉત્સાહ છવાઈ ગયો હતો.

આખી શ્રેણીનું મુખ્ય આકર્ષણ

જોકે દક્ષિણ આફ્રિકા ટીમને શ્રેણીમાં 1-2 થી હાર મળી, પરંતુ ડી કોકનો પ્રદર્શન આખી શ્રેણીનું મુખ્ય આકર્ષણ રહ્યું. ત્રણ ODI માં તેણે 119.50 ની સરેરાશથી રન બનાવ્યા અને તેમાં એક સદી અને બે અડધી સદીનો સમાવેશ કર્યો. આ પ્રદર્શન માટે તેને પ્લેયર ઓફ ધ સિરીઝ જાહેર કરવામાં આવ્યો. પરંતુ અહીં જ વાત પૂરી થતી નથી. ડી કોકે આ સિદ્ધિ સાથે એક મોટો વર્લ્ડ રેકોર્ડ પણ બનાવી નાખ્યો — જે અત્યાર સુધી માત્ર એમ.એસ. ધોનીના નામે હતો.

પ્લેયર ઓફ ધ સિરીઝ

ધોનીએ વનડે ક્રિકેટમાં અત્યાર સુધી સાત વખત પ્લેયર ઓફ ધ સિરીઝ એવોર્ડ જીત્યો છે, અને હવે ક્વિન્ટન ડી કોકે પણ સાત વખત આ એવોર્ડ જીતવાની બરાબરી કરી છે. રસપ્રદ વાત એ છે કે ધોનીએ આ સિદ્ધિ 350 મેચમાં હાંસલ કરી હતી, જ્યારે ડી કોકે ફક્ત 159 મેચમાં આ રેકોર્ડ સર કર્યો છે.

આ પણ વાંચો : આક્રમક બોલિંગથી બેટિંગ ઓર્ડર તહેસ નહેસ કરી નાખ્યો, 8 ખેલાડી મળીને 20 રન જ બનાવી શક્યા

નિવૃત્તિ પછી આવી વાપસી બહુ ઓછા ખેલાડીઓ કરે છે, પણ ડી કોકે બતાવી દીધું કે પ્રતિભા અને જુસ્સો હજી પણ જીવંત છે. ક્રિકેટપ્રેમીઓ માટે તે ખરેખર એક પ્રેરણાત્મક વાપસી રહી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ