સ્પોર્ટ્સ / કિંગ કોહલીની 'વિરાટ' છલાંગ, મેચ રમ્યા વિના જ ICC રેન્કિંગના ટોપ 5માં સામેલ

ક્રિકેટ પ્રેમીઓ માટે એક રસપ્રદ સમાચાર આવ્યા છે. ઘણા દિવસોથી ODI ન રમ્યા છતાં વિરાટ કોહલી અચાનક ટોચના પાંચ બેટ્સમેનોમાં પાછો આવી ગયો છે. શું રમ્યા વિના પણ રેન્કિંગમાં સુધારો શક્ય છે? હા, શક્ય છે! કારણ છે બાબર આઝમનું નિષ્ફળ પ્રદર્શન, જેનાથી રેન્કિંગમાં મોટો ફેરફાર જોવા મળ્યો છે.

ICC ODI રેન્કિંગમાં ભારતનો બોલબાલો

ICCએ તાજેતરની વનડે રેન્કિંગ જાહેર કરી છે જેમાં ભારતીય કેપ્ટન રોહિત શર્મા ફરી એકવાર ટોચ પર છવાયો છે. રોહિત 781 રેટિંગ પોઈન્ટ સાથે નંબર વન વનડે બેટ્સમેન બન્યો છે. ઓસ્ટ્રેલિયા સામેની શ્રેણીમાં રોહિતે બીજા વનડેમાં 73 અને ત્રીજા વનડેમાં અણનમ 121 રનની શાનદાર ઇનિંગ રમી હતી. આ પ્રદર્શનને કારણે તે સતત બીજા અઠવાડિયે ટોચ પર ટક્યો છે.

યુવા કેપ્ટન શુભમન ગિલ 745 રેટિંગ પોઈન્ટ

યાદીમાં ટોચના ચાર બેટ્સમેનોમાં કોઈ ફેરફાર નથી થયો. ભારતીય યુવા કેપ્ટન શુભમન ગિલ 745 રેટિંગ પોઈન્ટ સાથે ચોથા સ્થાને છે. બીજા સ્થાને અફઘાનિસ્તાનનો ઇબ્રાહિમ ઝદરાન (764) અને ત્રીજા સ્થાને ન્યૂઝીલેન્ડનો ડેરિલ મિશેલ (746) છે.

વિરાટ કોહલીને રમ્યા વિના ફાયદો થયો

ભલે વિરાટે છેલ્લા અઠવાડિયામાં એક પણ ODI રમી નથી, છતાં બાબર આઝમના ખરાબ પ્રદર્શનથી તેને ફાયદો થયો છે. ઓસ્ટ્રેલિયા સામેની અગાઉની શ્રેણીમાં કોહલી પ્રથમ બે વનડેમાં શૂન્ય રન પર આઉટ થયો હતો, પરંતુ ત્રીજી મેચમાં તેણે 74 રનની શાનદાર ઇનિંગ રમી હતી. બાબર આઝમ, જેણે ગયા અઠવાડિયે ત્રણ વનડે રમી હતી, દક્ષિણ આફ્રિકા સામે ફક્ત 11 અને 27 રન બનાવી શક્યો હતો અને શ્રીલંકા સામે ફક્ત 29 રન જ કરી શક્યો હતો. પરિણામે બાબર 5મા સ્થાનેથી 7મા સ્થાને સરકી ગયો, જ્યારે કોહલી એક સ્થાન આગળ વધીને ટોચના પાંચમાં પહોંચી ગયો.

ICC ODI રેન્કિંગમાં ટોચના 10 બેટ્સમેન

• રોહિત શર્મા (ભારત) – 781
• ઇબ્રાહિમ ઝદરાન (અફઘાનિસ્તાન) – 764
• ડેરિલ મિશેલ (ન્યુઝીલેન્ડ) – 746
• શુભમન ગિલ (ભારત) – 745
• વિરાટ કોહલી (ભારત) – 725
• ચરિથ અસલંકા (શ્રીલંકા) – 710
• બાબર આઝમ (પાકિસ્તાન) – 709
• હેરી ટેક્ટર (આયર્લેન્ડ) – 708
• શ્રેયસ ઐયર (ભારત) – 700
• શાઈ હોપ (વેસ્ટ ઈન્ડિઝ) – 690

આ પણ વાંચો : રવિન્દ્ર જાડેજા બનશે રાજસ્થાન રોયલ્સનો કેપ્ટન! સામે આવ્યાં મોટા સમાચાર, ક્રિકેટમાં કોહરામ

T20 રેન્કિંગમાં પણ ફેરફાર

ICC T20 બેટિંગ રેન્કિંગમાં અભિષેક શર્માએ પોતાનું ટોચનું સ્થાન જાળવી રાખ્યું છે. તિલક વર્મા બે સ્થાન નીચે ઉતરી ત્રીજા સ્થાનથી પાંચમા સ્થાને પહોંચ્યો છે, જ્યારે હાર્દિક પંડ્યા T20 ઓલરાઉન્ડર રેન્કિંગમાં ચોથાથી પાંચમા સ્થાને આવી ગયો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ