VIRAL / 'આવું ન કરો..' જબરા ફેનની દિવાનગી જોઈ કેએલ રાહુલ થયો ઈમોશનલ, વાયરલ પોસ્ટ પર કરી વિનંતી

સોશિયલ મીડિયા પર છેલ્લા થોડા દિવસોમાં એક વીડિયો ખૂબ વાયરલ થયો છે. આ વીડિયો એક એવા ચાહકનો છે જે પોતાના દીક્ષાંત સમારંભ (Graduation Ceremony) દરમિયાન કેએલ રાહુલ માટેનો પ્રેમ અનોખી રીતે વ્યક્ત કરે છે. આ યુવાન પોતાની ડિગ્રી મેળવવા માટે મંચ પર જાય છે, પરંતુ પહેલા તે પોતાના કેએલ રાહુલની જર્સી પ્રેક્ષકોને બતાવે છે. પછી તે સ્ટેજ પર હાજર ફેકલ્ટી સભ્યોના પગ સ્પર્શ કરે છે અને પછી પોતાની ડિગ્રી સ્વીકારે છે. આ પૂરી ઘટના તેના ઇન્સ્ટાગ્રામ પર શેર કર્યા પછી વાયરલ થઈ ગઈ છે.

આ વીડિયો જોતા જ KLરાહુલ પોતે પણ ભાવુક થઈ ગયા. એક ઇન્ટરવ્યુ દરમિયાન તેમણે આ ઘટનાને લઈ પ્રતિભાવ આપ્યો. રાહુલે કહ્યું –“મેં આ વીડિયો જોયો છે. મને લાગે છે કે આ યુવકે પહેલા પણ આવું કંઈક કર્યું છે. પણ હું ફક્ત એટલું કહેવા માંગુ છું કે, આવું ન કરો. આ ક્ષણ તમારી છે. તમે ગ્રેજ્યુએટ થઈ રહ્યા છો, જે તમારી મહેનતનું ફળ છે. આ ખાસ ક્ષણ કોઈને ન આપો. મેં તમને ગ્રેજ્યુએટ થવામાં મદદ કરી નથી.”

આ સંદેશે અનેક લોકોને સ્પર્શી લીધા. રાહુલનો આ જવાબ બતાવે છે કે તેઓ માત્ર ક્રિકેટ મેદાનમાં જ નહીં, પણ વિચારોમાં પણ સંતુલિત અને સંવેદનશીલ છે. ચાહકોને તેમના પ્રત્યેનો પ્રેમ માન્ય છે, પરંતુ રાહુલના આ શબ્દોએ બતાવ્યું કે પોતાના જીવનની સિદ્ધિઓ પોતે માણવી પણ એટલી જ મહત્વની છે.

તે જ ઇન્ટરવ્યુમાં રાહુલે પોતાની ફિટનેસ વિશે પણ વાત કરી. તેમણે જણાવ્યું કે તેઓ વિશ્વવિખ્યાત ફૂટબોલર ડેવિડ બેકહામ પાસેથી ફિટનેસની પ્રેરણા લે છે. રાહુલે કહ્યું –“હું હંમેશા ફિટ રહેવા માંગતો હતો, માત્ર દૃષ્ટિથી જ નહીં, પણ આંતરિક રીતે પણ મજબૂત. ઘણા ક્રિકેટરો ફિટ હોય છે, પરંતુ હું ડેવિડ બેકહામ જેવો શારીરિક અને દૃષ્ટિ બંને રીતે ફિટ રહેવા માંગું છું.”

આ પણ વાંચો : IND vs AUS 1st T20: બદલાઈ ગયો ટીમ ઈન્ડિયા-ઓસ્ટ્રેલિયા મેચનો સમય, ચૂકી ન જતાં અહીં ફ્રીમાં જુઓ

કેએલ રાહુલના આ નિવેદન પછી ચાહકો ફરી એકવાર તેમની પ્રશંસા કરી રહ્યા છે. એક તરફ જ્યાં ચાહકનો જુસ્સો વાયરલ થયો છે, ત્યાં રાહુલની શાંતિપૂર્ણ અને પ્રેરણાદાયક પ્રતિક્રિયાએ સૌના દિલ જીતી લીધા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ