સ્પોર્ટ્સ / ગોલ્ડ, 1 સિલ્વર, 4 બ્રોન્ઝ..., આ છે ભારતને હોકીના શિખર સુધી પહોંચાડનારા 5 યોદ્ધા

100 years of Indian Hockey : ભારતમાં હોકીના 100 વર્ષ પૂર્ણ થતાં દેશભરમાં ઉજવણીનો માહોલ છે. રમતગમત મંત્રાલયે પણ રાષ્ટ્રીય રમતની ઉજવણી માટે વિસ્તૃત તૈયારીઓ કરી છે. રમતગમત મંત્રી મનસુખ માંડવિયાએ સોમવારે જણાવ્યું હતું કે ભારત 7 નવેમ્બરે રાષ્ટ્રવ્યાપી ઉજવણી સાથે તેના હોકી વારસાના 100 વર્ષ ઉજવશે. આમાં નવી દિલ્હીના મેજર ધ્યાનચંદ નેશનલ સ્ટેડિયમ ખાતે એક કાર્યક્રમ અને 550 થી વધુ જિલ્લાઓમાં એક સાથે કાર્યક્રમોનો સમાવેશ થશે. હોકી ઇન્ડિયાના સહયોગથી આયોજિત શતાબ્દી ઉજવણી રમતના ઇતિહાસની ઉજવણી કરશે અને દેશના આઠ ઓલિમ્પિક સુવર્ણ ચંદ્રકો અને 13 પોડિયમ ફિનિશમાં યોગદાન આપનારા ખેલાડીઓનું સન્માન કરશે.

વિશ્વ હોકીમાં ભારતનું પ્રભુત્વ

1928થી 1956 સુધી ભારત હોકીના વિશ્વમાં અપ્રતિહત શક્તિ હતું-સતત છ ઓલિમ્પિક ગોલ્ડ મેડલ જીતવાનો અદભૂત રેકોર્ડ બનાવ્યો. બાદમાં 1964 અને 1980માં પણ ગોલ્ડ જીત્યો. 1975માં કુઆલાલંપુરમાં ભારતે પોતાની એકમાત્ર હોકી વર્લ્ડ કપ ટાઇટલ જીત્યું. નવાં યુગમાં પણ ભારતે ટોક્યો 2020 અને પેરિસ 2024 ઓલિમ્પિકમાં મેડલ જીત્યા અને 2023ની એશિયન ગેમ્સમાં ગોલ્ડ સાથે વૈશ્વિક મંચ પર ફરી પોતાની દમદાર હાજરી નોંધાવી. અત્યાર સુધી ભારતે ઓલિમ્પિકમાં 8 ગોલ્ડ, 1 સિલ્વર અને 4 બ્રોન્ઝ મેડલ જીત્યા છે. મહિલા ટીમે પણ ઇતિહાસ રચ્યો અને 2002 કોમનવેલ્થ ગેમ્સમાં ગોલ્ડ જીત્યું અને 2020 ઓલિમ્પિકમાં ચોથું સ્થાન મેળવી દેશનું ગૌરવ વધાર્યું.

ભારતીય હોકીના પાંચ મહાન યોદ્ધાઓ

મેજર ધ્યાનચંદ-હોકીના જાદુગર

હોકી ઇતિહાસનું સૌથી તેજસ્વી નામ. 1928ના એમ્સ્ટરડેમ ઓલિમ્પિકમાં 14 ગોલ કરીને ગોલ્ડ જીતાવ્યો, અને બાદમાં 1932 લોસ એન્જલસ તથા 1936 બર્લિનમાં સતત ત્રણ ગોલ્ડ જીત્યા. તેમની જાદુઈ બોલ કંટ્રોલને કારણે દુનિયાભરમાં તેઓ “હોકીના વિઝાર્ડ” તરીકે જાણીતા થયા.

બલબીર સિંહ સિનિયર

1948ના લંડન ઓલિમ્પિકમાં ભારત માટે સુપરસ્ટાર તરીકે ઉભર્યા. 1952 હેલસિંકી ફાઇનલમાં એકલા પાંચ ગોલ કરવાનો તેમનો રેકોર્ડ આજે પણ અદ્દભૂત છે. 1975માં ભારતને વર્લ્ડ કપ અપાવનાર ટીમના મેનેજર તરીકે પણ તેમણે ઇતિહાસ રચ્યો. તેમને પદ્મશ્રી (1957)થી સન્માનિત કરવામાં આવ્યા હતા.

મોહમ્મદ શાહિદ

ઝફર ઇકબાલ સાથેની ભાગીદારીથી 1980 મોસ્કો ઓલિમ્પિકમાં ભારતને આઠમો ગોલ્ડ અપાવ્યો. તેમની ઝડપ, ડ્રિબ્લિંગ અને નાજુક બોલ હેન્ડલિંગ આજે પણ યુવા ખેલાડીઓ માટે પ્રેરણા છે.

ધનરાજ પિલ્લે

1989માં ડેબ્યૂ કરનાર ધનરાજ પિલ્લે 1990ના દાયકાના આંતરરાષ્ટ્રીય હોકીના સૌથી મોટા હુમલાખોરોમાંના એક હતા. તેમણે 1998ની એશિયન ગેમ્સમાં 32 વર્ષ બાદ ભારતને ગોલ્ડ અપાવ્યો અને 2003માં એશિયન કપ જીતાડ્યો. ચાર ઓલિમ્પિક, ચાર વર્લ્ડ કપ અને ચાર એશિયન ગેમ્સમાં રમનાર એકમાત્ર ભારતીય ખેલાડી. અર્જુન એવોર્ડ અને પદ્મશ્રીથી સન્માનિત.

પીઆર શ્રીજેશ

આધુનિક ભારતીય હોકીના સૌથી વિશ્વસનીય ગોલકીપર. 2011થી ટીમનો આધારસ્તંભ રહેલા શ્રીજેશે ટોક્યો 2020માં અદ્ભૂત પ્રદર્શન કરીને 41 વર્ષ બાદ ભારતને ઓલિમ્પિક બ્રોન્ઝ અપાવ્યો, જે વિજય આખા દેશ માટે ગૌરવનો પળ બની ગયો. 2024 ઓલિમ્પિકમાં પણ બ્રોન્ઝ જીત્યા પછી તેમણે ગૌરવપૂર્ણ નિવૃત્તિ લીધી.

આ પણ વાંચો : આજે ભારત-પાકિસ્તાન વચ્ચે ટક્કર, જાણો ક્યાં અને કેટલા વાગે રમાશે મેચ ? અહીં જોઈ શકાશે LIVE પ્રસારણ ?

હોકીના 100 વર્ષ ફક્ત એક રમતનો ઉત્સવ નથી તે દેશના ગૌરવ, સંઘર્ષ અને સંકલ્પનો ઉત્સવ છે. મેજર ધ્યાનચંદથી લઈને પીઆર શ્રીજેશ સુધી, ભારતીય હોકીના હીરોએ વિશ્વને બતાવ્યું છે કે સમર્પણ, દૃઢતા અને ટીમસ્પિરિટ સાથે કોઈપણ સપનું હકીકત બની શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ