ક્રિકેટ / કોમનવેલ્થ ગેમ્સમાં ડંકો વગાડનાર ભારતીય મહિલા ક્રિકેટર સ્મૃતિ મંધાનાએ મેળવી વધુ એક સિદ્ધિ, જાણો વિગત

• ICC ખેલાડી રેન્કિંગમાં ભારતીય મહિલા ક્રિકેટર સ્મૃતિ મંધાના ત્રીજા સ્થાને પહોંચી
• ન્યૂઝીલેન્ડની સોફી ડેવિનને પછાડીને મંધાનાએ મેળવ્યું ત્રીજું સ્થાન
• સ્મૃતિ મંધાનાએ કોમનવેલ્થ ગેમ્સમાં પાકિસ્તાન સામે 63 રન કર્યાં હતા

ભારતની સ્ટાર મહિલા ક્રિકેટર સ્મૃતિ મંધાનાના ગ્રહો દિવસે દિવસે ચમકી રહ્યાં છે. કોમનવેલ્થ ગેમ્સમાં પણ તેને તોફાની બેટિંગને કારણે ભારત પાકિસ્તાન સામે જીત મેળવી શક્યું હતું અને આ મેચને કારણે જ સ્મૃતિ મંધાનાનું ખેલાડી રેન્કિંગ સુધર્યું છે અને તે ત્રીજા સ્થાને પહોંચી ગઈ છે.

ICC રેન્કિંગમાં કારકિર્દીના સર્વશ્રેષ્ઠ ત્રીજા સ્થાને પહોંચી

સ્મૃતિ મંધાનાએ મંગળવારે જાહેર થયેલા આંતરરાષ્ટ્રીય ક્રિકેટ કાઉન્સીલના તાજેતરના રેન્કિંગમાં કારકિર્દીના સર્વશ્રેષ્ઠ ત્રીજા સ્થાને પહોંચી ગઈ છે. બર્મિંગહામમાં રમાયેલી કોમનવેલ્થ ગેમ્સમાં ઓસ્ટ્રેલિયા સામે શરુઆતની મેચમાં 24 રન ફટકારનારી મંધાનાએ પાકિસ્તાન સામે 42 બોલમાં 63 રનની અણનમ ઈનિંગ રમી હતી. 

ઓસ્ટ્રેલિયાની બેથ મૂનીને નામે 707 રેટિંગ પોઈન્ટ 
કોમનવેલ્થ ગેમ્સમાં પાકિસ્તાન સામેની રમત બાદ મંધાનાએ રેન્કિંગમાં ન્યૂઝીલેન્ડની સોફી ડેવિનને પાછળ છોડી દીધી હતી. તે બીજા સ્થાને રહેલી ઓસ્ટ્રેલિયાની બેથ મૂની કરતાં બે રેટિંગ પોઈન્ટ્સ પાછળ છે. મૂનીના નામે 707 રેટિંગ પોઇન્ટ છે જ્યારે તેના દેશની મેગ લેનિંગ 733 રેટિંગ પોઇન્ટ સાથે ટેબલમાં ટોચ પર છે. ડાબોડી બેટ્સમેન મંધાનાએ વન ડેમાં રેન્કિંગમાં ટોચ પર રહી ચૂકી છે અને તે ટી-20 રેન્કિંગમાં ત્રીજા સ્થાને પહોંચી ચૂકી છે. દરમિયાનમાં ન્યુઝીલેન્ડની સુઝી બેટ્સ બે સ્થાનના સુધારા સાથે છઠ્ઠા ક્રમે આવી ગઈ હતી. તેણે સાઉથ આફ્રિકા સામે 64 બોલમાં 91 રનની શાનદાર ઈનિંગ રમી હતી. ઓસ્ટ્રેલિયાની તહલિયા મેકગ્રાથ (એક સ્થાનના સુધારા સાથે 12મા ક્રમે), ભારતીય કેપ્ટન હરમનપ્રીત કૌર (ચાર સ્થાનના સુધારા સાથે 14મા ક્રમે), પાકિસ્તાનની નિદા ડાર (ત્રણ સ્થાનના સુધારા સાથે 40મા ક્રમે) અને સાઉથ આફ્રિકાની સી.ટ્રીઓન (પાંચ સ્થાનના સુધારા સાથે 47મા ક્રમે) પણ બેટ્સમેનોની યાદીમાં સુધારો કર્યો છે.