વજન ઘટાડવા માટે લોકો ઘણી જુદી-જુદી રીતો અપનાવતા હોય છે. કસરત કરવી, જીમ જવું, યોગા કરવા... ઘણા લોકોમાં ડાયેટિંગનો ઘણો ક્રેઝ છે, પરંતુ લોકોને ડાયેટિંગની ચોક્કસ જાણકારી હોતી નથી. ત્યારે જાણકારીના અભાવે ઘણી વખત લોકો ડાયટિંગના નામે ઘણી ફૂડ આઈટમ્સ લેવાનું બંધ કરી નાખે છે. ખાસ કરીને એવું જોવા મળે છે કે લોકો વજન ઘટાડવા માટે ડિનર કરવાનું બંધ કરી નાખે છે. જો કે ડિનર ન કરવાથી વજન ઓછું થાય કે ન થાય, પરંતુ તેનાથી તમે બીમાર ચોક્કસ થઈ શકો છો. શું તમે જાણો છો કે રાતે ખાવાનું ન ખાવાથી તમારા શરીર પર શું અસર થઈ શકે છે?
વજન ઘટાડવાની ઉતાવળમાં આવીને કારણે એવું જોવામાં આવ્યું છે કે લોકોમાં ડિનર ન કરવાનો ટ્રેન્ડ વધી રહ્યો છે. વજન ઘટાડવા માટે લોકો કોઈની પણ સલાહ પર આવું કરવાનું શરૂ કરી નાખે છે, પરંતુ આનાથી સ્વાસ્થ્ય ખરાબ થઈ શકે છે. જો તમે રાત્રિભોજન સતત છોડો છો તો જાણી લો કે તેની શું આડઅસર થઈ શકે છે.
વારંવાર પડી શકો છો બીમાર
દિવસના મુખ્ય ત્રણ ભોજન હોય છે, પહેલું ભોજન સવારનો નાસ્તો, બીજું ભોજન લંચ અને ત્રીજું ભોજન ડિનર. એટલે જો તમે આમાંથી કોઈ એક ભોજન પણ છોડી દો છો, તો શરીરમાં પોષક તત્વોની અછત થવા લઈ છે, જેને કારણે, રોગપ્રતિકારક શક્તિ ઓછી થવા લાગે છે, જેના કારણે તમે વારંવાર બીમાર પડી શકો છો. કેટલીકવાર પોષક તત્વોની અછત પણ ગંભીર સ્વાસ્થ્ય સમસ્યાઓનું કારણ બની શકે છે.
ઘટવાને બદલે વધી શકે છે વજન
રાત્રિભોજન છોડવાથી તમારી ઊંઘની પેટર્નમાં ખલેલ પડી શકે છે, જેના કારણે તમારા મૂડમાં ચીડિયાપણું અને ઉદાસી જેવા નકારાત્મક ફેરફારો થઈ શકે છે. આ સિવાય રાત્રે યોગ્ય ઊંઘ ન લેવાથી મેટાબોલિક રેટ ધીમો પડી શકે છે. રાત્રિભોજન છોડવાથી તમને લાગે છે કે તમારું વજન થોડા સમય માટે ઘટી ગયું છે, પરંતુ તેનાથી તમારું વજન ઝડપથી વધી શકે છે અને તમે ગંભીર રોગોનો ભોગ બની શકો છો.
વજન ઘટવાને બદલે થઈ શકે છે મસલ લોસ
જો તમે નિયમિત રીતે ખાવાનું સ્કિપ કરો છો, તો આનાથી તમારા સ્નાયુઓ નબળા થવા લાગે છે. જ્યારે તમે ખોરાક નથી ખાતા, ત્યારે તમારું શરીર ઊર્જા માટે સ્નાયુઓની પેશીઓનો ઉપયોગ કરે છે, જેના કારણે તમે વજન ઘટાડવાની જગ્યાએ મસલ લોસનો શિકાર બની શકો છો. આ સિવાય સતત ભોજન છોડવાથી તમારા શરીરમાં બ્લડ શુગર લેવલ વધવા કે ઘટવાનો ડર રહે છે.
વધુ વાંચો: દૂધ સાથે ભૂલથી પણ આ વસ્તુનું સેવન કરવું નહીં, શરીરને થશે ભારે નુકસાન
વજન ઘટાડવા શું કરવું યોગ્ય
વજન ઘટાડવા માટે માત્ર ડાયટિંગ કરવાથી કે માત્ર વર્કઆઉટ કરવાથી યોગ્ય પરિણામ મળતું નથી, પરંતુ આ બે વસ્તુઓનું પરફેક્ટ કોમ્બિનેશન વજન ઘટાડવામાં મદદ કરે છે, તેથી આ વિશે કોઈ નિષ્ણાત પાસેથી યોગ્ય માહિતી લેવી જોઈએ અને તે પછી ડાયટ શરૂ કરવું જોઈએ.
