- ભાજપમાં જવા મુદ્દે શંકરસિંહ વાઘેલાનું નિવેદન
- હું ભાજપમાં નથી જવાનોઃ શંકરસિંહ
- યોગ્ય સમયે હું જાહેરાત કરીશઃ શંકરસિંહ
ગુજરાત વિધાનસભા ચૂંટણી માથે ગાજી રહી છે ત્યારે આવી સ્થિતિ વચ્ચે રાજ્યના પૂર્વ મુખ્યમંત્રી શંકરસિંહ વાઘેલા ફરી રાજકારણમાં એક્ટિવ થયા છે. અગાઉ પણ શંકરસિંહ વાઘેલાએ કોંગ્રેસમાં જવાના એંઘાણ આપ્યા હતા. પરંતુ ત્યાર બાદ આ મુદ્દો શાંત પડી ગયો હતો. આ દરમિયાન એકવાર ફરી શંકરસિંહ બાપુની કોંગ્રેસમાં ભળી જવાની અટકળો તેજ થઇ છે.
ભાજપમાં જવા મુદ્દે શંકરસિંહ વાઘેલાનું મોટું નિવેદન
ત્યારે મહેસાણા ખાતે અર્જુન મોઢવાડિયા અને શંકરસિંહ વાઘેલા દ્વારા સાક્ષી હુંકાર મહાસંમેલન બોલાવવામાં આવ્યું હતું. આ સંમેલનમાં કોગ્રેસના નેતાઓની સાથે સ્ટેજ પર ગુજરાતના પૂર્વ મુખ્યમંત્રી શંકરસિંહ વાઘેલા પણ જોવા મળ્યા હતા. સ્ટેજ પર અર્જુન મોઢવાડિયા, શંકરસિંહ વાઘેલા સહિત સી. જે. ચાવડા, ચંદનજી ઠાકોર, રઘુભાઈ રબારી જોવા મળ્યાં હતા. આ દરમિયાન શંકરસિંહ વાઘેલાએ ભાજપમાં જોડાવા અંગે મોટું નિવેદન આપ્યું હતું.
મારી આ અંગે કોંગ્રેસના મિત્રો સાથે વાતચીત ચાલી રહી છેઃ વાઘેલા
પત્રકારો દ્વારા જ્યારે શંકરસિંહ વાઘેલાને કોંગ્રેસમાં ઘરવાપસી અંગે સવાલ પૂછવામાં આવ્યો ત્યારે તેમણે જણાવ્યું કે, 'થોડા દિવસ અગાઉ મેં અને અર્જુનભાઈએ એક પ્રેસ કોન્ફરન્સ ગોઠવી હતી, જેમાં મેં જણાવ્યું હતું કે મારી આ અંગે કોંગ્રેસના મિત્રો સાથે વાતચીત ચાલી રહી છે, ફોર્માલિટી પૂર્ણ થશે ત્યારે યોગ્ય સમયે આની પણ જાહેરાત થશે.'
હું ભાજપમાં નથી જવાનોઃ શંકરસિંહ
ભાજપમાં જોડાવાને લઈને શંકરસિંહ વાઘેલાએ જણાવ્યું કે, 'હું ભારતીય જનતા પાર્ટીમાં જવાનો નથી, એટલે તમે માનીને ચાલો કે બીજુ કંઈ નથી. યોગ્ય સમયે કોંગ્રેસ ઉપર જ નિર્ણય થશે. મારે કોંગ્રેસ પાસેથી કંઈ લેવાનું નથી પણ દેવાનું છે. એના માટે જે કંઈ કરવું પડે તેની મારી પૂરી તૈયારી છે.'
ગુજરાત સ્વમાનવાળુ રાજ્ય છેઃ શંકરસિંહ
ફ્રીના વાયદા પર શંકરસિંહે જણાવ્યું કે, 'ગુજરાત ભીખારી નથી, સ્વમાનવાળુ રાજ્ય છે. વીજળી-પાણી ભૂતકાળમાં મફત વગર જાહેરાતે આપેલા છે. આજની સરકાર કરોડોની જાહેરાત જ્યારે આપે છે, એના બદલે જે લોકો આંદોલન કરે છે, તેમને સગવડ આપોને.'
આપને જણાવી દઈએ કે, અગાઉ પણ શંકરસિંહ વાઘેલાએ કોંગ્રેસમાં જોડાવવાના સંકેતો આપ્યા હતા. તેમણે આ અંગે મહત્વનું નિવેદન આપતા કહ્યું હતું કે, 'હાલ મારી કોંગ્રેસના મિત્રો સાથે વાત ચાલી રહી છે.'
