- દૂધસાગર ડેરીમાં ગેરરીતિના કેસનો મામલો
- શંકરસિંહ વાઘેલા અને અર્જુન મોઢવાડીયાએ કોર્ટમાં આપી જુબાની
- પૂર્વ ગૃહમંત્રી વિપુલ ચૌધરીની હાઇકોર્ટમાં જામીન અરજી
વર્ષ- 2013માં મહારાષ્ટ્રમાં રૂ.22.50 કરોડના ખર્ચે સાગરદાણ મોકલવાનો દૂધસાગર ડેરીના તત્કાલીન ચેરમેન વિપુલ ચૌધરી સામે કેસ થયો હતો. જે કેસ ચાલી જતાં મહેસાણા દૂધસાગર ડેરીના તત્કાલિન ચેરમેન વિપુલ ચૌધરીના સાગરદાણ કૌભાંડમાં શંકરસિંહ વાઘેલા અને અર્જુન મોઢવાડિયા આજે મહેસાણા કોર્ટમાં હાજર થયા હતા. આ બન્ને નેતાઓને મહેસાણા કોર્ટે જુબાની આપવા સમન્સ મોકલ્યું હતું. આ સમન્સના પગલે આજે બન્ને નેતાઓ કોર્ટ સમક્ષ હાજર થયા હતા. ઉલ્લેખનીય છે કે, શંકરસિંહ વાઘેલાએ વિરોધ પક્ષના નેતા તરીકે અને અર્જુન મોઢવાડિયાએ કોંગ્રેસ પ્રદેશ અધ્યક્ષ તરીકે વિપુલ ચૌધરી માટે ભલામણ પત્ર લખ્યો હતો. જેમાં વિપુલ ચૌધરીને NDDBના ચેરમેન બનાવવા ભલામણ કરવામાં આવી હતી. વિપુલ ચૌધરીને બહોળો અનુભવ,સરકારી સિસ્ટમ અને લાયક હોવાના પગલે ભલામણ કરી હોવાની તેમણે કોર્ટ સમક્ષ જુબાની આપી હતી.
સમન્સના પગલે આજે બન્ને નેતાઓ કોર્ટ સમક્ષ હાજર થયા
આ દરમિયાન શંકરસિંહ વાઘેલાની કોર્ટમાં પુછપરછ કરાઇ હતી. જેમાં સરકારી વકિલના તમે વિપુલ ચૌધરીને ઓળખો છો ? પ્રશ્નના જવાબમાં શંકરસિંહ વાઘેલાએ જણાવ્યું હતું કે હું વિરોધ પક્ષનો નેતા હતો ત્યારથી એટલે કે 2013થી હું વિપુલ ચૌધરીને ઓળખું છું. વધુમાં વિપુલ ચૌધરીને એનડીડીબીના ચેરમેન બનાવવા પત્ર લખ્યો હતો ? તેવા વકીલના સવાલને લઇને હા, 20 જુલાઈ 2013ના રોજ મેં પત્ર લખ્યો હતો. પત્ર મેં જ લખ્યો છે અને તેમાં સહી પણ મારી છે. તેમ શંકરસિંહ વાઘેલાએ જણાવ્યું હતું.
વિપુલ ચૌધરીના વકિલને આપ્યા જવાબો
વિપુલ ચૌધરીના વકિલે ઉમેર્યું હતું કે વિપુલ ચૌધરી લાયક હતા એટલે તમે પત્ર લખ્યો હતો ? ત્યારે શંકરસિંહ વાઘેલાએ જણાવ્યું કે મેં સિસ્ટમના ભાગરૂપે પત્ર લખ્યો હતો ? અગાઉ પોલીસે આ બાબતે કોઈ નિવેદન માટે બોલાવ્યા હતા ? તેવા વિપુલ ચૌધરીના વકિલના જવાબમાં શંકરસિંહ વાઘેલાએ કહ્યું હતું કે ના, મને કોઈ પોલીસ અધિકારીએ આ બબાતે બોલાવ્યા નથી. પશુદાણ મહારાષ્ટ્રમાં મોકલ્યું તેની તમને કેવી રીતે જાણ થઈ ? તેમ વકીલે પ્રશ્ન કર્યો હતો ત્યારે શંકરસિંહ વાઘેલાએ જવાબ આપ્યો હતો કે મને છાપાના માધ્યમથી જાણ થઈ. એક પ્રથા છે, જ્યાં દુકાળ પડે ત્યાં મદદ કરવી.
સાક્ષી હુંકાર સંમેલનમાં રહ્યા હાજર
કોર્ટમાં હાજરી આપ્યા બાદ પૂર્વ મુખ્યમંત્રી શંકરસિંહ વાઘેલા અને કોંગ્રેસનેતા અર્જુન મોઢવાડિયાએ મહેસાણામાં અર્બદાભવનમાં `સાક્ષી હુંકાર' સંમેલનમાં હાજર રહ્યા હતા. જ્યાં આગેવાનોએ વિપુલ ચૌધરીની કાયદાકીય લડાઈમાં સહકાર આપવાનું આહવાન કર્યું હતું. ગુજરાતના પૂર્વ ગૃહમંત્રી અને દૂધસાગર ડેરીના પૂર્વ ચેરમેન વિપુલ ચૌધરી હાલ સાગરદાણ કૌભાંડમાં કસ્ટડીમાં છે. વિપુલ ચૌધરીએ અગાઉ સેશન્સ કોર્ટમાં જામીન અરજી કરી હતી જે ફગાવી દઇ કોર્ટે ઝટકો આપ્યા બાદ વિપુલ ચૌધરીએ જામીન માટે ગુજરાત હાઇકોર્ટમાં અપીલ કરી છે.
