- શાહરૂખ ખાનની ફિલ્મ જવાને બોક્સ ઓફિસ પર તોડ્યા રેકોર્ડ
- દુનિયાભરમાંથી 6 દિવસમાં 621.12 કરોડ રૂપિયાનો બિઝનેસ કર્યો
- શાહરૂખ ખાને આ ફિલ્મ દ્વારા ઘણા રેકોર્ડ પોતાના નામે કર્યા
જવાન, જવાન અને માત્ર જવાન.. હાલમાં આ ફિલ્મનું નામ દરેકના હોઠ પર છે. બોલિવૂડના બાદશાહ કહેવાતા શાહરૂખ ખાને આ ફિલ્મ દ્વારા સિનેમાના પડદાની સાથે સાથે બોક્સ ઓફિસ પર પણ ધૂમ મચાવી છે. 7 સપ્ટેમ્બરે રિલીઝ થયેલી આ ફિલ્મે ભારતમાં પહેલા દિવસે જ 75 કરોડ રૂપિયાની કમાણી કરી હતી. જ્યારે વિશ્વભરમાં આ આંકડો 100 કરોડને પાર કરી ગયો હતો. ફિલ્મ રિલીઝ થયાને 7 દિવસ થઈ ગયા છે અને કમાણી ચાલુ છે. ચાલો જાણીએ આ ફિલ્મ સાતમા દિવસે કેટલી કમાણી કરી શકે છે.
કુલ કલેક્શન 366 કરોડ રૂપિયા
છઠ્ઠા દિવસે આ ફિલ્મે તમામ ભાષાઓ સહિત ભારતમાં 26 કરોડ રૂપિયાની કમાણી કરી હતી. જે બાદ ફિલ્મનું ડોમેસ્ટિક બોક્સ ઓફિસ કલેક્શન 345.08 કરોડ થઈ ગયું છે. એક રિપોર્ટ અનુસાર અનુમાન લગાવવામાં આવી રહ્યું છે કે આ ફિલ્મ 7માં દિવસે લગભગ 21.50 કરોડ રૂપિયાની કમાણી કરી શકે છે. અનુમાન મુજબ જો જવાન 7માં દિવસે 21.50 કરોડ રૂપિયાનો બિઝનેસ કરે છે તો તેનું કુલ કલેક્શન 366 કરોડ રૂપિયા થઈ જશે. આ ફિલ્મ માત્ર આપણા દેશમાં જ નહીં વિદેશમાં પણ અજાયબીઓ કરી રહી છે. ઘરેલુ અને વિદેશી કલેક્શન સહિત રેડ ચિલીઝના જણાવ્યા અનુસાર, જવાને દુનિયાભરમાંથી 6 દિવસમાં 621.12 કરોડ રૂપિયાનો બિઝનેસ કર્યો છે.
નવા રેકોર્ડ કર્યા પોતાના નામે
શાહરૂખ ખાને આ ફિલ્મ દ્વારા ઘણા રેકોર્ડ પોતાના નામે કર્યા છે. તેની રિલીઝના માત્ર ચાર દિવસમાં આ ફિલ્મ વિશ્વભરમાં રૂ. 500 કરોડની ક્લબમાં સામેલ થઈ ગઈ અને સૌથી ઝડપથી રૂ. 500 કરોડની ક્લબમાં સામેલ થવાનો રેકોર્ડ જવાનના નામે જોડાઈ ગયો. આ સિવાય હિન્દીમાં જલદીથી 300 કરોડ રૂપિયાની ક્લબમાં સામેલ થવાનો રેકોર્ડ પણ શાહરૂખની ફિલ્મના નામે થઈ ગયો છે. આ ફિલ્મમાં શાહરૂખની સામે નયનતારા જોવા મળી રહી છે. દીપિકા પણ કેમિયો રોલમાં જોવા મળી છે.
