કાર્યવાહી / ભાવનગર મેડિકલ કોલેજમાં રેગિંગનો ગંભીર મામલો, 7 સિનિયર રેસિડન્ટ ડૉક્ટરો સામે ફરિયાદ નોંધાઈ

ભાવનગરની સરકારી મેડિકલ કોલેજમાં રેગિંગનો ગંભીર મામલો સામે આવતા આખરે પોલીસમાં સત્તાવાર ફરિયાદ નોંધાઈ છે. પોલીસ તપાસ દરમિયાન પ્રથમ વર્ષના રેસિડન્ટ ડૉક્ટરોને શારીરિક અને માનસિક ત્રાસ આપવામાં આવ્યો હોવાના ચોંકાવનારા ખુલાસા થયા છે. આ મામલે બીજા વર્ષના 7 રેસિડન્ટ ડૉક્ટરો સામે ગુનો નોંધવામાં આવ્યો છે.

માહિતી મુજબ, પ્રથમ વર્ષના 13 રેસિડન્ટ ડૉક્ટરોને તેમના સિનિયરો દ્વારા લાંબા સમયથી વિવિધ પ્રકારની હેરાનગતિનો સામનો કરવો પડતો હતો. આરોપ છે કે સિનિયર ડૉક્ટરો પીડિતોને આખી રાત ઓપરેશન થિયેટર (OT) અને વિવિધ વોર્ડની બહાર ઉભા રાખતા હતા. ઉપરાંત, તેમને હજારો વખત એક જ વસ્તુ લખાવવી, કૂકડા-મરઘા જેવી સજા કરાવવી અને તેના ફોટા તથા વીડિયો ઉતારવા જેવી અપમાનજનક હરકતો પણ કરવામાં આવતી હતી.

• ડો.વીર ઉર્ફે વિરેન્દ્રસિંહ જાડેજા
• ડો.જયંત દેવાણી તથા
• ડો.પ્રવિણ વર્મા તથા
• ડો.ધર્મેન્દ્ર દયાળ તથા
• ડો.વિશાલ ડાભી તેમજ
• ડો.અમન વર્મા તથા
• ડો.દિવ્ય મોદી રેસીડન્ટ ડોક્ટરો સામે ગુનો નોંધી વધુ તપાસ હાથ ધરી છે.

તપાસમાં એ પણ સામે આવ્યું છે કે પીડિત ડૉક્ટરોને નિયમિત ઊંઘ અને ભોજનના સમયથી વંચિત રાખવામાં આવતા હતા. જાહેરમાં અપશબ્દો બોલી અપમાનિત કરવા ઉપરાંત તેમને રાત્રે 3 વાગ્યે બોલાવી ઉઠક-બેઠક કરાવવામાં આવતી હતી. આરોપીઓ દ્વારા વિવિધ પ્રકારની ધમકીઓ આપી સતત માનસિક દબાણ ઊભું કરવામાં આવતું હોવાનું પણ જાણવા મળ્યું છે.

પીડિતોની રજૂઆત અને પોલીસ તપાસના આધારે સાતેય આરોપી ડૉક્ટરો સામે રેગિંગ સહિત સંબંધિત કલમો હેઠળ ગુનો નોંધવામાં આવ્યો છે. હાલ પોલીસે વધુ તપાસ હાથ ધરી છે અને સમગ્ર ઘટનાક્રમ અંગે પુરાવા એકત્રિત કરવાની કામગીરી ચાલી રહી છે.

આ પણ વાંચોઃ TET ફરજિયાતના નિર્ણય સામે અમદાવાદમાં પ્રાથમિક શિક્ષકોનો ઉગ્ર વિરોધ

આ ઘટનાએ મેડિકલ શિક્ષણ સંસ્થાઓમાં રેગિંગ વિરોધી નિયમોના અમલીકરણ અને વિદ્યાર્થીઓની સુરક્ષા અંગે ગંભીર પ્રશ્નો ઉભા કર્યા છે. કોલેજ પ્રશાસન અને સંબંધિત સત્તાધિકારીઓ દ્વારા પણ મામલાની આંતરિક તપાસ શરૂ કરવામાં આવી હોવાનું જાણવા મળ્યું છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ