વિરોધ / TET ફરજિયાતના નિર્ણય સામે અમદાવાદમાં પ્રાથમિક શિક્ષકોનો ઉગ્ર વિરોધ

વર્ષ 2010 પહેલા નિમણૂક પામેલા પ્રાથમિક શિક્ષકો માટે TET (Teacher Eligibility Test) ફરજિયાત બનાવવાના રાજ્ય સરકારના નિર્ણય સામે અમદાવાદમાં શિક્ષકોનો વિરોધ વધુ ઉગ્ર બન્યો છે. અમદાવાદ જિલ્લા પ્રાથમિક શિક્ષક સંઘના નેજા હેઠળ શિક્ષકોએ સતત ત્રીજા દિવસે જિલ્લા કલેક્ટર કચેરી ખાતે ધરણા યોજી સરકારના નિર્ણય સામે વિરોધ નોંધાવ્યો હતો.

મોટી સંખ્યામાં એકત્ર થયેલા શિક્ષકોએ સરકારને આ નિર્ણય પર પુનર્વિચાર કરવાની માંગ કરી હતી. શિક્ષકોનું કહેવું છે કે વર્ષો સુધી સેવા આપ્યા બાદ હવે TET ફરજિયાત બનાવવું અન્યાયપૂર્ણ છે અને તેના કારણે અનુભવી શિક્ષકોમાં અસંતોષ ફેલાયો છે.

ધરણા દરમિયાન શિક્ષક આગેવાનોએ જણાવ્યું હતું કે સરકાર તેમની માંગણીઓ પર યોગ્ય નિર્ણય નહીં લે તો આગામી દિવસોમાં રાજ્યભરના શિક્ષકો ગાંધીનગર ખાતે વિશાળ સ્તરે વિરોધ કાર્યક્રમ યોજશે. આ માટે વિવિધ જિલ્લાઓના શિક્ષક સંગઠનો સાથે ચર્ચા પણ શરૂ કરવામાં આવી હોવાનું જણાવાયું છે.

શિક્ષકોએ સરકાર સમક્ષ રજૂઆત કરી હતી કે વર્ષ 2010 પહેલા નિમણૂક પામેલા શિક્ષકોને TETમાંથી મુક્તિ આપવામાં આવે અને તેમની સેવાઓ તથા અનુભવને ધ્યાનમાં રાખી યોગ્ય નિર્ણય લેવામાં આવે.

આ પણ વાંચોઃરાજ્યમાં આગામી 7 દિવસ હળવા વરસાદની આગાહી, દક્ષિણ અને મધ્ય ગુજરાતમાં વધુ અસર

વિરોધ પ્રદર્શન દરમિયાન શિક્ષકો દ્વારા સૂત્રોચ્ચાર કરવામાં આવ્યા હતા અને સરકારને વહેલી તકે હકારાત્મક નિર્ણય લેવા અપીલ કરવામાં આવી હતી. હાલ આ મુદ્દે શિક્ષકો અને સરકાર વચ્ચેના આગામી પગલાં પર સૌની નજર ટકેલી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ