બે દિવસ બાદ દિલ્હી ખાતે મળનારા ભાજપની પાર્લામેન્ટરી બોર્ડની બેઠક બાદ ભાજપની ઉમેદવારોની જાહેરાત કરવામાં આવી શકે છે. ત્યારે લોકસભા સીટ દીઠ ભાજપ દ્વારા આગામી ટૂંક સમયમાં સેન્સ પ્રક્રિયા પણ શરૂ કરવામાં આવશે. સેન્સપ્રક્રિયા ક્યારે શરૂ કરવી તેમજ પોલિસી મેટરની ચર્ચાને લઈ આજે કમલમ ખાતે બેઠકનું આયોજન કરવામાં આવ્યું હતું. આ બેઠકમાં મહાનગર પાલિકાઓનાં મેયર, સ્ટેન્ડિંગ કમિટી ચેરમેન, પૂર્વ મેયર તેમજ પ્રદેશ ભાજપ પ્રમુખ ઉપસ્થિત રહેશે.
અમદાવાદ પૂર્વ લોકસભા બેઠક માટે સેન્સ પ્રક્રિયા હાથ ધરાઈ
લોકસભા ચૂંટણીને લઈ ભાજપ દ્વારા તૈયારીઓ પુરજોશમાં ચાલુ કરી છે. તેમજ ઉમેદવારોની સેન્સ લેવા માટેની પ્રક્રિયા પણ હાથ ધરવામાં આવી છે. જેમાં અમદાવાદ પૂર્વ લોકસભા બેઠક માટે નિકોલ કોઠિયા હોસ્પિટલમાં સેન્સ પ્રક્રિયા હાથ ધરાઈ હતી. આ બેઠકમાં મંત્રી મુળુ બેરા, ભરત બોઘરા અને સંગીતા પાટીલ સેન્સ માટે કોઠિયા હોસ્પિટલ પહોંચ્યા હતા. હાલ અમદાવાદ પૂર્વમાં સાંસદ હસમુખ પટેલ છે.
કાર્યકારણીની બેઠક બાદ ઉમેદવારોના નામની જાહેરાત થશે
રાજ્યસભામાં ટર્મ પૂર્ણ થયેલ બે દિગ્ગજ નેતાઓના લોકસભા લડાવવાનું ભાજપ મોવડી મંડળ દ્વારા નક્કી કરવામાં આવ્યું હોવાનું સુત્રો દ્વારા જાણવા મળી રહ્યું છે. જેમાં મનસુખ માંડવિયા અને પુરૂષોત્તમ રૂપાલાને લોકસભાની ચૂંટણીમાં નામ નક્કી હોવાનું જાણવા મળી રહ્યું છે. તો ગાંધીનગર લોકસભા બેઠક પરથી કેન્દ્રીય ગૃહમંત્રી અમિત શાહ પણ ચૂંટણી લડશે. ત્યારે આ સિવાયની બેઠકોનાં નામ દિલ્હી ખાતે મળનારી રાષ્ટ્રીય કાર્યકારણીની બેઠક બાદ જાહેર થાય તેવી સંભાવના છે.
નવા ચહેરાઓને સ્થાન મળશે
ભાજપ દ્વારા લોકસભાની 26 બેઠકો કબ્જે કરવા માટે કાર્યકરોને આહ્વાન કર્યું છે. ત્યારે આ વખતે ભાજપ દ્વારા પાંચ લાખથી ઓછા માર્જિનથી બેઠકો જીતીને એક નવો રેકોર્ડ બનાવવા પર ધ્યાન કેન્દ્રીત કર્યું છે. તો બીજી તરફ ભાજપ દ્વારા 26 લોકસભા બેઠકો પર મધ્યસ્થ ચૂંટણી કાર્યાલય તો શરૂ કરી દીધા છે. પરંતુ કોને ટિકિટ આપવીએ બાબતે હજુ મોવડી મંડળ અસમંજસ સ્થિતિમાં છે. સુત્રો દ્વારા મળતી માહિતી મુજબ મોવડી મંડળ મોટા ભાગના સાંસદોને રિપીટ નહિ કરે તેવું અંદરો અંદર ચર્ચાએ જોર પકડ્યું છે.
