IPL 2024 / ઈશાન કિશન પર BCCIની કાર્યવાહી, IPL આચાર સંહિતાનું ઉલ્લંઘન કરવા બદલ મળી સજા

ઈન્ડિયન પ્રીમિયર લીગના ઈતિહાસની સૌથી સફળ ટીમો પૈકીની એક મુંબઈ ઈન્ડિયન્સ (MI) ના વિકેટકીપર-બેટ્સમેન ઈશાન કિશને શનિવારે આ લીગમાં તેની 100મી મેચ રમી હતી. દિલ્હી કેપિટલ્સ સામેની આ મેચમાં તે 14 બોલમાં માત્ર 20 રન જ બનાવી શક્યો હતો. જો કે ઈશાનને તેની 100મી મેચમાં દંડનો સામનો કરવો પડ્યો છે.

ઈશાન કિશનને મેચ ફીના 10 ટકા દંડ ફટકાર્યો

જણાવી દઈએ કે, આ મેચમાં MIને 10 રનથી હારનો સામનો કરવો પડ્યો હતો. એવામાં હવે મુંબઈ ઈન્ડિયન્સના વિકેટકીપર-બેટ્સમેન ઈશાન કિશનને શનિવારે, 27 એપ્રિલના રોજ અરુણ જેટલી સ્ટેડિયમમાં દિલ્હી કેપિટલ્સ સામેની મેચ દરમિયાન IPL આચાર સંહિતાનું ઉલ્લંઘન કરવા બદલ દંડ ફટકારવામાં આવ્યો છે. BCCIએ કિશનને ઠપકો આપ્યો છે અને મેચ ફીના 10 ટકા દંડ ફટકાર્યો છે.

BCCIની પ્રેસ રિલીઝ

BCCI દ્વારા જારી કરવામાં આવેલી પ્રેસ રિલીઝ અનુસાર, "કિશનએ IPL કોડ ઓફ કંડક્ટની કલમ 2.2 હેઠળ લેવલ 1 નો ગુનો કર્યો છે અને તેને આ ગુનો કબૂલ કર્યો છે અને મેચ રેફરીની મંજૂરી સ્વીકારી લીધી છે. આચાર સંહિતાના લેવલ 1 ઉલ્લંઘન માટે, મેચ રેફરીનો નિર્ણય અંતિમ અને બંધનકર્તા છે."

પ્રેસ રિલીઝમાં ભૂલની સ્પષ્ટતા કરી નથી

બોર્ડે વધુમાં કહ્યું કે, “ઈશાન કિશન પર આઈપીએલ આચાર સંહિતાની કલમ 2.2 હેઠળ લેવલ 1ના ગુનાનો આરોપ મૂકવામાં આવ્યો છે. આમાં ક્રિકેટના નિયમોની બહારની ક્રિયાઓનો સમાવેશ થાય છે, જેમાં જાહેરાત બોર્ડ, બાઉન્ડ્રી ફેન્સ અને અન્ય ફિક્સરને નુકસાન તેમજ મેચ દરમિયાન ક્રિકેટ સાધનોનો દુરુપયોગ સામેલ છે." જોકે, બીસીસીઆઈએ પ્રેસ રિલીઝમાં સ્પષ્ટતા કરી નથી કે ઈશાન કિશને મેચ દરમિયાન કઈ ભૂલ કરી હતી.

વધુ વાંચો: રાજસ્થાન સામે જીતેલી મેચ હાર્યા બાદ કેએલ રાહુલનું દર્દ છલકાયું, જાણો હાર માટે કોને જવાબદાર ગણાવ્યો

કેવી રહી મેચ?

મેચની વાત કરીએ તો ટોસ હારીને પ્રથમ બેટિંગ કરવા આવ્યા બાદ દિલ્હી કેપિટલ્સે જેક ફ્રેઝર-મેકગર્કની તોફાની અડધી સદીની મદદથી 257 રન બનાવ્યા હતા. આઈપીએલના ઈતિહાસમાં ડીસીનો આ અત્યાર સુધીનો સૌથી વધુ સ્કોર છે. જેક ફ્રેઝરે 27 બોલમાં 84 રન બનાવ્યા હતા. આ સ્કોરનો પીછો કરવા આવેલી મુંબઈ ઈન્ડિયન્સની ટીમ નિર્ધારિત 20 ઓવરમાં 9 વિકેટના નુકસાન પર 247 રન જ બનાવી શકી હતી. તિલક વર્માએ અડધી સદી ફટકારી હતી, પરંતુ તે ટીમને જીત તરફ લઈ જઈ શક્યો ન હતો.