- મધ્યપ્રદેશના ઈન્દોરમાં એક કેફેમાં આગ લગાવવા બદલ વૃદ્ધની ધરપકડ
- આરોપી વૃદ્ધે કેફેમાં આગ લગાવવાની કબૂલાત કરી
- છોકરા-છોકરીઓ સિગારેટ પીતા હતા તેથી કેફેની આગ લગાવી
Indore News : મધ્યપ્રદેશના ઈન્દોરમાં એક કેફેમાં આગ લગાવવા બદલ 70 વર્ષના એક વ્યક્તિની ધરપકડ કરવામાં આવી છે. વાત જાણે એમ છે કે, આરોપી વૃદ્ધે કેફેમાં આગ લગાવવાની કબૂલાત કરી છે. ઉપરાંત આમ કરવા પાછળનું કારણ પણ જણાવવામાં આવ્યું છે. આરોપીના કહેવા પ્રમાણે તેમણે કાફેને એટલા માટે જ આગ લગાવી દીધી કારણ કે ત્યાં છોકરા-છોકરીઓ સિગારેટ પીતા હતા.
સીસીટીવી ફૂટેજમાં કેદ થઈ સમગ્ર ઘટના
રિપોર્ટ અનુસાર આ ઘટના ઈન્દોરના લાસુડિયા પોલીસ સ્ટેશન વિસ્તારમાં બની હતી. હાલમાં જ અહીં એક કેફેમાં આગ લાગવાનો કિસ્સો પ્રકાશમાં આવ્યો હતો. કેફેની જે તસવીરો સામે આવી છે તેમાં ખરાબ રીતે બળી ગયેલી દુકાન દેખાય છે. જ્યારે કેફેના માલિક શુભમ ચૌધરીએ સીસીટીવી ફૂટેજ ચેક કર્યા ત્યારે વીડિયોમાં એક વૃદ્ધ વ્યક્તિ જોવા મળ્યો હતો. ફૂટેજમાં એક વૃદ્ધ વ્યક્તિ આગ લગાવીને જતા જોવા મળી રહ્યો છે.
પોલીસે કરી આરોપી વૃદ્ધની ધરપકડ
આ અંગે પોલીસમાં ફરિયાદ કરવામાં આવી હતી. આ પછી લસુડિયા પોલીસ સ્ટેશનના ઈન્ચાર્જ તરેશ સોનીએ એક ટીમ બનાવી આરોપીની ધરપકડ કરી હતી. પોલીસ દ્વારા પૂછપરછ કરવામાં આવતા આરોપીએ જણાવ્યું કે, કેફેની બહાર છોકરા-છોકરીઓ સિગારેટ પીતા હતા, જે તેને પસંદ નહોતું. તેથી તેણે કેફેમાં આગ લગાવી દીધી.
શું કહ્યું ઈન્દોર પોલીસે ?
ઈન્દોરના એડિશનલ ડીસીપી રાજેશ દાંડોટિયાએ જણાવ્યું કે, થોડા દિવસો પહેલા કેફેમાં આગ લાગી હતી. સીસીટીવીના આધારે 70 વર્ષના વૃદ્ધની ધરપકડ કરવામાં આવી છે. કેફેમાં છોકરા-છોકરીઓ સિગારેટ પીતા હોવાથી વૃદ્ધે આગ લગાવી હતી. જેના કારણે વૃદ્ધ ગુસ્સામાં હતો. તેની ધરપકડ કરવામાં આવી છે અને તેની પૂછપરછ કરવામાં આવી રહી છે. રિપોર્ટ અનુસાર કેફેમાં આગ લાગવાને કારણે અંદાજે 4 લાખ રૂપિયાનું નુકસાન થયું છે. પોલીસે આ મામલે આગળની કાર્યવાહી હાથ ધરી છે.
