ક્રાઈમ / સાણંદ–વિરમગામ હાઇવે પર વિદેશી દારૂની 32,392 બોટલો ઝડપાઈ, આખું કન્ટેનર ભરેલું હતું

ગુજરાતમાં દારુબંધીના ધજાગરા ઉડાવતા એક બનાવમાં સાણંદ–વિરમગામ હાઇવે પર દારુ ભરેલું કન્ટેનર ઝડપાયું છે. સાણંદ GIDC પોલીસે ₹1.11 કરોડથી વધુ કિંમતની 32,392 વિદેશી દારૂની બોટલો સાથે રાજસ્થાનના ડ્રાઇવરને ઝડપી પાડ્યો છે. પોલીસે રેડ કરી કન્ટેનરમાંથી 1,200 જેટલા પેટીઓ પકડી પાડી હતી. આ ટ્રક રાજસ્થાનની છે અને તેમાં પંજાબથી દારૂ ભરવામાં આવ્યો હતો.

દારુનો મોટો જથ્થો સુરેન્દ્રનગરમાં પહોંચાડવાનો હતો

દારુનો આ મોટો જથ્થો સુરેન્દ્રનગરમાં પહોંચાડવાનો હતો પરંતુ અધવચ્ચે પોલીસે તેને પકડી પાડ્યો હતો. આ ખેપને સ્વીકારનાર 3 લોકો ફરાર થયા છે. દારૂની તમામ બોટલમાં બારકોડ સ્ટીકર સાથે છેડછાડ કરવામાં આવી હતી. પોલીસે સુરેન્દ્રનગરના દેવેન્દ્ર બોરીચા, નાગરાજ ખાચર અને દેવાયત ખરતાણીને વોન્ટેડ જાહેર કર્યા છે.

વધુ વાંચો : 'ચા પીવા રોકાયો હતો' હોટલમાં 3 છોકરીઓ સાથે ઝડપાયા નેતા, પાપલીલા ઉઘાડી પડી

5 સામે ગુનો નોંધાયો

પોલીસે કન્ટેનરના ડ્રાઇવર કરતારામ મેઘવાલ (ઉંમર 30)ની ઘટનાસ્થળેથી ધરપકડ કરી છે, જે રાજસ્થાનના બાડમેર જિલ્લાના ધોરીમના તાલુકાનો રહેવાસી છે. પોલીસે 5 લોકો સામે ગુનો નોંધ્યો છે. સાણંદ GIDC પોલીસ દ્વારા આ ગુનામાં સંડોવાયેલા તમામ ફરાર આરોપીઓને ઝડપી પાડવા માટે તપાસ હાથ ધરવામાં આવી છે. પોલીસે દારૂના આ મોટા જથ્થાની પ્રાપ્તિ, તેના નાણાકીય વ્યવહારો, લોડિંગ અને પરિવહન સહિતની સમગ્ર સપ્લાય ચેઇનને ટ્રેસ કરવાની કાર્યવાહી હાથ ધરી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ