સુઃખદ અંત / સાગબારા જંગલ જમીન ખેડાણ વિવાદનો સુઃખદ અંત, બિરસા મુંડાની જન્મજયંતીએ સાગબારાના 500 ખેડૂતોને મળી જમીનની સનદ

સાગબારા વિસ્તારમાં લાંબા સમયથી ચાલી રહેલા જંગલ જમીન ખેડાણના વિવાદમાં આખરે ખેડૂતો માટે રાહતના સમાચાર સામે આવ્યા છે. બિરસા મુંડાની જન્મજયંતીના અવસરે 500 ખેડૂતોને જંગલ જમીનના અધિકારની સનદ આપવામાં આવી છે. જ્યારે અન્ય 626 ખેડૂતોની જમીન સંબંધિત નોંધણી (એન્ટ્રી) કરવામાં આવી છે. આ નિર્ણયથી વર્ષોથી જમીનના હક માટે લડત આપી રહેલા ખેડૂતોમાં ખુશીની લાગણી જોવા મળી રહી છે.

લાંબા સમયથી જંગલ જમીન પર ખેતી કરતા ખેડૂતો પોતાના કબજાની જમીનના કાયદેસરના હક માટે રજૂઆતો કરી રહ્યા હતા. સનદ મળતાં હવે અનેક ખેડૂતોને પોતાની જમીન અંગે કાયદેસરની ઓળખ અને અધિકાર મળવાની આશા મજબૂત બની છે. સનદ મેળવનારા તેમજ જમીનની એન્ટ્રી થયેલા ખેડૂતોમાં ખુશીનો માહોલ જોવા મળી રહ્યો છે.

જોકે, આ સમગ્ર મામલે હજુ પણ આશરે 8 હજાર ખેડૂતોના જંગલ જમીન ખેડાણ સંબંધિત દાવાઓ પેન્ડિંગ હોવાનું જાણવા મળે છે. જેના કારણે તમામ ખેડૂતોને હજુ સુધી ન્યાય મળ્યો નથી. સનદથી વંચિત રહેલા ખેડૂતો પણ પોતાના દાવાઓનો ઝડપથી નિકાલ થાય અને તેમને જમીનના હકની સનદ મળે તેવી માંગ કરી રહ્યા છે.

સનદ ન મેળવનારા ખેડૂતો હવે સરકાર સમક્ષ રજૂઆત કરવાની તૈયારી કરી રહ્યા છે. ખેડૂતોનું કહેવું છે કે સરકાર સમક્ષ યોગ્ય રજૂઆત કર્યા બાદ પણ જો તેમના દાવાઓનો નિકાલ નહીં આવે અને સનદ આપવામાં નહીં આવે તો તેઓ આંદોલનનો માર્ગ અપનાવશે.

આ પણ વાંચોઃ ખેડબ્રહ્મા-લક્ષ્મીપુરા રોડ પર બેફામ દારૂની હેરાફેરીનો વીડિયો વાયરલ, વીડિયો ઉતારતા જાગૃત નાગરિક પર બુટલેગરનો હુમલો!

એક તરફ 500 ખેડૂતોને સનદ અને 626 ખેડૂતોની એન્ટ્રીથી રાહત મળી છે, તો બીજી તરફ હજારો ખેડૂતોના દાવા હજુ પેન્ડિંગ હોવાથી આ મુદ્દે આગામી દિવસોમાં સરકાર શું નિર્ણય લે છે તેના પર સૌની નજર રહેશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ