દિગ્ગજ ક્રિકેટર સાથે ફ્રોડ / સચિન તેંડુલકરે કર્યો કેસ, લગાવ્યો છેતરપિંડીનો આરોપ, જાણો શું છે સમગ્ર મામલો

• દિગ્ગજ ક્રિકેટર સચિન તેંડુલકરે સાયબર સેલમાં કેસ નોંધાવ્યો
• જાહેરાતોમાં તેના નામ, ફોટો, અવાજના ઉપયોગને લઈને કેસ કર્યો 
• સચિન તેંડુલકરની ફરિયાદ બાદ સાયબર સેલે શરૂ કરી તપાસ

દિગ્ગજ ક્રિકેટર સચિન તેંડુલકરે ગુરુવારે મુંબઈ ક્રાઈમ બ્રાન્ચના સાયબર સેલમાં ઈન્ટરનેટ પર ચાલતી નકલી જાહેરાતોમાં તેના નામ, ફોટો અને અવાજના ઉપયોગને લઈને કેસ દાખલ કર્યો હતો. પોતાની ફરિયાદમાં તેણે આરોપ લગાવ્યો છે કે તેના નામ, તસવીર અને અવાજનો ઉપયોગ કરીને લોકો સાથે છેતરપિંડી કરવામાં આવી રહી છે. આટલું જ નહીં, આ નકલી જાહેરાતોમાં એવો પણ દાવો કરવામાં આવી રહ્યો છે કે સચિન તેંડુલકરની પ્રોડક્ટ ખરીદવા પર તમને તેની સહી કરેલી ટી-શર્ટ મળશે. સચિન તેંડુલકરની ફરિયાદ બાદ મુંબઈ પોલીસના સાયબર સેલે કેસ નોંધીને તપાસ શરૂ કરી છે.

Access to trustworthy products is essential. Use the platform's reporting and blocking tools to keep our communities safe. Let's be proactive in creating a safer online environment. pic.twitter.com/JZR1FZTJtj

— Sachin Tendulkar (@sachin_rt) May 12, 2023

તેંડુલકરના અંગત સહાયકે કેસ નોંધ્યો 

મળતી માહિતી મુજબ તેંડુલકરના અંગત સહાયકે કેસ નોંધ્યો છે. ફરિયાદ મુજબ 5 મેના રોજ ફેસબુક પર એક ઓઈલ કંપનીની જાહેરાત જોઈ જેમાં ઓઈલ કંપનીએ તેંડુલકરના ફોટાનો ઉપયોગ કર્યો હતો અને નીચે લખેલું હતું કે આ પ્રોડક્ટની ભલામણ સચિન તેંડુલકરે પોતે કરી હતી. તેંડુલકરના અંગત સહાયકની ફરિયાદ અનુસાર આવી જ જાહેરાતો ઈન્સ્ટાગ્રામ પર પણ જોવા મળી છે.

સચિન તેંડુલકર આવી કોઈ પ્રોડક્ટને સમર્થન આપતો નથી

મુંબઈ ક્રાઈમ બ્રાન્ચને મળેલી ફરિયાદના આધારે સચિન તેંડુલકર આવી કોઈ પ્રોડક્ટને સમર્થન આપતો નથી. આ જાહેરાતમાં સચિન તેંડુલકરના અવાજનો દુરુપયોગ કરવામાં આવ્યો છે, સાથે જ તેની તસવીરોનો પણ દુરુપયોગ કરવામાં આવી રહ્યો છે. ફરિયાદ મળ્યા બાદ ક્રાઈમ બ્રાન્ચે આ મામલે આઈપીસીની વિવિધ કલમો 420, 465 અને 500 હેઠળ છેતરપિંડી અને બનાવટી અને આઈટી એક્ટની સંબંધિત કલમો સહિત કેસ નોંધ્યો છે.