મુંબઈમાં 17 વર્ષની સગીર છોકરી કોલેજમાં ભણતા સગીર છોકરાથી ગર્ભવતી બની હતી જોકે તેમની વચ્ચેનો આ સંબંધ સહમતિથી જ બંધાયો હતો. સગીરા બાળકને જન્મ આપવા માગે છે પરંતુ કેટલીક હોસ્પિટલોએ ડિલિવરી માટે તેને ના પાડી દીધી. ના પાડવાનું કારણ એ હતું કે સગીરાએ આરોપી છોકરા સામે પોલીસ ફરિયાદ નોંધાવી નહોતી પરંતુ સંબંધ સહમતિવાળો હોવાથી છોકરી પોલીસ કેસ દાખલ કરવા માગતી નથી આથી છોકરીએ માતાએ હાઈકોર્ટ પાસે ધા નાખી હતી. હાઈકોર્ટે તેની વાત ધ્યાનમાં લઈને મુંબઈની સરકારી જેજે હોસ્પિટલમાં 17 વર્ષની ગર્ભવતી યુવતીને સારવાર કરાવવાનો આદેશ આપ્યો હતો.
વધુ વાંચો : 'કપડાં ઉતાર અને કેમેરા સામે ઊભી રહી જા'... કાળજું કંપાવી દેશે મહિલા વકીલની આપવિતી
હાઈકોર્ટે જેજે હોસ્પિટલને છોકરીની ડિલિવરીનો કર્યો આદેશ
યુવતીએ તેની માતા દ્વારા દાખલ કરેલી અરજીમાં, હાઈકોર્ટને જણાવ્યું હતું કે હોસ્પિટલોએ તેની સારવાર કરવાનો ઇનકાર કર્યો હતો કારણ કે તે જે છોકરા સાથે સંબંધમાં હતી તેની સામે પોલીસ ફરિયાદ નોંધાવવા માંગતી ન હતી. અરજીમાં કહેવામાં આવ્યું છે કે છોકરી અને છોકરા વચ્ચે સહમતિથી સંબંધ છે. છોકરો પણ 17 વર્ષનો છે. અરજીમાં કહેવામાં આવ્યું છે કે તબીબી સારવારનો ઇનકાર યુવતીના બંધારણમાં જણાવેલા મૂળભૂત અધિકારોનું ઉલ્લંઘન કરે છે. સરકારી વકીલ પૂર્ણિમા કંથારિયાએ ન્યાયાધીશ જી એસ કુલકર્ણી અને ફિરદોશ પૂનીવાલાની ડિવિઝન બેંચને જણાવ્યું હતું કે, યુવતી અહીંની જેજે હોસ્પિટલમાં સારવાર મેળવી શકે છે.
જન્મ બાદ બાળકને દત્તક અપાશે
જો કે વકીલે જણાવ્યું હતું કે યુવતીએ ઇમરજન્સી પોલીસ રિપોર્ટ રજૂ કરવો પડશે જેમાં જણાવાયું છે કે તે છોકરા સામે ફોજદારી ફરિયાદ નોંધાવવા માંગતી નથી. અરજદારના વકીલે કોર્ટને માહિતી આપી હતી કે યુવતી ગર્ભપાત કરાવવા માંગતી નથી અને બાળકને જન્મ પછી દત્તક લેવા માટે મૂકવામાં આવશે. હાઈકોર્ટના આદેશ બાદ હવે જેજે હોસ્પિટલ છોકરીની ડિલિવરી તેને ત્યાં કરાવશે અને માતા તથા બાળકની સંભાળ લેશે અને ત્યાર બાદ બાળકને દત્તક આપવામાં આવશે.
VTV Gujarati Newsની તમામ અપડેટ સૌથી પહેલા મેળવવા માટે અમારી WhatsApp ચેનલ ફોલો કરો
