- આજે સંત રવિદાસની જયંતિ
- પીએમ મોદીએ ભક્તો સાથે બેસી મંઝીરા વગાડ્યા
- પીએમ મોદી સાદગીપૂર્ણ રીતે ભક્તિભાવમાં થયાં લીન
આજે સંત રવિદાસ જયંતિના અવસરે પ્રધાનમંત્રી મોદીએ દિલ્હીના કરોલબાગમાં શ્રી ગુરૂ રવિદાસ વિશ્રામ ધામ મંદિરમાં પૂજા અર્ચના કરી હતી. ત્યાર બાદ પીએમ મોદીએ મંદિર પરિસરમાં હાજર મહિલા સાથે ભજન કીર્તન પણ કર્યા, જેનો વીડિયો સોશિયલ મીડિયા પર વાયરલ થઈ ગયો છે. આ દરમિયાન પીએમ મોદી ત્યાં હાજર લોકો સાથે મળ્યા અને તેમની સાથે વાતચીત પણ કરી હતી.
પીએમ મોદીએ મંઝીરા વગાડ્યા
પ્રધાનમંત્રી નરેન્દ્ર મોદીએ સંત રવિદાસ જયંતિના અવસરે કરોલ બાગના શ્રી રવિદાસ વિશ્રામ ધામ મંદિરમાં શ્રદ્ધાળુઓ સાથે ભજનમાં ભાગ લીધો હતો. આ દરમિયાન પીએમ મોદીએ ભક્તો સાથે બેસીને મંઝીરા પણ વગાડ્યા હતા.
આપણા બધાં માટે પ્રેરણાદાયી છે સંત રવિદાસ
આ અગાઉ કાલે પીએમ મોદીએ ટ્વિટર પર સંત રવિદાસની પૂજા કરતા કેટલીય તસ્વીરો પોસ્ટ કરી હતી. પીએમ મોદીએ લખ્યું હતું કે, મહાન સંત ગુરૂ રવિદાસજીની જન્મ જયંતિ છે. તેમણે જે રીતે પોતાનું જીવન સમાજમાંથી જાત-પાત અને છૂઆછૂત જેવી કુપ્રથાઓને સમાપ્ત કરવા માટે સમર્પિત કરી દીધી, તે આજે પણ આપણાં બધા માટે પ્રેરણાદાયી છે. આ અવસર પર મને સંત રવિદાસની પવિત્ર ભૂમીને લઈને કંઈક વાતો યાદ આવી રહી છે. વર્ષ 2016 અને 2019માં મને અહીં શિશ ઝૂકાવાનું અને લંગરમાં ભાગ લેવાનો મોકો મળ્યો હતો. એક સાંસદ હોવાના નાતે મેં નક્કી કરી લીધું હતું કે, આ તીર્થસ્થળના વિકાસકામમાં કોઈ કમી નહીં રહેવા દઉં.
પઠાણકોટમાં પીએમ મોદીની જાહેરસભા
પીએમ મોદી કરોલ બાગમાં પૂજા કર્યા બાદ સીધા પંજાબના પઠાણકોટ રવાના થઈ ગયા હતા. પઠાણકોટમાં પીએમ મોદી પંજાબ વિધાનસભા ચૂંટણીને ધ્યાને રાખીને એક જાહેરસભાને સંબોધન કરવાના છે. તો વળી આમ આદમી પાર્ટીના સંયોજક અને દિલ્હીના મુખ્યમંત્રી અરવિંદ કેજરીવાલ જાલંઘરમાં રવિદાસ જયંતિ મંદિરમાં દર્શન કરશે અને રોડ શોમાં જોડાશે.
