- મુંબઈ નજીકના થાણેમાં ચોંકાવનારી ઘટના
- ભાઈએ 12 વર્ષની સગીર બહેનને રીબાવી-રીબાવીને મારી
- પહેલું માસિક આવ્યું હોવાથી સગીરાને પડ્યો હતો ડાઘ
- આ જોઈને ભાઈને અફેરનો પડ્યો શક
મહારાષ્ટ્રના થાણે જિલ્લામાં ભાઈ દ્વારા નાની બહેનને નિર્દયતાથી માર મારવાનો એક સનસનાટીભર્યો અને શરમજનક કિસ્સો સામે આવ્યો છે. થાણેના ઉલ્હાસનગર પોલીસ સ્ટેશન વિસ્તારમાં તેની 12 વર્ષની નાની બહેનની હત્યાના આરોપમાં 30 વર્ષીય સુરક્ષા ગાર્ડની ધરપકડ કરવામાં આવી છે. બહેનના પ્રથમ માસિકધર્મ દરમ્યાન લોહિના ડાઘ જોઈને ભાઈને તેની બહેનને કોઈની સાથે પ્રેમ સબંધ હોવાની અને શારીરિક સંબંધ હોવાની શંકા ગઈ હતી.
માસિકધર્મને લઈને યુવતિનાં ભાઈને ગેરસમજ થઈઃ પોલીસનો દાવો
પોલીસ સૂત્રોએ જણાવ્યું હતું કે બાળકીને માસિકધર્મ શરૂ થયા હોવાથી ગેરસમજ થઈ હોવાની પૂરેપૂરી શક્યતા છે. પરંતુ મોટા ભાઈને લાગ્યું કે તેને કોઈની સાથે શારીરિક સંબંધ છે. જો કે તેના કેટલાક પડોશીઓએ તેની પાછળ તેની પત્ની પાસેથી મળેલી ખોટી માહિતીનો પણ ઉલ્લેખ કર્યો છે. ભાઈના ત્રાસથી ગંભીર રીતે ઘવાયેલી નાની બહેનનું સારવાર માટે હોસ્પિટલ લઈ જતી વખતે જ મોત નિપજ્યું હતું.
માસિકધર્મ વિશે ભાઈને સમજાવી ન શકી નાની બહેન
ઉલ્હાસનગર પોલીસ સ્ટેશનના સિનિયર ઈન્સ્પેક્ટર મધુકર કડે આ મામલે જણાવ્યું કે યુવતી ઉલ્હાસનગરના શાંતિનગર વિસ્તારમાં તેના ભાઈ અને ભાભી સાથે રહેતી હતી. તેના માતા-પિતા ગામમાં રહે છે. છોકરીનું માસિક ધર્મ થોડા દિવસો પહેલા શરૂ થયું હતું. ભાઈએ તેના કપડા પર લોહીના ડાઘ જોયા અને તેને શંકા થવા લાગી કે યુવતીને કોઈની સાથે પ્રેમ સબંધ છે. જો કે, યુવતીને માસિક ધર્મ વિશે કોઈ જાણકારી ન હતી અને જ્યારે યુવતિનાં ભાઈએ તેને લોહીના ડાઘ વિશે પૂછ્યું ત્યારે યુવતિ તેનાં ભાઈને સમજાવવામાં અસમર્થ રહી હતી.
બહેનનાં મોં તેમજ પીઠ સહિતની કેટલીક જગ્યાએ ગરમ ચમચાથી ડામ આપવામાં આવ્યા હતા
મધુકર કડે કહ્યું, "ભાઈએ તેની નાની બહેનને કોઈની સાથે શારીરિક સંબંધ હોવાનો આરોપ લગાવ્યો છે. પોલીસ અધિકારીએ જણાવ્યું કે આરોપીએ બહેનને ત્રણ દિવસ સુધી માનસિક ત્રાસ આપ્યો હતો. બહેનને લાતો અને મુક્કા વડે માર મારવા ઉપરાંત યુવતીનાં મોં, પીઠ અને શરીરના અન્ય ભાગો પર ગરમ ચમચા વડે ડામ આપવામાં આવ્યા હતા. જેના કારણે યુવતિ ગંભીર રીતે દાઝી ગઈ હતી. મધુકર કડેએ વધુમાં જણાવ્યું હતું કે, આ મામલો પોલીસના ધ્યાનમાં આવ્યો. ત્યારે ઘાયલ છોકરીને મંગળવારે સારવાર માટે ઉલ્હાસનગર સેન્ટ્રલ હોસ્પિટલમાં લાવવામાં આવી. જ્યાં હોસ્પિટલમાં ફરજ પરના તબીબ ર્ડા.પુનીતે યુવતીને મૃત જાહેર કરી હતી અને પોલીસને જાણ કરી હતી.
IPC ની કલમ 302 હેઠળ ગુનો નોંધાયો, આરોપીની ધરપકડ કરાઈ
પોલીસ અધિકારીએ કહ્યું કે આરોપી સુરક્ષા ગાર્ડ તરીકે કામ કરવાવાળા આરોપી ભાઈ પર ભારતીય દંડ સંહિતા ((IPC)ની કલમ 302 હેઠળ હત્યાનો કેસ દાખલ કરવામાં આવ્યો છે. ત્યારે યુવતિના મૃતદેહને પોસ્ટમોર્ટમ માટે મોકલી દેવામાં આવ્યો છે. સાથે જ આરોપી ભાઈની ધરપકડ કરીને આગળની કાયદેસરની કાર્યવાહી શરૂ કરવામાં આવી છે. પોલીસ પૂછપરછ દરમિયાન તેણે પોતાનો ગુનો કબૂલી લીધો હતો.
