NRI ન્યૂઝ / ...તો અમેરિકામાં જનારા વિદ્યાર્થીઓને ખાલી હાથે વતન પરત ફરવું પડશે, ભારતીયો એલર્ટ!

છેલ્લા કેટલાક મહિનાઓ યુનાઇટેડ સ્ટેટ્સમાં વિદેશી વિદ્યાર્થીઓ માટે ખુબ જ મુશ્કેલ રહ્યા છે. પહેલાં, H-1B વિઝાની ફી $100,000 સુધી વધારી દેવામાં આવી, જેના કારણે ઘણા વિદ્યાર્થીઓએ પોતાની અમેરિકામાં અભ્યાસ કરવાની આશા ગુમાવી દીધી. હવે, વિદ્યાર્થીઓ માટે વર્ક પરમિટ નાબૂદ કરવાની માંગણી શરૂ થઇ છે. જો આવી માંગણી મંજૂર થાય, તો USમાં અભ્યાસ કરતા વિદ્યાર્થીઓ ખાલી હાથે ઘરે ફરવા માટે મજબૂર થઈ શકે છે.

સેનેટ ન્યાયતંત્ર સમિતિના અધ્યક્ષ અને રિપબ્લિકન નેતા ચક ગ્રાસલીએ આ પગલાંની માંગ કરી છે. તેમણે ડિપાર્ટમેન્ટ ઓફ હોમલેન્ડ સિક્યુરિટી (DHS)ને વિનંતી કરી છે કે વિદ્યાર્થી વિઝા ધારકોને વર્ક ઓથોરાઇઝેશન ન આપવું જોઈએ. ચક ગ્રાસલીએ ચેતવણી આપી છે કે વર્ક પરમિટ આપવાનું ચાલુ રાખવું કાયદાનું ઉલ્લંઘન છે અને રાષ્ટ્રીય સુરક્ષાને જોખમમાં મૂકે છે. તેમણે DHS વડા ક્રિસ્ટી નોએમને પત્ર લખીને આ મુદ્દો ઉઠાવ્યો છે.

ચક ગ્રાસલીએ તેમના પત્રમાં જણાવ્યું છે કે, “વિદેશી સ્નાતકોની સ્પર્ધા અમેરિકન વિદ્યાર્થીઓમાં વધતી બેરોજગારીનું મુખ્ય કારણ છે. કોંગ્રેસે વિદેશી સ્નાતકો માટે જોબ વિઝા પર મર્યાદા મૂકી છે જેથી નોકરીઓ પહેલા અમેરિકનો માટે ઉપલબ્ધ રહે.” તેઓ કહે છે કે, DHS દ્વારા હજારો વર્ક ઓથોરાઇઝેશન પરમિટ જારી કરવી એ કાયદાનું સીધું ઉલ્લંઘન છે.

ખાસ કરીને, ચક ગ્રાસલીનું લક્ષ્ય ઓપ્શનલ પ્રેક્ટિકલ ટ્રેનિંગ (OPT) પ્રોગ્રામ પર છે. OPT પ્રોગ્રામ મુજબ, વિદ્યાર્થીઓને તેમની ડિગ્રી પૂર્ણ કર્યા પછી 12 થી 36 મહિના સુધી યુનાઇટેડ સ્ટેટ્સમાં કામ કરવાની મંજૂરી આપવામાં આવે છે. આ સમય દરમિયાન વિદ્યાર્થીઓ તે ક્ષેત્રમાં કામ કરી શકે છે જ્યાં તેમણે અભ્યાસ કર્યો છે. જો OPT પ્રોગ્રામ નાબૂદ થાય, તો યુએસમાં અભ્યાસ કરતા ભારતીયો સહિત બધા વિદેશી વિદ્યાર્થીઓ માટે ભવિષ્ય જોખમમાં મુકાઈ જશે.

આ પણ વાંચો : અમેરિકાના H-1B વિઝા વચ્ચે જર્મનીથી ભારતીયો માટે આવી ખુશખબર, જાણીને ખુશ થઇ જશો

સોશિયલ મીડિયા પર ચક ગ્રાસલીએ લખ્યું છે કે, “DHS એ અમેરિકન સાથે સ્પર્ધા કરતા વિદેશી વિદ્યાર્થીઓને વર્ક ઓથોરાઇઝેશન આપવાનું બંધ કરવું જોઈએ. આ કાયદાનું ઉલ્લંઘન છે અને અમેરિકન ટેક અને કોર્પોરેટ કંપનીઓ માટે જોખમ ઊભું કરે છે.” મોટો પ્રશ્ન એ છે કે, શું અમેરિકાની સરકાર OPT અને વર્ક પરમિટને નાબૂદ કરશે, અને વિદેશી વિદ્યાર્થીઓના ભાવિ જોખમમાં આવશે? તે નિર્ણય આગળ આવતા દિવસોમાં જાણીશું.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ