પહેલ / વ્યાજખોરોથી મુક્તિ માટે નવી ઝુંબેશ: હવે ઓછાં વ્યાજદરે લોન અપાવવામાં સુરત પોલીસ બનશે મધ્યસ્થી, ડાયલ કરો 100

• વ્યાજખોરી ડામવા સુરત પોલીસની પહેલ
• સુરત પોલીસ અપાવશે ઓછા વ્યાજે લોન
• 100 નંબર પર ફોન કરવાથી મળશે મદદ

રાજ્યમાં વ્યાજખોરો સામે હાલ પોલીસ કડક કાર્યવાહી કરી રહી છે તેવામાં અનેક વ્યાજખોરો ભૂગર્ભમાં ઉતરી ગયા છે. આ દરમ્યાન સુરત પોલીસ દ્વારા એક મોટી અને સરાહનિય પહેલ શરૂ કરવામાં આવી છે. વાત જાણે એમ છે કે, વ્યાજખોરી ડામવા સુરત પોલીસ દ્વારા નવી પહેલના ભાગરૂપે માનવતાના ધોરણે હવે પોલીસ લોકોને લોન લેવામાં મધ્યસ્થી કરશે. સુરત પોલીસ કમિશ્નર અજય તોમરે કહ્યું છે કે, જે લોકોએ ઓછા વ્યાજે લોન જોઈએ તે પોલીસનો સંપર્ક કરી શકશે. 

ગુજરાતમાં દરેક જરૂરિયાતમંદ વ્યક્તિ વ્યાજે પૈસા લેતા હોય છે. જોકે ક્યારેક ક્યારેક અમુક માથાભારે વ્યાજખોરો રકમ ઉપરાંત પણ ભારે રકમ વ્યાજ સ્વરૂપે પડાવતા હોય છે. જેને લઈ અનેક વ્યક્તિઓ વ્યાજખોરોના ત્રાસના કારણે પોતાનું જીવન ટૂંકાવી લેતા હોય છે. જોકે મહત્વનું છે કે, હાલમાં જ ગુજરાત પોલીસ દ્વારા વ્યાજખોરો સામે લાલ આંખ કરાઇ છે. તો હવે બીજી તરફ સુરત પોલીસ દ્વારા હાલ વ્યાજખોરી ડામવા નવી પહેલ શરૂ કરવામાં આવી છે. 

વ્યાજખોરી ડામવા સુરત પોલીસની નવી પહેલ
સુરતમાં વ્યાજખોરી ડામવા અંગે સુરત પોલીસ કમિશ્નર અજય તોમર દ્વારા એક નવી પહેલ શરૂ કરવામાં આવી છે. પોલીસ કમિશ્નર અજય તોમરે કહ્યું છે કે, વ્યાજચક્રમાં ફસાયેલા લોકો ખરાબ પગલું ભરે તે ગંભીર બાબત છે. વ્યાજખોરીના વિષચક્રમાં ફસાયેલા લોકો 100 નંબર પર ફોન કરી પોલીસની મદદ મેળવી શકે છે તેવું કહ્યું છે. 

પોલીસ લોન અપાવવામાં કરશે મધ્યસ્થી 
સુરત પોલીસ દ્વારા વ્યાજખોરી ડામવા નવી પહેલના ભાગરૂપે હવે લોન અપાવવામાં મદદ કરવામાં આવશે.મહત્વનું છે કે, બેફામ બનેલા વ્યાજખોરના મસમોટા વ્યાજ અને વ્યાજખોરી રોકવા આ પહેલ શરૂ કરવામાં આવી છે. પોલીસ કમિશ્નર અજય તોમરે કહ્યું છે કે, ઘણી વખત મીડિયામાં અહેવાલ આવતા હોય છે છે વ્યાજના વિષ ચક્રમાં ફસાઇ લોકો પગલા ભરી લેતા હોય છે. જોકે હવે 100 નંબર પર ફોન કરવાથી પોલીસ મદદ કરશે. આ સાથે તેમણે કહ્યું કે, ઓછા વ્યાજદરે લોન મેળવવા પોલીસનો સંપર્ક કરી શકાશે.