વાહ / VIDEO: 31 તોલા સોનું અને 1 કરોડ 56 લાખ રોકડ, રાજસ્થાનમાં ભાણાના લગ્નમાં મામાનું રજવાડી મામેરું

ભારતમાં ભાણા કે ભાણીના લગ્નમાં મામેરું ભરવાની પરંપરા સદીઓથી ચાલતી આવી છે. ક્યાંક તેને “ભાત” કહેવામાં આવે છે, તો ક્યાંક “માયરા” તરીકે ઓળખાય છે. રાજસ્થાનમાં ખાસ કરીને “માયરા” વિધિ ખૂબ જ મહત્ત્વપૂર્ણ માનવામાં આવે છે. આ પ્રસંગે ભાઈ પોતાની બહેન અને તેના પરિવારને સન્માનરૂપે ભેટો અને આશીર્વાદ આપે છે. પરંતુ આ વખતે રાજસ્થાનના બિકાનેરના નોખા ગામમાં જે મામેરું થયું, તે ચર્ચાનો વિષય બની ગયું છે.

પ્રસંગ હતો ગિરધારી અને જગદીશ ગોદારાના બાળકોના લગ્નનો. આ પ્રસંગે સેનિયાલા ગામના બે મામા – ભંવર લેઘા અને જગદીશ લેઘાએ તેમની બહેન મીરાના ભાણાના લગ્નમાં મામેરું એટલું શાહી રીતે ભર્યું કે દરેક વ્યક્તિના હોશ ઉડી ગયા. 1 નવેમ્બરની સાંજે યોજાયેલા આ મામેરા સમારોહમાં આરએલપી સુપ્રીમો અને નાગૌરના સાંસદ હનુમાન બેનીવાલ પણ ખાસ ઉપસ્થિત રહ્યા હતા.

1 કરોડ 56 લાખ રૂપિયા

બે મામાએ સંયુક્ત રીતે 1 કરોડ 56 લાખ રૂપિયા રોકડા તરીકે આપ્યા હતા! નોટોના બંડલોથી ભરેલી થાળીઓ જોઈને મહેમાનો આશ્ચર્યમાં પડી ગયા. થોડા સમયમાં આ સમાચાર સમગ્ર વિસ્તારમાં ફેલાઈ ગયા. લોકો કહેવા લાગ્યા કે આટલું મોટું મામેરું ફક્ત ભાગ્યશાળી ભાણાને જ મળે.

સવા કિલો ચાંદી

માત્ર રોકડ રકમ જ નહીં, મામાઓએ સવા કિલો ચાંદી અને 31 તોલા સોનું પણ આપ્યું હતું, જેની કિંમત અંદાજે 45 લાખ રૂપિયા જેટલી થાય છે. બંને ભાઈઓ JP કન્સ્ટ્રક્શન પ્રાઈવેટ લિમિટેડના ડિરેક્ટર છે અને આ તેમનો પરિવારનો પહેલો મામેરો હતો. તેઓએ જણાવ્યું કે, “આ ફક્ત દેખાડો નહોતો, પરંતુ અમારી બહેન અને તેના પરિવાર પ્રત્યેના પ્રેમ અને માનનો પ્રતિક હતો.”

આ પણ વાંચો : 'મેં તારા માટે મારી પત્નીને મારી નાખી..', ડોક્ટરે 3-4 મહિલાને કર્યા મેસેજ, મર્ડરની કહાની ખૌફનાક

આ શાહી મામેરાના ફોટા અને વીડિયો સોશિયલ મીડિયામાં વાયરલ થઈ ગયા છે. દરેક જગ્યાએ લોકો આ મામેરાની ચર્ચા કરી રહ્યા છે. ગામથી લઈને શહેર સુધી લોકો આ અનોખી ઉદારતા અને પરિવાર પ્રત્યેના પ્રેમને વખાણી રહ્યા છે. લોકો કહે છે કે આવા મામા દરેકને મળે – જે માત્ર પૈસા જ નહીં, પરંતુ પરંપરા, પ્રેમ અને સંબંધોની મજબૂતાઈનું પ્રતિક બને. બિકાનેરનો આ પ્રસંગ ફક્ત રાજસ્થાનની જ નહીં, પરંતુ સમગ્ર ભારતની સંસ્કૃતિ અને કુટુંબ પ્રત્યેના ભાવનાત્મક જોડાણનું અનોખું ઉદાહરણ બની ગયો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ