- કૃષિ કાયદાને લઈને કૃષિ મંત્રી નરેન્દ્ર સિંહ તોમરનું મોટું નિવેદન
- દેશમાં કૃષિ ક્ષેત્રમાં ખાનગી રોકાણ ઘણું ઓછું થયું
- અમે એક ડગલું પાછળ હઠ્યાં, હવે એક ડગલું આગળ વધીશું
કેન્દ્ર સરકાર દ્વારા રદ કરાયેલા ત્રણ વિવાદાસ્પદ કૃષિ કાયદાને લઈને ફરી સળવળ શરુ થઈ છે. શું મોદી સરકાર ફરી આ કાયદા લાવવાની તૈયારીમાં છે તેનો મોટો ઈશારો કેન્દ્રીય કૃષિ મંત્રી તોમરે કરી દીધો છે. તોમરે કહ્યું કે દેશમાં કૃષિ ક્ષેત્રમાં ખાનગી રોકાણ ઘણું ઓછું થયું છે. અમે કૃષિ સુધારા કાયદા લાવ્યા હતા પરંતુ કેટલાક લોકોને આ કાયદા પસંદ આવ્યા નહોતા. આઝાદીના 70 વર્ષ બાદ પ્રધાનમંત્રી મોદીની આગેવાની હેઠળ મોટા સુધારા કરાયા હતા પરંતુ સરકાર તેનાથી નિરાશ નથી. અમે એક ડગલું પાછળ હઠ્યાં અને અમે ફરી વાર આગળ વધીશું કારણ કે ખેડૂત ભારતની કરોડરજ્જુ છે. તેમણે કહ્યું કે કૃષિ ક્ષેત્રમાં મોટાપાયે ખાનગી રોકાણની જરુર છે.
.gif)
કૃષિ ક્ષેત્રમાં સૌથી ઓછું રોકાણ થયું છે-તોમર
તોમરે એવું કહ્યું કે એક ક્ષેત્ર જ્યાં સૌથી ઓછું રોકાણ થયું છે તે કૃષિ ક્ષેત્ર છે. બીજા ક્ષેત્રોમાં ખાનગી રોકાણ આવ્યું હતું જેને કારણે રોજગારી પેદા થઈ હતી અને જીડીપીમાં આ ઉદ્યોગોનું યોગદાન વધ્યું છે. તેમણે દાવો કર્યો કે આ ક્ષેત્રમાં હાલના રોકાણથી વેપારીઓને ફાયદો થાય છે ખેડૂતોને નહીં.
ઉલ્લેખનીય છે કે કેન્દ્ર સરકારે ત્રણ વિવાદાસ્પદ કૃષિ કાયદા રદ કરી દીધા છે પરંતુ હવે તોમરના આ નિવેદન બાદ ચર્ચા છેડાઈ છે કે શું મોદી સરકારે રદ કરવામાં આવેલા કૃષિ કાયદાને લઈને કંઈ નવાજુની કરવાની તૈયારીમાં છે.
કૃષિ ક્ષેત્રમાં ડ્રોનના ઉપયોગ માટે સ્ટાન્ડર્ડ ઓપરેટિંગ પ્રોસિજર જારી કરી
તોમરે કૃષિ ક્ષેત્રમાં ડ્રોનના ઉપયોગ માટે સ્ટાન્ડર્ડ ઓપરેટિંગ પ્રોસિજર (એસઓપી) જારી કરી હતી, જેમાં જંતુનાશકદવાનો છંટકાવ તેમજ અન્ય જમીન અને પાકના પોષક તત્વો માટે ડ્રોનનો ઉપયોગ સામેલ છે. તેમણે એક નિવેદનમાં જણાવ્યું હતું કે ડ્રોન ટેકનોલોજી અપનાવવી એ સમયની માંગ છે અને તેનાથી ખેડૂતોને ફાયદો થશે. કૃષિમાં ડ્રોનના ઉપયોગ માટે એસઓપી જારી કરતાં તોમરે કહ્યું હતું કે, 2014થી સરકારની નીતિઓનો ઉદ્દેશ 2022 સુધીમાં ખેડૂતોની આવક બમણી કરવાનો છે.
