દેશભરમાં મેડિકલમાં પ્રવેશ માટે નેશનલ ટેસ્ટિંગ એજન્સી (NTA) દ્વારા નેશનલ એલિજિબિલિટી કમ એન્ટ્રન્સ ટેસ્ટ લેવામાં આવે છે. ગુજરાતમાંથી અંદાજે 80 હજાર જેટલા વિદ્યાર્થીઓ અને દેશમાંથી 24 લાખથી વધુ વિદ્યાર્થીઓ પરીક્ષા આપનાર છે. દેશમાં નોંધાયેલા આંકડાની વાત કરવામાં આવે તો 3 લાખ જેટલા વિદ્યાર્થીઓનો વધારો થવા પામ્યો છે. ત્યારે ગત વર્ષે 21 લાખ જેટલા વિદ્યાર્થીઓ નોંધાયા હતા. જેમાંથી 20.87 લાખ જેટલા વિદ્યાર્થીઓએ પરીક્ષા આપી હતી. આજે બપોરે 2 થી 5:20 દરમ્યાન પરીક્ષા લેવામાં આવશે. ત્યારે પરીક્ષાર્થીઓએ દોઢ વાગ્યા સુધીમાં પરીક્ષા કેન્દ્ર પર પહોંચી જવાનું સૂચન કરવામાં આવ્યું છે.
ગુજરાતમાંથી 80 હજાર જેટલા વિદ્યાર્થીઓ નોંધાયા
NTA દ્વારા NEET-UG માં પ્રવેશ માટે દેશમાં કુલ 557 તેમજ દેશ બહારનાં કુલ 14 શહેરોમાં પરીક્ષા વ્યવસ્થા ગોઠવવામાં આવી છે. જેમાં ગુજરાતમાં અમદાવાદ, વડોદરા, રાજકોટ, સુરત, ભાવનગર, ગાંધીનગર તેમજ મહેસાણા સહિતનાં કુલ 31 શહેરોમાં પરીક્ષા લેવાશે. અમદાવાદમાં કુલ 21 સેન્ટર પર અંદાજે 9 હજાર જેટલા વિદ્યાર્થીઓ પરીક્ષા આપશે. ત્યારે ચાલુ વર્ષે ધો. 12 માં સાયન્યમાં બી ગ્રુપ સાથે પરીક્ષા આપનારા વિદ્યાર્થીઓ પૈકી સીબીએસઈ બોર્ડ સંલગ્ન સ્કૂલનાં તેમજ ગત વર્ષે જે વિદ્યાર્થીઓએ ઓછો સ્કોર મેળવ્યો હોય તે વિદ્યાર્થીઓ પણ રજીસ્ટ્રેશન કરાવતા હોય છે. ત્યારે ગુજરાતમાંથી 80 હજાર જેટલા વિદ્યાર્થીઓ નોંધાયા હોવાનું જાણવા મળી રહ્યું છે.
તમામ વિદ્યાર્થીઓને બાયોમેટ્રીક સાથે જ પ્રવેશ અપાશે
NEET-UG નાં આધારે ગુજરાતમાં મેડિકલ, ડેન્ટલની અંદાજે 12 હજારથી વધુ બેઠકોમાં વિદ્યાર્થીઓને પ્રવેશ અપાશે. ત્યારે દેશની વાત કરવામાં આવે તો 700 થી વધુ મેડિકલ અને 320 થી વધુ ડેન્ટલ કોલેજો સહિતને અંદાજે 2.10 લાખથી વધુ બેઠકોમાં પ્રવેશ માટે દર વર્ષે NTA દ્વારા NEET-UG ની પરીક્ષા લેવાય છે. ત્યારે તમામ વિદ્યાર્થીઓને પરીક્ષા કેન્દ્ર પર બાયોમેટ્રીક સાથે જ પ્રવેશ આપવામાં આવશે.
