પંજાબ / સિદ્ધુ મૂસેવાલા હત્યાકાંડમા પહેલી ધરપકડ, દિલ્હી પોલીસે તિહાર જેલમાં બંધ ગેંગસ્ટર લોરેન્સ બિશ્નોઈની ધરપકડ કરી

• પંજાબી સિંગર સિદ્ધુ મૂસેવાલાની હત્યા કેસમાં પહેલી ધરપકડ
• દિલ્હી પોલીસે જેલમાં બંધ ગેંગસ્ટર લોરેન્સ બિશ્નોઈને કસ્ટડીમાં લીધો
• મૂસેવાલાની હત્યામાં લોરેન્સ બિશ્નોઈનું નામ ઉછળ્યું છે
• દિલ્હી પોલીસે કહ્યું- લોરેન્સ બિશ્નોઈની કડકાઈથી પૂછપરછ થશે 

દિલ્હી પોલીસની સ્પેશિયલ સેલે પંજાબી સિંગર સિદ્ધુ મુસેવાલા હત્યા કેસમાં તિહાર જેલમાં બંધ લોરેન્સ બિશ્નોઇને કસ્ટડીમાં લીધો છે. મુસેવાલાની હત્યામાં લોરેન્સ બિશ્નોઈનું નામ ઉછળતા તેની પોલીસે જેલમાંથી ધરપકડ કરી છે. હાલમાં બિશ્નોઈ તિહાર જેલમાં કેદ છે અને તેને પોલીસ એન્કાઉન્ટરનો ડર સતાવી રહ્યો છે અને તેણે હાઈકોર્ટમાં અરજી પણ કરી છે. દિલ્હી પોલીસની સ્પેશિયલ સેલે લોરેન્સને પાંચ દિવસની કસ્ટડીમાં લીધો છે. આરોપ છે કે સિદ્ધુ મૌસેવાલાની હત્યાનું ષડયંત્ર ગેંગસ્ટર લોરેન્સ બિશ્નોઇ અને ગોલ્ડી બ્રારે રચ્યું હતું.

મનપ્રીત સિંહની પણ ધરપકડ 
મુસેવાલા હત્યા કેસમાં ઉત્તરાખંડથી ધરપકડ કરાયેલા મનપ્રીત સિંહની હવે પંજાબ પોલીસે ઔપચારિક ધરપકડ કરી લીધી છે. મનપ્રીતસિંહને કોર્ટમાં રજૂ કરી પાંચ દિવસના પોલીસ રિમાન્ડ પર મોકલી આપવામાં આવ્યો છે. તે જાણીતા ડ્રગ ડીલર હોવાનું કહેવાય છે. મનપ્રીતની સૌથી પહેલા હથિયાર સંબંધિત ગુના, હત્યાનો પ્રયાસ, હુલ્લડ, ગેરકાયદેસર રીતે ભેગા થવા બદલ ધરપકડ કરવામાં આવી હતી.

લોરેન્સ બિશ્નોઈએ હાઈકોર્ટમાં અરજી કરીને સુરક્ષા વધારવાની કરી માગ 
આ પહેલા તિહાર જેલમાં બંધ ગેંગસ્ટર લોરેન્સ બિશ્નોઈના વકીલ પટિયાલા કોર્ટમાં અરજી દાખલ કરી ચૂક્યા છે. અરજીમાં વકીલે લોરેન્સની સુરક્ષા વધારવાની માંગ કરતા કહ્યું કે, જેલમાં લોરેન્સ બિશ્નોઈના જીવને ખતરો છે. વકીલે કહ્યું કે એવી આશંકા છે કે પંજાબ પોલીસ જેલમાં લોરેન્સનો સામનો કરી શકે છે અથવા હરીફ ગેંગ લોરેન્સ પર હુમલો કરી શકે છે, તેથી તેની સુરક્ષા વધારવામાં આવી શકે છે.

તિહાર જેલમાં મૂસેવાલાની હત્યાનું કાવતરુ ઘડાયું- પોલીસનો આરોપ 
પોલીસને જાણવા મળ્યું છે કે મૂસેવાલા હત્યા કેસની યોજના તિહાર જેલમાં કરવામાં આવી હતી. આ હુમલાની જવાબદારી પંજાબ સ્થિત ગેંગસ્ટર લોરેન્સ બિશ્નોઈ ગેંગના ફેસબુક પેજ પર લેવામાં આવી હતી. એવું કહેવામાં આવતું હતું કે લોરેન્સ અને તેનો ભાઈ ગોલ્ડી બ્રાર સિદ્ધુની હત્યાની જવાબદારી લે છે.

લોરેન્સ બિશ્નોઇએ સિદ્ધુની હત્યા કેમ કરાવી?

આ પાછળનું કારણ વિકી મિદ્દુખેડા હત્યા 7 ઓગસ્ટ 2021ના રોજ થઈ હોવાનું કહેવાય છે, જેનો બદલો લેવા બિશ્નોઈ ગેંગ ઈચ્છતી હતી. વિકી લોરેન્સની નજીક હતો. દવિન્દર બામ્બિહા ગેંગે તેની હત્યા કરી હતી. આરોપ છે કે મિદ્દુખેડા હત્યાકાંડમાં સામેલ શૂટરોને મુસેવાલાએ આશરો આપ્યો હતો, જેનો બદલો બિશ્નોઈ ગેંગે લીધો હતો.