પેટલાદનો રણસંગ્રામ / MLA નિરંજન પટેલનું પત્તું કપાતા દોષનો ટોપલો ભરતસિંહ સોલંકી પર ઢોળ્યો, કહ્યું મારી ટિકિટ કાપી

• ભરતસિંહ સોલંકી પર કોંગ્રેસના ધારાસભ્ય નિરંજન પટેલનો આક્ષેપ
• કોંગ્રેસમાંથી રાજીનામું આપી લગાવ્યા આક્ષેપ
• ભરતસિંહ સોલંકીની પ્રતિક્રિયા

કોંગ્રેસ અને વિવાદ એક બીજાના પર્યાય બની ગયા હોય તેમ ચુંટણી ટાણે પણ કોંગ્રેસમાં વિવાદ અટકવાનું નામ લેતો નથી. તેવામાં ધારાસભ્ય નિરંજન પટેલે ગઇકાલે  કોંગ્રેસમાંથી રાજીનામું આપ્યું હતું. ત્યારબાદ ભરતસિંહ સોલંકી પર દોષનો ટોપલો ઢોળ્યો હતો અને આરોપ લગાવ્યા હતા અને કહ્યું હતું કે ભરતસિંહ સોલંકીને કારણે મારી ટિકિટ કપાઈ છે. મને છેલ્લી ઘડી સુધી ટિકિટ આપવાનું કોંગ્રેસે આશ્વાસન આપ્યું હતું ત્યારબાદ ભરતસિંહ સોલંકીએ ચૂંટણી લડવા મારી ટિકિટ કાપી હોવાનો નિરંજન પટેલે વસવસો વ્યકત કર્યો હતો. 

મને છેલ્લી સમય સુધી ટિકિટ આપવાનું કોંગ્રેસે આપ્યું હતું આશ્વાસન: નિરંજન પટેલ
એટલુ જ નહિ જ સુરક્ષિત બેઠકને લઇ ભરતસિંહ અહીં ચૂંટણી લડવા માંગતા હોવાના નિરંજન પટેલએ આક્ષેપ કર્યા છે.  તેમણે કહ્યું કે પેટલાદમાં કોંગ્રેસને  મજબૂત બનાવવામાં મારુ મોટું યોગદાન છે. છતાં કોંગ્રેસે મારી ટિકિટ કાપી હોવાનો નિરંજન પટેલએ ઉલ્લેખ કર્યો હતો. તેમણે કહ્યું કે ટીકીટ નહી મળે તેવુ પહેલા જ કહી દીધુ હોય તો આ પરિસ્થિતિનું નિર્માણ ન થયું હોત. એટલુ જ નહિ આજ દિન સુધી મારી ઉપર કાળી ટીલી લાગી નથી. 

આ મારો કોંગ્રેસ પરિવારનો મામલો છે: ભરતસિંહ
ભરતસિંહ સોલંકીને કારણે મારી ટિકિટ કપાઈ હતી તેવા નિરંજન પટેલના આક્ષેપ અને રાજીનામાને લઈને કોંગ્રેસ નેતા ભરતસિંહ સોલંકીની પ્રતિક્રિયા સામે આવી છે.  જેમાં તેમણે કહ્યું કે નિરંજન પટેલ વડીલ છે તેમની લાગણી દુભાઈ છે. મેં જાતે પણ હાઇકમાન્ડને તેમના નામની ભલામણ કરી હતી. પરતું આ મારો કોંગ્રેસ પરિવારનો મામલો છે.

ટિકિટ કપાતા નારાજ થયેલા નિરંજન પટેલે આપ્યું હતું રાજીનામું
કોંગ્રેસના ઉમેદવારોની છેલ્લી યાદી જાહેર થયા બાદ આણંદના પેટલાદ બેઠક પર કોંગ્રેસમાં રોષ ફેલાયો હતો. જેમાં ટીકિટ કપાતા ગઈકાલે જ નારાજ ધારાસભ્ય નિરંજન પટેલએ રાજીનામું ધરી દીધું હતું. કોંગ્રેસે ટીકિટ કાપતા સોશિયલ મીડિયામાં રાજીનામાંની પોસ્ટ વાયરલ કરી હતી. અત્રે ઉલ્લેખનીય છે કે અગાઉ નિરંજન પટેલ ભાજપમાં જોડાવાની ચર્ચાઓ ચાલી હતી. જોકે આ અંગે કોઈ ખુલાશો કર્યો નથી.