T20 વર્લ્ડ કપ 2024 માટે ભારતીય ટીમની જાહેરાત કરી દેવામાં આવી છે. 30 એપ્રિલે BCCIએ ટીમના 15 ખેલાડીઓના નામ જાહેર કર્યા હતા. આ સાથે ચાર ટ્રાવેલિંગ રિઝર્વની પણ પસંદગી કરવામાં આવી છે. ટીમની જાહેરાત થયા બાદ IPLમાં બે મેચ રમાઈ છે. જેમાં T20 વર્લ્ડ કપ રમવા જઈ રહેલા 7 ખેલાડીઓ મેદાન પર જોવા મળ્યા હતા. જેમાં કેપ્ટન રોહિત શર્મા અને ત્રણ મુખ્ય ઓલરાઉન્ડર હાર્દિક પંડ્યા, શિવમ દુબે અને રવિન્દ્ર જાડેજાનો સમાવેશ થાય છે. એવામાં ચાલો જાણીએ એ ખેલાડીઓએ એમના છેલ્લા મેચમાં કેવું પ્રદર્શન કર્યું છે.
રોહિત શર્મા- 4 રન
રોહિત શર્મા લખનૌ સુપર જાયન્ટ્સ સામે માત્ર ચાર રન બનાવીને આઉટ થયો હતો. મોહસીન ખાને રોહિતની વિકેટ લીધી હતી. IPL 2024માં શાનદાર શરૂઆત કરનાર રોહિત ત્રણ મેચમાં ડબલ ફિગરને સ્પર્શી શક્યો નથી.
અર્શદીપ સિંહ- 4 ઓવરમાં 52 રન
અર્શદીપ સિંહ T20 વર્લ્ડ કપમાં ડેથ ઓવરોમાં પણ બોલિંગ કરશે. પરંતુ વર્લ્ડકપની ટીમમાં જગ્યા મળ્યા બાદ ચેન્નાઈ સામે મેદાનમાં ઉતરેલા અર્શદીપ સિંહે 4 ઓવરમાં 52 રન આપ્યા હતા. તેણે છેલ્લી બે ઓવરમાં 5 વાઈડ બોલ ફેંક્યા હતા.
સૂર્યકુમાર યાદવ – 6 બોલમાં 10 રન
સૂર્યકુમાર યાદવે 6 બોલમાં 10 રન બનાવ્યા હતા. સૂર્યા આઉટ થયો એને થોડો કમનસીબ ગણી શકાય કારણ કે બોલ લેગ સ્ટમ્પની બહાર ગયો અને તેના ગ્લોવ્ઝને અથડાયા બાદ વિકેટકીપર પાસે ગયો. તે પહેલા સૂર્યા સારા ફોર્મમાં દેખાતો હતો. શરૂઆતમાં આવીને તેને સિક્સર પણ ફટકારી હતી.
જસપ્રીત બુમરાહ- 4 ઓવરમાં 17 રન
જસપ્રીત બુમરાહે 4 ઓવરમાં માત્ર 17 રન આપ્યા પરંતુ તે કોઈ વિકેટ લઈ શક્યો નહતો. લખનૌના બેટ્સમેનોએ તેમની સામે સતત ડિફેન્ડિંગ શોટ રમ્યા જેના કારણે તેમને વિકેટ લેવાની તક મળી ન હતી.
રવિન્દ્ર જાડેજા- 2 રન અને 0 વિકેટ
રવીન્દ્ર જાડેજા T20 વર્લ્ડ કપમાં ભારતનો મુખ્ય ઓલરાઉન્ડર હશે. તેની પાસે મેચ ફિનિશ કરવાની જવાબદારી પણ રહેશે. ચેન્નાઈ માટે ચોથા નંબરે આવતા જાડેજાએ 2 રનનું યોગદાન આપ્યું હતું. ત્યારબાદ તે બોલિંગની 3 ઓવરમાં 22 રન આપીને કોઈ વિકેટ લઈ શક્યો નહોતો.
હાર્દિક પંડ્યા - 0 રન અને બે વિકેટ
હાર્દિક પંડ્યા લખનૌ સામે ગોલ્ડન ડક બન્યો હતો. નવીન ઉલ હકે તેની વિકેટ લીધી હતી. જોકે, હાર્દિકે કેએલ રાહુલ અને દીપક હુડાને 4 ઓવરના સ્પેલમાં 26 રન પર આઉટ કર્યા હતા.
શિવમ દુબે- 0 રન અને એક વિકેટ
IPLમાં તેની તોફાની બેટિંગના કારણે શિવમ દુબેને T20 વર્લ્ડ કપની ટીમમાં જગ્યા મળી હતી. પરંતુ ટીમમાં આવ્યા બાદ તે સ્પિન સામે ગોલ્ડન ડક બની ગયો હતો. સિઝનમાં પ્રથમ વખત બોલિંગ કરતા, તેણે પ્રથમ ઓવરમાં વિકેટ લીધી પરંતુ તે જ ઓવરમાં 14 રન પણ આપ્યા હતા.
