આકરાપાણીએ / માફી માંગો નહીંતર 5 કરોડનો માનહાનિનો કેસ કરીશ: ગેનીબેન ઠાકોરે SP-DYSP, BJP નેતાને આપી નોટિસ, જાણો શું છે વિવાદ

 

• બનાસકાંઠામાં દારૂ પકડવાનાં મામલો 
• MLA ગેનીબેન ઠાકોરની નોટિસ
• માંફી માંગવા આપી નોટિસ 
• 30 હજારનું વળતર ચૂકવવાં નોટિસ

બનાસકાંઠા દારૂ પ્રકરણમાં વાવના કોંગ્રેસના ધારાસભ્ય ગેનીબેન ઠાકોરે બનાસકાંઠા SP, DySP, કોન્સ્ટેબલ અને ભાભર શહેર ભાજપ પ્રમુખને વકીલ મારફતે નોટિસ ફટકારી છે. જેમાં ગેનીબેન ઠાકોરે પોલીસ અધિકારી સહિત ભાજપ પ્રમુખને માફી માંગવા જણાવવામાં આવ્યું છે. 10 પાનાની નોટિસમાં જુદા-જુદા 13 મુદ્દાઓનો ઉલ્લેખ કરવામાં આવ્યો છે. નોટિસમાં ઉલ્લેખ કરાયો છે કે ત્રણ દિવસમાં નોટિસનો જવાબ આપવામાં નહીં આવે તો 5 કરોડનો માનહાનિનો દાવો કરવામાં આવશે.

દારૂ પ્રકરણમાં ગેનીબેન આકરા પાણીએ
વાવના કોંગ્રેસના ધારાસભ્ય ગેનીબેન ઠાકોરના ભાઈ રમેશભાઈ ઠાકોરને દારૂ પીધેલી હાલતમાં બે બોટલ સાથે પોલીસે ઝડપી પાડ્યા હતા.  આ ઘટના બાદ ગેનીબેન ઠાકોરે વકીલ મહેશ મુલાણી મારફતે જિલ્લા એસપી અક્ષયરાજ મકાવાણા, દિયોદરના ડીવાયએસપી ડી.ટી.ગોહિલ, એલસીબી કોન્સ્ટેબલ પ્રકાશભાઈ ચૌધરી અને શહેર ભાજપ પ્રમુખ અમરતભાઈ માળીને નોટિસ પાઠવી છે. 

એસપી, ભાભર શહેર ભાજપ પ્રમુખને પાઠવી નોટિસ
આ તમામને પાઠવવામાં આવેલી નોટિસમાં જુદા-જુદા 13 મુદ્દાનો ઉલ્લેખ કરવામાં આવ્યો છે. નોટિસમાં જણાવ્યા મુજબ "ફરિયાદમાં MLA ગેનીબેના ભાઈ તરીકેનો ઉલ્લેખ ન હોવા છતાં આ તમામે મીડિયા સમક્ષ આપેલા નિવેદનમાં વાવ MLA ગેનીબેન ઠાકોરના ભાઈ શબ્દ વારંવાર ઉચ્ચારી તેમની બદનક્ષી કરી છે. જેથી પ્રાથમિક તબક્કે દરેકની વિરુદ્ધ માનહાનિના વળતર સ્વરૂપે પાંચ કરોડનો દાવો કરવા કટિબદ્ધ છીએ.'' આ નોટિસ મળ્યાના 30 દિવસમાં માંફી માંગી 30 હજારનું વળતર ચૂકવવાનો નોટિસમાં ઉલ્લેખ કરાયો છે.

માનહાનિના દાવાનો કરાયો ઉલ્લેખ
ગેનીબેને નોટિસમાં પોતાની રાજકિય કારકિર્દીને નુકસાન થયાનો પણ ઉલ્લેખ કરાયો છે. સાથે 3 દિવસમાં નોટિસનો જવાબ નહીં આપવામાં આવે તો 5 કરોડ રૂપિયાની માનહાનિનો કરવામાં આવશે તેવો પણ ઉલ્લેખ કરાયો છે.