શ્રદ્ધા કે અંધશ્રદ્ધા / લો બોલો ! વરસાદના ફાંફા અને અહીં બે સગીર છોકરાના લગ્નથી માન્યા મેઘરાજા ! અડધો કલાકમાં પાણી-પાણી

• કર્ણાટકના ચિકમંગલુરુમાં ઈન્દ્ર દેવતાને રિઝવવા કરાયા છોકરાના લગ્ન
• છોકરાના લગ્નના અડધો કલાકમાં પડ્યો વરસાદ-ગામલોકોનો દાવો 
• વિજાતિયની જેમ જ કરાયા સજાતિય લગ્ન 

હાલના મેઘરાજાએ રીસામણા લીધા છે. છેલ્લા એક મહિનાથી વરસાદનું એક ટીંપું પણ પડ્યું નથી. ખેતરમાં ઊભેલો પાક સુકાવા લાગ્યો છે અને હવે જો તાત્કાલિક વરસાદ નહીં પડે તો માઠી દશા થવાની નક્કી છે. આવી સ્થિતિમાં એક અજીબ ઘટનાથી વરસાદ આવ્યો હોવાનો દાવો થયો છે. વરસાદના દેવતાને રીઝવવા માટે બે સગીર છોકરાના લગ્ન કરાવાયા અને ગામલોકોનો દાવો છે કે લગ્નના થોડા સમય બાદ વરસાદ વરસ્યો હતો. 

છોકરાના લગ્ન બાદ અડધો કલાકમાં પડ્યો વરસાદ 
કર્ણાટકના એક ગામમાં એક અજીબોગરીબ કિસ્સો સામે આવ્યો છે. ગામના લોકોએ વરસાદના દેવતા (ઈન્દ્ર દેવતા) ને ખુશ કરવા માટે બે સગીર છોકરાઓના લગ્ન કરાવ્યા. વરસાદ નહીં પડે અને બાજરીનો પાક બગડશે તેથી ગામલોકો ચિંતિત હતા. ગ્રામજનોના જણાવ્યા મુજબ વરસાદ માટે દેવતા ખુશ રહે તે જરૂરી છે. દેવતાઓ પ્રસન્ન હોય તો વરસાદ પડવાની શક્યતા રહે છે. આનાથી તેમનો પાક ખરાબ નહીં થાય. મીડિયા રિપોર્ટ્સ અનુસાર ગામના લોકોનો દાવો છે કે જેવા અમે સગીર છોકરાઓના લગ્ન કરાવ્યા કે ગામમાં અડધા કલાકમાં જ વરસાદ પડ્યો હતો. 

ચિકકાબલ્લાપુરમાં બે છોકરાના લગ્ન  
છેલ્લા ત્રણ દિવસમાં ચિકકાબલ્લાપુર જિલ્લામાં સગીર છોકરાઓના લગ્નના બે કિસ્સા નોંધાયા છે. દેવતાઓને ખુશ કરવા માટે પૂનમના દિવસે ગામના લોકોએ બે સગીર છોકરાઓ સાથે જ લગ્ન કરી લીધા. 

વિજાતિય લગ્નની જેમ જ થયા સજાતિય લગ્ન 
લગ્ન માટે જે બે છોકરાની પસંદગી કરવામાં આવી હતી તે બન્ને પાંચમા ધોરણમાં ભણે છે. એક લઘુમતી સમુદાયનો છે જેને 'વરરાજા' બનાવવામાં આવ્યો હતો. બીજા છોકરા, જે દલિત સમુદાયનો છે, તેને 'દુલ્હન' બનાવાઈ હતી. આ લગ્ન માટે ગામભરના લોકો ભેગા થયા હતા અને મંગળસૂત્ર બાંધવા સહિતની તમામ વિધિ સંપન્ન થઇ હતી. બાદમાં વર-વધૂની આરતી ઉતારી તેમને ભેટ આપવામાં આવી હતી.