રાજકોટ: લોકસભાની ચૂંટણી માટે રાજ્યમાં તમામ 26 બેઠક પર 7 મેના રોજ મતદાન થવાનું છે, ત્યારે ગુજરાતની સૌથી ચર્ચિત રાજકોટ લોકસભા બેઠકને લઈ મોટા સમાચાર સામે આવ્યા છે. રાજકોટની લોકસભા બેઠક પર ભાજપના ઉમેદવાર પરષોત્તમ રૂપાલાએ રાજકોટમાં એક બેઠકનું આયોજન કર્યું હતું. આ બેઠકમાં લોકસભાની ચૂંટણીને લઈને ચર્ચા કરી છે. આ બેઠકમાં પરષોત્તમ રૂપાલાએ લેઉઆ પાટીદાર અને ક્ષત્રિય આગેવાનો સાથે ચર્ચા કરી. સાથે જ તેમણે ઉધોગપતિઓ અને વેપારી અગ્રણીઓ સાથે પણ બેઠક કરી છે.
નિર્ણાયક મતદારોને સાધવા કરી બેઠક
રાજ્યમાં લોકસભા ચૂંટણીના મતદાનને આડે માત્ર 5 દિવસ બાકી છે, ત્યારે કોંગ્રેસ અને ભાજપે જીત માટે એડિચોટીનું જોર લગાવવું શરૂ કર્યું છે. જે અંતર્ગત રાજકોટ બેઠકના ભાજપના ઉમેદવાર પરષોત્તમ રૂપાલાએ ક્ષત્રિય અને લેઉવા પટેલ અગ્રણીઓ સાથે બેઠક કરી છે. તેમણે ઉદ્યોગપતિઓ અને વેપારી અગ્રણીઓ સાથે પણ બેઠક કરી છે. જેમાં લોકસભા ચૂંટણી અંગે ચર્ચા કરવામાં આવી છે. આ બેઠકમાં વાંકાનેરના રાજવી અને સાંસદ કેસરીદેવસિંહ ઝાલા અને રાજકોટ લોધીકા સંઘના ચેરમેન નરેન્દ્રસિંહ જાડેજા પણ ઉપસ્થિત રહ્યા હતા. ઉલ્લેખનીય છે કે, કોંગ્રેસે રાજકોટ બેઠક પર લેઉવા પટેલ સમાજમાંથી આવતા પરેશ ધાનાણીને ટિકિટ આપી છે. મહત્ત્વનું છે કે આ બેઠક પર લેઉવા પટેલ મતદારો નિર્ણયક મતદારો છે.
બેઠકમાં જાણીતા ઉદ્યોગપતિઓ રહ્યા હાજર
રાજકોટ લોકસભા બેઠક પર ભાજપના ઉમેદવાર પરષોતમ રૂપાલા કડવા પાટીદાર છે જયારે કોંગ્રેસે આ જ બેઠક પરથી લેઉવા પટેલ સમાજમાંથી આવતા પરેશ ધાનાણીને ટિકિટ આપી છે. ત્યારે નિર્ણાયક મતદારોને પોતાની તરફ ખેંચવાનો પ્રયાસ કરવાના ભાગ રૂપે પરષોતમ રૂપાલાએ આ બેઠક કરી હતી. આ બેઠકમાં જાણીતા ઉદ્યોગપતિઓ પણ હાજર રહ્યા હતા. મહત્ત્વનું છે કે ક્ષત્રિયો પરના નિવેદન બાદ પરષોતમ રૂપાલાનો વિરોધ થઈ રહ્યો છે. ત્યારે પરષોતમ રૂપાલાએ આ અંગે ક્ષત્રિય સમાજની વારંવાર માફી પણ માંગી છે.
વધુ વાંચો: PM મોદી ગુજરાતની મુલાકાતે: આજે પ્રચારનો બીજો દિવસ, એક જ દિવસમાં સંબોધશે 4 લોકસભા
ઉલ્લેખનીય છે કે મતદાન પહેલા જ પરષોતમ રૂપાલા અને પરેશ ધાનાણીની ચૂંટણી પંચે નોટિસ આપી છે. ચૂંટણી પંચે બંને ઉમેદવારો પાસેથી ચૂંટણી ખર્ચની વિગતો માંગી હતી. બંને ઉમેદવારોએ ચૂંટણી ખર્ચનો હિસાબ સમયસર રજૂ ન કરતા ચૂંટણી પંચે તેમને નોટિસ ફટકારી છે. ભાજપ અને કોંગ્રેસના ઉમેદવારોએ ચૂંટણી ખર્ચનો હિસાબ રજૂ કરવા માટે સમયની માંગ કરી હતી.
