- ભાજપ નેતા સોનાલી ફોગાટ મોત કેસની CBI તપાસ
- કેન્દ્રીય ગૃહમંત્રાલયે આપી મંજૂરી
- ગોવાના સીએમ પ્રમોદ સાવંતે ગૃહમંત્રાલયને કરી હતી ભલામણ
- સીએમની ભલામણ સ્વીકારી લઈને મંત્રાલયે આપ્યો ઓર્ડર
- ભાજપ નેતા સોનાલી ફોગાટનું મોત 23 ઓગસ્ટે ગોવાની હોટલમાં થયું હતું
ગોવાની હોટલમાં 23 ઓગસ્ટ 2022ના દિવસે હરિયાણાની મહિલા ભાજપ નેતા સોનાલી ફોગાટના થયેલા સંદિગ્ધ મોત કેસની તપાસ સીબીઆઈને સોંપાઈ છે. કેન્દ્રીય ગૃહમંત્રાલયે ગોવાના સીએમ પ્રમોદ સાવંતની સીબીઆઈ તપાસની ભલામણને સ્વીકારી લઈને સીબીઆઈને આ કેસની તપાસનો આદેશ આપ્યો છે. સોનાલીની 15 વર્ષીય પુત્રી યશોધરા ફોગાટે પણ તેની માતાની સીબીઆઈ તપાસ કરાવવાનો વારંવાર આગ્રહ સેવ્યો હતો, કેન્દ્ર સરકારે યશોધરા અને ગોવાના સીએમની માગને સ્વીકારી લઈને આ કેસ હવે સીબીઆઈને સોંપી દીધો છે.
સોનાલીની પુત્રી યશોધરાએ સીબીઆઈ તપાસની માગ કરી હતી
ઉલ્લેખનીય છે કે સોનાલી ફોગાટની એકમાત્ર 15 વર્ષીય પુત્રી યશોધરા ફોગાટે તેની માતાના મોત કેસની તપાસ સીબીઆઈ પાસે કરાવવાનું સરકારને વારંવાર જણાવ્યું હતું. યશોધરાનું કહેવું હતું કે સરકાર આ મામલે યોગ્ય તપાસ કરી રહી નથી અને આથી તેને માતાને ન્યાય મળવો જોઈએ.
ગોવા પોલીસ પણ કરી રહી છે સોનાલી ફોગાટ મોત કેસની તપાસ
ગોવાના મુખ્યમંત્રી પ્રમોદ સાવંતે ભાજપ નેતા અને ટિકટોક સ્ટાર સોનાલી ફોગાટના મોત મામલે CBI તપાસની ભલામણ કરી હતી.. સોનાલી ફોગાટની ગોવામાં એક રિસોર્ટમાં પાર્ટી ખતમ થયા બાદ મોત થઈ ગયું હતું. સોનાલી ફોગાટના પરિવારના લોકો સતત આ મામલે સીબીઆઈની તપાસની માગ કરી રહ્યા હતા. હરિયાણા સરકારે પણ પરિવારની માગનું સમર્થન કર્યું હતું. ગોવા સીએમ પ્રમોદ સાવંતે કહ્યું કે, સોનાલી ફોગાટ પર ગોવા પોલીસ યોગ્ય તપાસ કરી રહી છે. પોલીસને કેટલીય મહત્વની કડીઓ મળી છે. પણ સોનાલી ફોગાટના પરિવારની સોનાલાની દિકરીની ડિમાન્ડ છે કે આ મામલે સીબીઆઈ તપાસ કરે. ત્યારે આવા સમયે આજે આ કેસ સીબીઆઈને આપવાની ભલામણ કરી છે. હું ખુદ ગૃહમંત્રીને પત્ર લખીને માગ કરી રહ્યો છું કે, આ મામાલામાં સીબીઆઈ તપાસ થવી જોઈએ.
23 ઓગસ્ટે ગોવાની હોટલમાં સોનાલી મૃત મળી આવી હતી
ગોવાના કર્લીજ રેસ્ટોરંટમાં સોનાલી ફોગાટનું 23 ઓગસ્ટના રોજ મોત થઈ ગયું હતુ. સોનાલી ફોગાટના મોત મામલે પરિવાર તરફથી સતત સીબીઆઈની તપાસની માગ થઈ રહી છે. પરિવારનો આરોપ છે કે, ગોવા પોલીસ આ મામલે યોગ્ય તપાસ કરી રહી નથી. સોનાલી ફોગાટના ભત્રીજા વિકાસ સિંઘમારે હાલમાં જ આરોપ લગાવ્યો હતો કે, ગોવા પોલીસ પર રાજકીય પ્રેશર છે. એટલા માટે આ મામલાની તપાસ સીબીઆઈને સોંપી દેવી જોઈએ.
