- ગુજરાત પોલીસ વ્યાજખોરો સામે એક્શન મોડમાં
- વડોદરા, સુરત અને રાજકોટમાં વ્યાજખોરોની ધરપકડ
- લાયસન્સ વગર નાણાં ધીરનાર સામે કાર્યવાહી
- વડોદરામાં વિજય ભરવાડની પાસા હેઠળ અટકાયત
- સુરતમાં મજબુર લોકોને હેરાન કરતા 14 વ્યાજખોરોની ધરપકડ
ગુજરાતમાં અનેકવાર વ્યાજખોરોના ત્રાસની આપઘાતની ઘટના સામે આવે છે. આ તરફ હવે ગુજરાત પોલીસ પણ વ્યાજખોરો સામે એક્શન મોડમાં આવી છે. વાત જાણે એમ છે કે, વડોદરા, સુરત અને રાજકોટમાં વ્યાજખોરો સામે કાર્યવાહી હાથ ધરી તેમની ધરપકડ કરવામાં આવી છે. જેમાં વડોદરામાં 1, સુરતમાં 14 અને રાજકોટમાં પણ અનેક વ્યાજખોરોની ધરપકડ કરવામાં આવી છે.
વડોદરામાં પોલીસે વ્યાજખોરો સામે કડક કાર્યવાહી શરૂ કરી છે. જેમઆ લાયસન્સ વગર નાણાં ધીરનાર વિજય ભરવાડની ફતેગંજ પોલીસે પાસા હેઠળ અટકાયત કરી રાજકોટ જેલમાં મોકલાયો છે .આરોપીએ ફરિયાદી પાસેથી 29 હજાર 500 સામે રૂપિયા 85 હજાર 400 વસૂલ્યા હતા. આ સાથે બે ગણા રૂપિયા વસૂલ્યા બાદ પણ આરોપીએ ફરિયાદીના પુત્રને ગોંધી રાખ્યો હતો. આ સાથે ફરિયાદીના આધારકાર્ડ અને ફોટોગ્રાફ લઈ કોર્ટમાં જઈ બાંહેધરી કરાવી હોવાનું સામે આવ્યું છે.
.jpg)
સુરતમાં વ્યાજખોરો સામે સચિન અને GIDC પોલીસની ટીમે કાર્યવાહી કરી છે. વિગતો મુજબ પોલીસે 14 વ્યાજખોરોની ધરપકડ કરી છે. જેમાં શ્રમજીવી, નાના ધંધા સાથે સંકળાયેલા વેપારીઓને ઊંચા વ્યાજે નાણાં આપી રંજાડતા શખ્સો ઝડપાયા છે. GIDC વિસ્તારમાંથી 11 અને સચિન વિસ્તારમાંથી 3 વ્યાજખોરોની ધરપકડ કરી પોલીસે વ્યાજખોરો વિરુદ્ધ ગુનો નોંધી કાયદેસરની કાર્યવાહી હાથ ધરી છે.
આ તરફ રાજકોટમાં પણ વ્યાજખોરો વિરુદ્ધ પોલીસની કાર્યવાહી સામે આવી છે. જેમાં DCP ઝોન 1ના વિસ્તારમાં વ્યાજખોરીના 7 ગુના નોંધાયા છે. આ સાથે મની લેન્ડ એક્ટ સહિતની કલમ હેઠળ ગુના નોંધાયા છે. વિગતો મુજબ ભક્તિનગર પોલીસ સ્ટેશનમાં 4, બી-ડિવિઝન પોલીસમાં 2 કેસ, થોરાળા પોલીસ સ્ટેશનમાં નોંધાયો 1 ગુનો નોંધાયો છે. મહત્વનું છે કે, 31 જાન્યુઆરી સુધી વ્યાજખોરો સામે પોલીસની સ્પેશિયલ ડ્રાઇવ છે. જેમાં ગેરકાયદેસર રીતે નાણાં વ્યાજે આપનારા, ખોટી રીતે રંજાળનાર શખ્સો સામે કડક કાર્યવાહી હાથ ધરવામાં આવશે. આ સાથે ભોગ બનનારા લોકોને ભય મુક્ત કરાવવા લોક દરબારનું આયોજન કરાશે.
