- સનરાઈઝર્સ હૈદરાબાદ ટીમ પોઈન્ટ ટેબલમાં 10મા સ્થાને
- ભારતીય બેટ્સમેન પણ સતત બીજી મેચમાં ફ્લોપ રહ્યો
- ખરાબ પ્રદર્શનને કારણે તેને ટીમ ઈન્ડિયામાંથી રજા આપવામાં આવી હતી
IPL 2023ના ઓક્શનમાં સનરાઈઝર્સ હૈદરાબાદ સૌથી વધુ સેલેરી પર્સ સાથે મેદાનમાં ઉતરી હતી અને પોતાની બેટિંગને મજબૂત કરવા માટે મોટી રકમ ખર્ચી હતી. પણ અત્યાર સુધી હજુ ફ્રેન્ચાઈઝીને તેનો લાભ મળ્યો નથી. જણાવી દઈએ કે સનરાઈઝર્સ હૈદરાબાદ ટીમ પોઈન્ટ ટેબલમાં 10મા સ્થાને છે અને પહેલી બંને મેચ પણ હારી ચૂકી છે. નોંધનીય છે કે એક દિવસ પહેલા જ લખનૌ સુપર જાયન્ટ્સે હૈદરાબાદને 5 વિકેટે સરળતાથી હરાવ્યું હતું.
એ મેચમાં સનરાઇઝર્સ હૈદરાબાદ લખનૌ સુપર જાયન્ટ્સ સામે પહેલા બેટિંગ કરી રહ્યું અને ટીમે 20 ઓવરમાં 121 રન જ બનાવી શકી હતી. કેએલ રાહુલની કપ્તાનીમાં લખનૌની ટીમે 5 વિકેટ ગુમાવીને એ રન કરી લીધા હતા. જોવા મળ્યું છે કે આ સિઝનમાં સનરાઇઝર્સ હૈદરાબાદની બેટિંગ અત્યાર સુધી નિષ્ફળ રહી છે. એવામાં એક અનુભવી ભારતીય બેટ્સમેન પણ સતત બીજી મેચમાં ફ્લોપ રહ્યો હતો.
નોંધનીય છે કે આ ખેલાડીના ખરાબ પ્રદર્શનને કારણે તેને ટીમ ઈન્ડિયામાંથી રજા આપવામાં આવી હતી અને આ ખેલાડીને BCCIના સેન્ટ્રલ કોન્ટ્રાક્ટ લિસ્ટમાંથી પણ કાઢી નાખવામાં આવ્યો હતો અને હવે લાગી રહ્યું છે કે આ દિગ્ગજ ખેલાડીની IPL કારકિર્દી પર પણ ખતરો મંડરાઈ રહ્યો છે.
એ ખેલાડી છે ટીમ ઈન્ડિયાના ઓપનર મયંક અગ્રવાલ. IPL 2023ની પહેલી બે મેચમાં મયંક મોટી ઇનિંગ્સ રમવામાં નિષ્ફળ રહ્યો હતો. લખનૌ સુપર જાયન્ટ્સ સામે ઇનિંગની શરૂઆત કરતી વખતે મયંક માત્ર 7 બોલમાં 8 રન બનાવીને આઉટ થયો હતો અને રાજસ્થાન રોયલ્સ સામેની પ્રથમ મેચમાં મયંક પણ 23 બોલમાં 27 રન બનાવીને આઉટ થયો હતો. એવામાં હવે લાગી રહ્યું છે કે જો મયંક આવનાર મેચોમાં પણ આવી જ નિરાશાજનક રમત બતાવશે તો તેને આઈપીએલમાંથી પણ બહારનો રસ્તો બતાવવામાં આવી શકે છે.
