- મધ્યપ્રદેશમા ચોંકાવનારો કિસ્સો
- પૂર્વ પ્રેમિકાએ લગ્નની ના પાડતા આરોપી સરપંચ પતિએ અશ્લીલ તસવીરો કરી વાયરલ
- ફરિયાદ બાદ પોલીસે કરી આરોપીની ધરપકડ
મધ્યપ્રદેશના ભીંડમાંથી પોલીસે ૩૩ વર્ષીય અખિલેશ કુમાર નામના સરપંચ પતિને દબોચી લીધો છે. જેને પોતાની પૂર્વ પ્રેમિકાને બદનામ કરવાના ઇરાદે અશ્લીલ તસવીરો સોશિયલ મીડિયા પર વાયરલ કરી હતી. અખિલેશ અને તેની ગર્લફ્રેન્ડ વચ્ચે બ્રેકઅપ થઈ ગયું હતું. બાદમાં ચાલુ મહીનામાં જ અખિલેશની ગર્લફ્રેન્ડના લગ્ન હતા. જે મામલે જાણ થતા બ્રેકઅપનો ખાર રાખી અખીલેશે આ લગ્ન અગાઉ તેની પૂર્વ પ્રેમિકાને બદનામ કરવાનું આયોજન ઘડી કાઢ્યું હતું. બાદમાં પોતાની પાસે રહેલી તેની પ્રેમિકાની જે તે સમયગાળા દરમિયાનની તસવીર આરોપી અખિલેશે સોશિયલ મીડિયા પર વાયરલ કરી હતી. બાદમાં પૂર્વ પ્રેમિકાને જાણ થતા તે તાત્કાલિક પોલીસ મથકમાં દોડી ગઈ હતી. જ્યા ફરિયાદ નોંધાવી હતી.
બ્રેકઅપનો બદલો લેવા આ પ્રકારનું કૃત્ય કર્યું
પોલીસે ફરિયાદના આધારે આરોપી અખિલેશને દબોચી લીધો હતો. જેમાં આરોપી અખિલેશ અગાઉથી જ લગ્ન થયેલ હોવાનું બહાર આવ્યું છે અને તેની પત્ની ભીંડમાં સરપંચ તરીકે સેવા આપતી હતી. જોકે મહિલાને પોતાના પતિના આ કૃત્ય અંગે કાંઈ પણ ખબર ન હોવાનું પણ સામે આવ્યું છે. આરોપી અખિલેશની પૂછપરછમાં તેમણે જણાવ્યું કે તે પૂર્વ પ્રેમિકા સાથે લગ્ન કરવા માંગતો હતો. પરંતુ તેને લગ્નની મનાઈ કરતા આ વાત ગળે ઉતરી નહીં અને તેમણે બ્રેકઅપનો બદલો લેવા આ પ્રકારનું કૃત્ય કર્યું હતું. જોકે ખાસ વાત એ છે કે આરોપી પાસે પૂર્વ પ્રેમિકાના સોશિયલ મીડિયાના એકાઉન્ટના પાસવર્ડ પણ હતા. જેથી તે આ કારનામામાં સફળ રહ્યો હતો.
કલમ 354 મુજબ કાર્યવાહી
આરોપી દિલ્હીમાં રહી અને ડ્રાઇવિંગ કરતો હોવાનું સામે આવ્યું છે. ફરિયાદમાં એવો પણ દાવો કર્યો કે આરોપી સાથેની કેટલીક તસવીર 27 એપ્રિલના રોજ સોશિયલ મીડિયામાં વાયરલ કરી હતી. એટલું જ નહીં આ શખ્સે પીડિતાની બહેન સાથે પણ મુલાકાત કરી અને રૂપિયાની માંગ કરી હતી જેમાં તેમણે પીડિતા પર વાપરેલા તમામ રૂપિયા પરત આપવા માંગ કરી હતી. બાદમાં સાઈબર ક્રાઇમ પોલીસે નેટવર્ક ગોઠવી અને નેતાજી સુભાષ પ્લેસ મેટ્રો રેલવે સ્ટેશનમાંથી આરોપીને પકડી પાડી હતો. જેની સામે કલમ 354 મુજબ કાર્યવાહી હાથ ધરી હતી.
