National / મોંઘી દવાઓથી મળશે રાહત, ડાયાબિટીસ-બીપી સહિત 30 દવાઓની કિંમત નક્કી

ડાયાબિટીસ, હાઈ બ્લડ પ્રેશર, હૃદયરોગ, ચેપજન્ય રોગો અને મહિલાઓના આરોગ્ય સાથે સંબંધિત દવાઓ લેતા લાખો દર્દીઓ માટે મહત્વપૂર્ણ સમાચાર સામે આવ્યા છે. નેશનલ ફાર્માસ્યુટિકલ પ્રાઇસિંગ ઓથોરિટી (NPPA) દ્વારા 30 મહત્વપૂર્ણ દવાઓના ફોર્મ્યુલેશનની રિટેલ કિંમત નક્કી કરવામાં આવી છે. આ નિર્ણયના કારણે લાંબા સમય સુધી નિયમિત દવાઓ લેતા દર્દીઓના સારવાર ખર્ચમાં નોંધપાત્ર ઘટાડો થવાની આશા વ્યક્ત કરવામાં આવી રહી છે.

સૂચનામાં એવી અનેક દવાઓનો સમાવેશ

NPPA દ્વારા જાહેર કરવામાં આવેલી તાજેતરની સૂચનામાં એવી અનેક દવાઓનો સમાવેશ કરવામાં આવ્યો છે, જે ડાયાબિટીસ, હાઈપરટેન્શન અને હૃદયરોગ જેવી ક્રોનિક બીમારીઓમાં વ્યાપકપણે ઉપયોગમાં લેવામાં આવે છે. આ પ્રકારની બીમારીઓમાં દર્દીઓને ઘણીવાર જીવનભર દવાઓ લેવાની જરૂર પડતી હોય છે. તેથી દવાઓના ભાવ નિયંત્રણનો સીધો લાભ મોટી સંખ્યામાં દર્દીઓને મળી શકે છે.

વિવિધ સંયુક્ત દવાઓનો સમાવેશ

ભાવ નિયંત્રણ હેઠળ આવેલી દવાઓમાં એમ્પાગ્લિફલોઝિન, સિટાગ્લિપ્ટિન, મેટફોર્મિન, ટેનેલિગ્લિપ્ટિન અને ડાપાગ્લિફ્લોઝિન ધરાવતી ડાયાબિટીસની વિવિધ સંયુક્ત દવાઓનો સમાવેશ કરવામાં આવ્યો છે. આ ઉપરાંત એટોરવાસ્ટેટિન, ટેલ્મિસાર્ટન, સિલ્નિડિપિન અને મેટોપ્રોલોલ જેવી હૃદયરોગ અને બ્લડ પ્રેશર માટે વપરાતી દવાઓ પણ યાદીમાં સામેલ છે. વિવિધ એન્ટિબાયોટિક્સ, પીડાશામક દવાઓ, વિટામિન સપ્લિમેન્ટ્સ તેમજ મહિલાઓના આરોગ્ય માટે ઉપયોગમાં લેવાતી દવાઓને પણ આ નિર્ણય હેઠળ આવરી લેવામાં આવી છે.

દવાઓ માટે મહત્તમ રિટેલ કિંમત (MRP) નક્કી

સૂચના અનુસાર આ દવાઓ માટે મહત્તમ રિટેલ કિંમત (MRP) નક્કી કરવામાં આવી છે. ઉત્પાદકો આ નક્કી કરેલી કિંમતથી વધુ ભાવે દવાઓનું વેચાણ કરી શકશે નહીં. જોકે જાહેર કરાયેલા ભાવમાં GSTનો સમાવેશ કરવામાં આવ્યો નથી. મહત્ત્વની દવાઓમાં એમ્પાગ્લિફલોઝિન-સિટાગ્લિપ્ટિન-મેટફોર્મિન ટેબ્લેટનો ભાવ પ્રતિ ગોળી રૂ. 14.88 નક્કી કરવામાં આવ્યો છે. સિટાગ્લિપ્ટિન-ગ્લાઈમિપિરાઈડ-મેટફોર્મિન ટેબ્લેટનો ભાવ રૂ. 11.91 પ્રતિ ગોળી, ટેનેલિગ્લિપ્ટિન-ડાપાગ્લિફ્લોઝિન ટેબ્લેટનો ભાવ રૂ. 10.17 અને એટોરવાસ્ટેટિન-ફેનોફાઇબ્રેટ ટેબ્લેટનો ભાવ રૂ. 18.46 નક્કી કરવામાં આવ્યો છે.

ઉપયોગમાં લેવાતી ટાક્રોલિમસ કેપ્સ્યૂલની કિંમત

આ ઉપરાંત અંગ પ્રત્યારોપણ કરાવનાર દર્દીઓ માટે ઉપયોગમાં લેવાતી ટાક્રોલિમસ કેપ્સ્યૂલની કિંમત રૂ. 127 પ્રતિ કેપ્સ્યૂલ નક્કી કરવામાં આવી છે. યાદીમાં વિટામિન D3 ઓરલ સોલ્યુશન, કેલ્શિયમ અને વિટામિન સપ્લિમેન્ટ્સ, બાળકો માટેની સેફપોડોક્સિમ-ક્લેવ્યુલાનેટ એન્ટિબાયોટિક સસ્પેન્શન તેમજ મહિલાઓના આરોગ્ય માટે વપરાતી નોરેથિસ્ટેરોન એસિટેટ ટેબ્લેટ્સનો પણ સમાવેશ કરવામાં આવ્યો છે.

ઘણી લોકપ્રિય દવાઓ માટે નક્કી કરાયેલા નવા ભાવ

દવા ઉદ્યોગ સાથે સંકળાયેલા પ્રતિનિધિઓના જણાવ્યા અનુસાર ઘણી લોકપ્રિય દવાઓ માટે નક્કી કરાયેલા નવા ભાવ હાલના બજારભાવ કરતાં ઓછા છે. જોકે વિવિધ બ્રાન્ડ અને ડોઝ પ્રમાણે બજારભાવમાં થોડો તફાવત જોવા મળી શકે છે. ઓલ ઇન્ડિયા ઓર્ગેનાઇઝેશન ઓફ કેમિસ્ટ્સ એન્ડ ડ્રગિસ્ટ્સના મહામંત્રી રાજીવ સિંઘલે આ નિર્ણયને આવકારતા જણાવ્યું હતું કે સપ્લાય ચેઇનમાં રહેલો જૂનો સ્ટોક વેચાઈ ગયા બાદ અને નવા MRPવાળો સ્ટોક બજારમાં પહોંચ્યા પછી આગામી 60થી 90 દિવસમાં ગ્રાહકોને તેનો સીધો લાભ મળવા લાગશે.

આ પણ વાંચો : કોકરોચ જનતા પાર્ટીના ફાઉન્ડર આવી રહ્યાં ભારત, આ દિવસે દિલ્હીમાં કરશે મોટું કામ

આરોગ્ય નિષ્ણાતોના જણાવ્યા મુજબ ભારતમાં ઘરેલુ આરોગ્ય ખર્ચમાં દવાઓનો હિસ્સો ખૂબ જ મોટો છે. ખાસ કરીને ડાયાબિટીસ, હાઈ બ્લડ પ્રેશર અને હૃદયરોગ જેવા લાંબા ગાળાના રોગોથી પીડાતા દર્દીઓ માટે સસ્તા દરે દવાઓ ઉપલબ્ધ થવાથી પરિવાર પરનો આર્થિક બોજ ઘટશે. સાથે જ દર્દીઓ નિયમિત સારવાર ચાલુ રાખી શકશે, જેના કારણે તેમના સ્વાસ્થ્ય પર પણ સકારાત્મક અસર જોવા મળી શકે છે. NPPAનો આ નિર્ણય લાખો દર્દીઓ માટે મોટી રાહતરૂપ સાબિત થઈ શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ