ગુજરાત / નવરાત્રી પહેલાં લો ગાર્ડનમાં ચોર સક્રિય, ‘ચણિયાચોળી બતાવો’ કહીને પર્સ-મોબાઇલની ચોરી

નવરાત્રીને હવે ગણતરીના દિવસો બાકી છે ત્યારે અમદાવાદનું લો ગાર્ડન રંગબેરંગી ચ‌િણયાચોળીથી ધમધમી રહ્યું છે. સાંજ પડતાં જ બજારમાં એટલી ભીડ જોવા મળે છે કે એક સ્ટોલથી બીજા સ્ટોલ સુધી પહોંચવામાં પણ સમય લાગે. ખેલૈયાઓ ચ‌િણયાચોળી, ઓર્નામેન્ટ્સ, છત્રી સહિતની વસ્તુઓ ખરીદવામાં વ્યસ્ત છે, પરંતુ આ જ ભીડમાં કેટલાક એવા ગ્રાહકો પણ ફરી રહ્યા છે, જેમનો હેતુ ખરીદી નહીં, પરંતુ ચોરી કરવાનો છે.

ભાઈ, ચણિયાચોળી બતાવો... આ એક સામાન્ય વાક્ય છે, પરંતુ આ જ વાક્યની આડમાં ચોર ટોળકી બજારમાં એન્ટ્રી કરતી હોય છે અને પોતાના ઈરાદાને પાર પાડીને ફરાર થઈ જાય છે. અપટુડેટ કપડાં પહેરેલી મહિલા દુકાન પર પહોંચે છે અને અન્ય ગ્રાહકોની જેમ ચ‌િણયાચોળી જોવાનું શરૂ કરે છે. એક પછી એક ડ્રેસ બતાવવાનું શરૂ થતાં દુકાનદારનું ધ્યાન પણ તેના તરફ રહે છે. દરમિયાન તેની સાથે આવેલી બીજી મહિલા કે બાળક આસપાસની ભીડમાં ગોઠવાઈ જાય છે.

ઘટનાક્રમમાં સૌથી મહત્ત્વની વાત

આ સમગ્ર ઘટનાક્રમમાં સૌથી મહત્ત્વની વાત એ છે કે ચોરીની કોઈ હિલચાલ પહેલી નજરે દેખાતી નથી. આ મહિલા ગ્રાહક ચણિયાચોળી પસંદ કરી રહી હોય તેમ દેખાય છે, પરંતુ તેની નજર ક્યારેક ડ્રેસ કરતાં આસપાસના ગ્રાહકોના પર્સ અને મોબાઇલ પર હોય છે. તક મળતાં જ ગણતરીની સેકન્ડોમાં પર્સમાંથી મોબાઇલ કે રોકડ સેરવી લેવામાં આવે છે. ત્યાર બાદ ટોળકી અલગ અલગ દિશામાં નીકળી જાય છે.

ગ્રાહકની ઓળખ છુપાવવી એ ચોર ટોળકીની સૌથી મોટી ચાલ

લો ગાર્ડનમાં ચોરી કરનારી ટોળકી માટે ભીડ સૌથી મોટું કવચ બની જાય છે. મહિલા ચોરો સામાન્ય ગ્રાહકોની જેમ તૈયાર થઈને આવે છે, જેથી તેમની ઓળખ અંગે કોઈને શંકા ન જાય. કેટલીક વખત બાળકોને પણ સાથે રાખવામાં આવે છે. પરિવાર સાથે આવેલી વ્યક્તિને જોઈને અન્ય ગ્રાહકો સામાન્ય રીતે સાવચેત રહેતા નથી. ચોર ટોળકી પહેલાં દુકાનદાર સાથે વાતચીતમાં વ્યસ્ત થતી હોય છે અને આસપાસના ગ્રાહકોને નિહાળે છે. જે વ્યક્તિના હાથમાં ખુલ્લો મોબાઇલ હોય, પર્સ પાછળ લટકતું હોય કે ખરીદી દરમિયાન સામાન પર ધ્યાન ઓછું હોય તેને ટાર્ગેટ કરવામાં આવે છે. ત્યાર બાદ ધક્કામુક્કી, ભીડ કે સામાન બતાવવાની ગરબડ વચ્ચે ચોરી કરવામાં આવે છે.

10થી વધુ સ્પીકર હવે ચોરથી સાવચેત કરશે

ચોરીની ઘટનાઓને ધ્યાનમાં રાખીને લો ગાર્ડનના ૧૧૦ સ્ટોલના માલિકોએ સુરક્ષા માટે મહત્ત્વનું પગલું ભર્યું છે. પોલીસની મંજૂરી બાદ આશરે ૬૦ હજાર રૂપિયાના ખર્ચે ૧૦થી વધુ લાઉડસ્પીકર લગાવવામાં આવ્યાં છે. બજાર શરૂ થાય ત્યારથી બંધ થાય ત્યાં સુધી સ્પીકર પરથી ગ્રાહકોને ચોરોથી સાવચેત રહેવા માટે એનાઉન્સમેન્ટ કરવામાં આવી રહ્યું છે. ગુજરાતી ઉપરાંત હિન્દી અને અંગ્રેજીમાં પણ લોકોને ચેતવવામાં આવી રહ્યા છે કે ખરીદી કરતી વખતે પોતાના મોબાઇલ, પર્સ અને કીમતી સામાનનું ખાસ ધ્યાન રાખે.

ગત વર્ષની ઘટના બાદ વેપારીઓ પણ સતર્ક બન્યા

ગત વર્ષે જીએસટી અધિકારીનાં પત્નીનું પર્સ ચોરાયું હતું. આ ઘટનામાં એક વેપારી પર ચોરીનો આરોપ આવ્યો હતો. આ ઘટનાના પગલે બજારમાં સુરક્ષા વ્યવસ્થાને લઈને વેપારીઓમાં ચિંતા વધી હતી. આ વખતે વેપારીઓએ પોલીસની મંજૂરી સાથે સ્પીકર વ્યવસ્થા ઊભી કરીને ગ્રાહકોને સતત સાવચેત રાખવાનો પ્રયાસ કર્યો છે.

પોલીસની નજર હવે ગ્રાહકો પર પણ રહેશે

નવરાત્રી નજીક આવતાં પોલીસ પણ લો ગાર્ડનમાં પેટ્રોલિંગ વધારશે. શી-ટીમ બજારમાં સતત ફરશે અને શંકાસ્પદ હિલચાલ ધરાવતા લોકો પર નજર રાખશે. પોલીસની ગાડીઓ પણ પેટ્રોલિંગ કરશે. વારંવાર દુકાનો બદલતા લોકો, ખરીદી કર્યા વગર ગ્રાહકોની આસપાસ ફરતા લોકો, જાણી જોઈને ધક્કામુક્કી કરતા લોકો અને બાળકોને આગળ કરીને ભીડમાં પ્રવેશતા લોકો પર નજર રાખવામાં આવશે.

ચોરીથી બચવા ગ્રાહકોએ શું કરવું?

• ખરીદી કરતી વખતે પર્સ અને મોબાઇલ પર સતત નજર રાખવી.
• ‘ભાઈ, ચણિયાચોળી બતાવો’ કહીને નજીક આવતી અજાણી વ્યક્તિથી પણ સાવચેત રહેવું.
• કોઈ વ્યક્તિ વારંવાર ધક્કો મારે કે ધ્યાન ભટકાવવાનો પ્રયાસ કરે તો તરત સતર્ક થવું.
• જરૂરિયાત કરતાં વધુ રોકડ રકમ સાથે ન રાખવી.
• બાળકોને આગળ કરીને ભીડમાં આવતી વ્યક્તિઓની હિલચાલ પર નજર રાખવી.
• વાહન કે સ્કૂટરની ડેકીમાં કીમતી સામાન ન મૂકવો.

આ પણ વાંચો : અમદાવાદમાં જાહેર રોડ-ફૂટપાથ પર શાકભાજી-ફળનું વેચાણ નહીં કરી શકાય, રસ્તા પર લારી-પાથરણું ગેરકાયદે દબાણ ગણાશે

નવરાત્રીની ખરીદીનો ઉત્સાહ લો ગાર્ડનમાં વધી રહ્યો છે, પરંતુ આ વખતે બજારમાં માત્ર ચણિયાચોળીના રંગો જ નહીં, ગ્રાહક બનીને ફરતા ચોરોને ઓળખવાનો પડકાર પણ છે, કારણ કે ભીડમાં કોઈ મહિલા હસતા ચહેરે દુકાનદારને માત્ર એટલું જ કહેતી હોય કે ભાઈ ચણિયાચોળીબતાવો... ત્યારે તેની નજર ખરેખર ચ‌િણયાચોળી પર છે કે તમારી બાજુમાં રહેલા મોબાઇલ-પર્સ પર તે જોવાનું કામ હવે ગ્રાહકનું પણ છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ