ટ્રાવેલ / રાજસ્થાનના સુંદર કિલ્લાની સફરનો આ છે બેસ્ટ સમય

કિલ્લા અને મહેલોનો ગઢ ગણાતું રાજસ્થાન આ સીઝનમાં ફરવા માટે બેસ્ટ જગ્યા છે. ક્યાંક રેતાળ મેદાનમાં દુર દુર સુધી રેતના ઉંચા ઉંચા ઢગલા તો ક્યાંક ગરમીમાં લોકોનું ફેવરિટ માઉન્ટ આબુ જેવું હિલ સ્ટેશન. રંગીલુ રાજસ્થાન ઘણા બધા રંગોથી ભરેલું છે. આ રંગોમાંથી એક રંગ છે ખિમસરનો કિલ્લો. તમે તેને રાજસ્થાનનું એક મોતી પણ કહી શકો છો.

ખિમસરનો કિલ્લો જોધપુર અને બિકાનેરની વચ્ચે ખિમસર નામના એક ગામમાં આવેલો છે. આ કિલ્લાનું નિર્માણ રાવ કરમજીએ આજથી લગભગ 500 વર્ષ પહેલા કર્યુ હતુ. ત્યારપછી ઘણીવાર આ કિલ્લાનો વિસ્તાર થયો. તેના અલગ અલગ રાજકીય કારણ રહ્યા.

આજની વાત કરીએ તો ખિમસરનો કિલ્લો રાજસ્થાનના સૌથી સુંદર કિલ્લામાંનો એક છે. એક કિલ્લામાં હેરિટેજ હોટલ ચાલી રહી છે. જ્યારે એક ભાગમાં આજે પણ રાજવી પરિવાર રહે છે. હોટલ પણ તે પરિવાર ચલાવે છે.

શું છે આ કિલ્લાની ખુબીઓ

• આ કિલ્લો પોતાની વાસ્તુકળા માટે ખુબ જ પ્રસિધ્ધ છે. તેની ભવ્યતા જોઇને તે જમાનાના ઠાઠ અનુભવી શકાય છે.
• આ કિલ્લામાં એન્ટ્રી કરતી વખતે તમને હર્યા ભર્યા બાગ બગીચા અને તેની વચ્ચે ઘણા પ્રકારના જીવજંતુઓ જોવા મળે છે.
• કિલ્લાની અંદર જતા રસ્તામાં ઘણા સ્તંભ, થાંભલા, નકશીકામ વાળી મુર્તિઓ જોવા મળશે. આ કિલ્લાની માવજત ખુબ જ શાનદાર રીતે કરાઇ છે.
• કિલ્લાની આસપાસ અન્ય કેટલાય મશહુર અને શાનદાર કિલ્લા હાજર છે. તેમાં મહેરાનગઢનો કિલ્લો, ઉમેદ ભવન પેલેસ પણ છે. ખિમસરના કિલ્લાની સાથે સાથે તમે ત્યાંની મુલાકાત પણ લઇ શકો છો.
• જો તમે ખિમસરનો કિલ્લો ફરવા ઇચ્છતા હો તો તમારી પાસે અત્યારે બેસ્ટ સમય છે. કેમકે ખિમસરમાં ફરવાનો સૌથી બેસ્ટ સમય ઓક્ટોબરથી માર્ચ સુધીનો હોય છે. ત્યારપછી અહીં અસહ્ય ગરમી પડે છે. આમ તો રાજસ્થાનની કોઇ પણ જગ્યાએ ફરવા માટે આ સમય જ બેસ્ટ છે. આ સીઝનમાં વધુ ગરમી કે ઠંડી પડતી નથી અને તમે ફરવાનો આનંદ માણી શકો છો.