અમેરિકામાં સુરતના ઓલપાડના મૂળદ ગામના 19 વર્ષીય યુવકની ગોળી મારીને હત્યા કરી દેવાઈ છે. 19 વર્ષના જય ચંદ્રકાન્ત પટેલની ગોળી મારી હત્યા કરાયેલી લાશ મળી આવી છે. તેની હત્યા લુટના ઈરાદે કરી હોવાની શંકા સેવાઈ રહી છે. પોલીસે આ અંગે CCTV ફૂટેજના આધારે વધુ તપાસ હાથ ધરી છે.
અમેરિકાના ન્યુ યોર્ક રાજ્યના ક્વીન્ઝ વિસ્તારની એક ગલીમાં ન્યુ યોર્ક શહેરની પોલીસને જય પટેલ નામના એક યુવકની લાશ મળી આવી છે. આ લાશ નસાઉ યુનિવર્સીટીમાં ભણતા 19 વર્ષીય જયના ઘરની નજીકથી જ મળી આવી છે.
ગ્લેન ઓક્સ વિસ્તારમાં બપોરે 1 વાગે 268મી સ્ટ્રીટ અને 82માં એવન્યુ પાસે લાલ રંગની ટોયોટા કેમરી ગાડી ચલાવતા ડ્રાઈવરે જય પટેલને પેટમાં ગોળી મારી દીધી હતી. ત્યાર બાદ ચાલક ઘટના સ્થળથી ફરાર થઇ ગયો હતો. અહીં ઉલ્લેખનીય છે કે જય 267મી સ્ટ્રીટ ઉપર રહેતો હતો.
સારવારની ટીમ દ્વારા તાત્કાલિક જયને નોર્થ શોર યુનિવર્સીટી હોસ્પિટલમાં ખસેડવામાં આવ્યો હતો પરંતુ દુર્ભાગ્યે તેને બચાવી શકાયો નહોતો.
જયને જ્યાં ગોળી મારવામાં આવી ત્યાં રહેતા લીલીયન રેકૉફે જણાવ્યું હતું કે જયને ગોળી વાગ્યાના થોડા જ સમયમાં ત્યાં એમ્બ્યુલન્સ અને ફાયર ટ્રકની ગાડીઓ પહોંચી ગઈ હતી.
બુધવારે રાતે જયના ઘરે તેના સગાસંબંધીઓ તેના મૃત્યુનો શોક પાળવા ભેગા થયા હતા. તેના એક સંબંધી એ જણાવ્યું હતું કે સૌ કોઈ આ સમાચારથી હતપ્રત રહી ગયા છે. જયના ઘણા બધા મિત્રો હતા અને સૌને તેના માટે લાગણી હતી. અમે સૌ તેને ખુબ મિસ કરીશું.
પોલીસને શંકા; ડ્રગ્સનો કેસ હોઈ શકે છે
ન્યુ યોર્કની ન્યુઝ એજન્સી nydailynews.comના સૂત્રો મુજબ પોલીસ હજુ તપાસ કરી રહી છે કે શું આ હત્યા નાર્કોટિક ડ્રગ્સને લગતી હતી કે નહિ કારણકે તેમના સૂત્રો મુજબ જયની ભૂતકાળમાં પોલીસ ધરપકડ થઇ ચુકી હોવાના રેકોર્ડ છે.