સ્વાસ્થય / જૈન સંત નમ્રમુનિ મહારાજની તબિયત લથડતા રાજકોટની હોસ્પિટલમાં દાખલ , પ્રવચન દરમિયાન થયો હતો છાતીમાં દુખાવો

• જૈન સંત નમ્રમુનિ મહારાજની તબિયત લથડી
• રાજકોટની ખાનગી હોસ્પિટલમાં દાખલ
• પ્રવચન દરમિયાન થયો હતો છાતીમાં દુખાવો

જૈન સમાજના સંત નમ્રમુનિ મહારાજને હોસ્પિટલમાં દાખલ કરવામાં આવ્યા છે. પ્રવચન દરમિયાન છાતીમાં દુખાવો થતાં તેઓને રાજકોટની એક પ્રાઈવેટ હોસ્પિટલમાં દાખલ કરવામાં આવ્યા છે. 

પ્રવચન સમયે છાતીમાં દુખાવો ઉપડતા હોસ્પિટલ ખસેડાયા
આપને જણાવી દઈયે કે, અગાઉ પણ તેઓને હ્રદયમાં તકલીફ થતાં રાજકોટની સિનર્જી હોસ્પિટલ હોસ્પિટલમાં દાખલ કરવામાં આવ્યા હતા.હાલ જૈન સમાજમાં આયંબિલ ઓળી પર્વ ચાલી રહ્યું છે. સંત નમ્રમુનિ મહારાજ સવારે શ્રાવકોને આરાધનમાં પ્રવચન આપી રહ્યા હતા તે સમયે છાતીમાં ઝીણા દુખાવાની તકલીફ પડતાં તેમણે હાજર આગેવાનોને જાણ કરી હતી. જે બાદ તેમણે પ્રાથમિક સારવાર માટે ગોંડલ ત્યારબાદ વધુ સારવાર અર્થે રાજકોટની સિનર્જી હોસ્પિટલમાં દાખલ કરવામાં આવ્યા છે. 

સંત નમ્રમુનિ મહારાજની તબિયત હાલ સ્થિર
ઇમરજન્સીમાં સંત નમ્રમુનિ મહારાજને એડમિટ કરી હોસ્પિટલમાં ચેકઅપ કરી સધન સારવાર ચાલુ કરી છે. ડોકટરોનું કહેવું છે કે હાલ  મહારાજની તબિયત એકદમ સ્થિર છે. સાંજ સુધીમાં રિપોર્ટ આવી જશે. વ્રતને કારણે શરીરમાં નબળાઈ આવતા આ બની શકે છે. 

હાલ ગુજરાતમાં જોર શોરની ગરમી પડી રહી છે એમાંય આયંબિલ આરાધના વ્રતને લગતા દિવસભરના કાર્યક્રમો અને સાથે કઠિન તપ સાધનાને કારણે તેઓની તબિયત બગડી હતી. રાષ્ટ્રસંત સંત નમ્રમુનિ મહારાજની તબિયત લથડતા જૈન સમાજમાં ચિંતાનું મોજુ છવાઈ ગયું છે. તેમના સ્વાસ્થ્યને લઈ શ્રાવકો પણ જલ્દી સાજા થાય તેવી પ્રાર્થના કરી રહ્યા છે. તેઓના સ્વાસ્થ્યની તકલીફની  જાણ થતાં  તબિયતના ખબર અંતર પૂછતા ફોન અને સંદેશાઓ ચાલુ થઈ ગયા છે.