સ્પોર્ટ્સ / કોમનવેલ્થ ગેમ્સમાં ભારતની ચમક! હરજિંદરનો રેકોર્ડ, ગુલવીરની ઐતિહાસિક દોડથી મળ્યા 2 સિલ્વર

ગ્લાસગોમાં યોજાઈ રહેલી કોમનવેલ્થ ગેમ્સમાં ભારતીય ખેલાડીઓ સતત શાનદાર પ્રદર્શન કરી રહ્યા છે. મંગળવારે વેઇટલિફ્ટર હરજિંદર કૌર અને લાંબા અંતરના દોડવીર ગુલવીર સિંહે સિલ્વર મેડલ જીતીને ભારતને મોટી સફળતા અપાવી હતી. બીજી તરફ ભારતીય બોક્સરોએ પણ સેમિફાઇનલમાં સ્થાન બનાવીને વધુ ત્રણ મેડલ લગભગ નિશ્ચિત કરી દીધા છે. ભારત હાલમાં મેડલ ટેબલમાં નવમા સ્થાને છે.

હરજિંદર કૌરે તોડ્યા કોમનવેલ્થ ગેમ્સના રેકોર્ડ

મહિલાઓની 69 કિલોગ્રામ વેઇટલિફ્ટિંગ સ્પર્ધામાં 29 વર્ષીય હરજિંદર કૌરે પોતાના કારકિર્દીનું સર્વશ્રેષ્ઠ પ્રદર્શન કર્યું. તેમણે સ્નેચમાં પહેલા 99 કિલોગ્રામ અને ત્યારબાદ 101 કિલોગ્રામ વજન ઉઠાવીને રેકોર્ડ નોંધાવ્યો. ક્લીન એન્ડ જર્કમાં પણ 123 અને ત્યારબાદ 126 કિલોગ્રામ વજન ઉઠાવી કુલ 227 કિલોગ્રામ સાથે સિલ્વર મેડલ પોતાના નામે કર્યો. ચાર વર્ષ પહેલા બ્રોન્ઝ જીતનાર હરજિંદરે આ વખતે એક પગલું આગળ વધીને ભારત માટે સિલ્વર જીત્યો.

ગુલવીર સિંહે રચ્યો નવો ઈતિહાસ

પુરુષોની 10,000 મીટર દોડમાં ગુલવીર સિંહે ઐતિહાસિક સિલ્વર મેડલ જીત્યો. તેઓ આ સ્પર્ધામાં કોમનવેલ્થ ગેમ્સના ઈતિહાસમાં મેડલ જીતનાર પ્રથમ ભારતીય ખેલાડી બન્યા છે. ભારે વરસાદ અને ભીના ટ્રેક છતાં તેમણે આખી રેસ દરમિયાન શાનદાર નિયંત્રણ રાખ્યું અને અંતિમ ક્ષણોમાં ઝડપ વધારી 27 મિનિટ 49.78 સેકન્ડના સમય સાથે બીજા સ્થાને રહ્યા.

બોક્સિંગમાં પણ ભારતનું પ્રભુત્વ

ભારતીય બોક્સરોએ પણ દમદાર રમત બતાવી છે. પ્રિયા ઘંઘાસ, પ્રીતિ પવાર અને જાદુમણી સિંહે પોતાના ક્વાર્ટર ફાઇનલ મુકાબલા જીતીને સેમિફાઇનલમાં પ્રવેશ કર્યો છે. કોમનવેલ્થ ગેમ્સના નિયમો મુજબ સેમિફાઇનલમાં પહોંચતા જ ઓછામાં ઓછો બ્રોન્ઝ મેડલ નિશ્ચિત થઈ જાય છે. આ સાથે ભારતના ખાતામાં વધુ ત્રણ મેડલ પાક્કા થયા છે.

આ પણ વાંચોઃ જેને એક પણ આંતરરાષ્ટ્રીય મેચ નથી રમી, તે બન્યો ટીમ ઈન્ડિયાનો કોચ, કોણ છે એ પ્લેયર?

વિશાલ ટીકે સેમિફાઇનલમાં પહોંચ્યા

એથ્લેટિક્સમાં ભારતના નેશનલ રેકોર્ડ ધારક વિશાલ ટીકેએ પણ શાનદાર પ્રદર્શન કર્યું. પુરુષોની 400 મીટર દોડમાં તેમણે 46.49 સેકન્ડનો સમય નોંધાવી પોતાની હીટમાં બીજા સ્થાને રહી સેમિફાઇનલમાં સ્થાન મેળવ્યું. હવે તેમની નજર ફાઇનલમાં પહોંચીને વધુ એક મેડલ જીતવા પર રહેશે.

મેડલ ટેબલમાં ભારતનું સ્થાન મજબૂત

ભારતના ખાતામાં હવે કુલ 12 મેડલ થઈ ગયા છે જેમાં 2 ગોલ્ડ, 7 સિલ્વર અને 3 બ્રોન્ઝ મેડલનો સમાવેશ થાય છે. ઓસ્ટ્રેલિયા 33 ગોલ્ડ સહિત કુલ 77 મેડલ સાથે પ્રથમ સ્થાને છે. ભારતીય ખેલાડીઓનું સતત સારું પ્રદર્શન જોતા આગામી દિવસોમાં ભારતના મેડલની સંખ્યામાં વધુ વધારો થવાની આશા વ્યક્ત કરવામાં આવી રહી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ