નેશનલ / 10 દિવસોમાં ત્રીજી વખત વધ્યા પેટ્રોલ ડિઝલના ભાવ, જાણો કેટલા થયા ભાવ

મિડલ ઈસ્ટમાં ચાલી રહેલા તણાવ વચ્ચે ભારતમાં સામાન્ય લોકો પર મોંઘવારીનો બોજ વધતો જઈ રહ્યો છે. શનિવારે ફરી એક વખત પેટ્રોલ અને ડીઝલના ભાવમાં વધારો થયો છે. પેટ્રોલના ભાવમાં પ્રતિ લિટર 87 પૈસા અને ડીઝલના ભાવમાં પ્રતિ લિટર 91 પૈસાનો વધારો કરવામાં આવ્યો છે.

છેલ્લા 10 દિવસમાં આ ત્રીજી વાર છે જ્યારે પેટ્રોલ અને ડીઝલના ભાવમાં વધારો કરવામાં આવ્યો છે. આ પહેલાં 15 મેના રોજ પેટ્રોલ અને ડીઝલના ભાવમાં 3-3 રૂપિયાનો વધારો થયો હતો. ત્યારબાદ 19 મેના રોજ પેટ્રોલ 87 પૈસા અને ડીઝલ 91 પૈસા મોંઘું થયું હતું. આ રીતે છેલ્લા 10 દિવસમાં પેટ્રોલ અને ડીઝલ લગભગ 5 રૂપિયા સુધી મોંઘાં થઈ ગયા છે.

દિલ્હીમાં પેટ્રોલનો ભાવ 87 પૈસા વધીને પ્રતિ લિટર 98.64 રૂપિયાથી 99.51 રૂપિયા થયો છે. જ્યારે ડીઝલનો ભાવ 91 પૈસા વધીને પ્રતિ લિટર 91.58 રૂપિયાથી 92.49 રૂપિયા થયો છે.

આ પણ વાંચોઃ ડૉલર સામે ગગડતો રૂપિયો રોકવા RBI નો મોટો પ્લાન, દેશમાં ફરી લાગુ થશે 'Taper Tantrum Playbook'?

પેટ્રોલિયમ મંત્રાલયે શું કહ્યું

આશ્ચર્યની વાત એ છે કે થોડા સમય પહેલાં જ કેન્દ્રીય પેટ્રોલિયમ અને પ્રાકૃતિક ગેસ મંત્રાલયે લોકોને વિશ્વાસ આપ્યો હતો કે દેશમાં ઇંધણની કોઈ અછત નથી. મંત્રાલયે સોશિયલ મીડિયા પર જણાવ્યું હતું કે દેશભરમાં પેટ્રોલ અને ડીઝલ પૂરતા પ્રમાણમાં ઉપલબ્ધ છે અને સપ્લાય સંપૂર્ણ રીતે સ્થિર છે. મંત્રાલયે લોકોને અફવાઓ પર ધ્યાન ન આપવા અને ગભરાઈને વધુ ઇંધણ ખરીદવાનું ટાળવા અપીલ કરી હતી. સાથે જ લોકોને પોતાની જરૂરિયાત મુજબ જ ઇંધણ ખરીદવાની સલાહ આપવામાં આવી હતી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ