ચકચાર / જામનગરમાં 16 વર્ષના સમલૈંગિક સગીરનો પાર્ટનર જ બન્યો જીવનો દુશ્મન, હત્યા પહેલા દુષ્કર્મ, પોલીસે મિત્રની ધરપકડ કરી તો ખૂલી પોલ

• જામનગરમાં સગીરનું અપહરણ કરાયા બાદ હત્યા કરાતાં ખળભળાટ 
• મોહનનગર આવાસમાંથી હાર્દિકનું કરાયું હતું અપહરણ 
• સુવરડા ગામ પાસે અવાવરૂ જગ્યાએથી હાર્દિકનો મૃતદેહ મળ્યો 

જામનગર પંથકમાં સમલૈંગિક સંબંધમાં સગીરની લાશ મળી આવતા હડકંપ મચી ગયો છે. જામનગર જિલ્લાના સુવરડા ગામેથી સગીરની લાશ મળી આવી હતી. જે મામલે પોલીસને જાણ કરાતા પોલીસ સ્ટાફ તાબડતોબ ઘટનાસ્થળે દોડી ગયો હતો. જ્યાં તપાસમાં સામે આવ્યું કે સગીરની તેમના યુવાન મિત્ર દ્વારા જ હત્યા કરવામાં આવી છે. પ્રથમ તેમની સાથે કુકર્મ ગુજાર્યા બાદ તેમને સળગાવી મોતને ઘાટ ઉતારી દેવામાં આવ્યો છે.

પોલીસે સીસીટીવી કેમેરાઓ ચેક કર્યા

જામનગરના મોહનનગર આવાસમાંથી સગીરનું અપહરણ કરાયું હતું. ત્યારબાદ સુવરડા ગામ પાસે અવાવરું જગ્યાએથી મૃતદેહ મળી આવ્યો હતો. જામનગરમાં મોહન નગર આવાસમાં રહેતા અને ૧૧માં ધોરણમાં અભ્યાસ કરતો એક વિદ્યાર્થી બપોરે સ્કૂલે જતો હતો, દરમિયાન તેના બિલ્ડિંગ પાસેથી જ અપહરણ થઈ ગયું હતું અને પિતા દ્વારા અપહરણની ફરિયાદ નોંધાવાઈ હતી. જે મામલામાં પોલીસે સીસીટીવી કેમેરાઓ ચેક કર્યા પછી અપહરણ કરનારને પકડવા માટેની કવાયત હાથ ધરાઈ હતી.

તપાસના ચક્રો ગતિમાન કરવામાં આવ્યા
સુવરડા ગામેથી મૃતદેહ મળ્યા બાદ સગીર બાળકની તેના પાર્ટનર દ્વારા જ હત્યા કરાયાનો ઘટસ્ફોટ થયો હતો. જાણવા મળતી વિગતો અનુસાર સગીરનો 22 વર્ષના યુવાન સાથે સંબંધ હતો અને આરોપીએ તેની હત્યા એટલા માટે કરી નાખી કારણ કે આ સગીરની મિત્રતા અન્ય યુવાન સાથે વધી રહી હતી. આરોપીને એ વાત પસંદ ન હોવાથી તેમણે પોતાના પાર્ટનરને મોતને ઘાટ ઉતારી દીધો હતો. હાલ આ મામલે સ્થાનિક પોલીસ દ્વારા હત્યાના વારદાતને અંજામ આપનાર શખ્સને દબોચી લેવાયો છે. પોલીસ દ્વારા આરોપીના અન્ય એક 19 વર્ષના મિત્રની પણ અટકાયત કરી લેવામાં આવી છે. પોલીસના જણાવાય અનુસાર હાલમાં આ મામલે તપાસના ચક્રો ગતિમાન કરવામાં આવ્યા છે અને પોલીસ દ્વારા આરોપીઓની પૂછપરછ કરવામાં આવી રહી છે. ખાસ વાત એ છે કે આરોપી અને મૃતકના પરિવાર વચ્ચે વર્ષોથી સબંધ હતો.