સુવિધા / અમદાવાદીઓ માટે ગુડ ન્યૂઝ! પેટ્રોલ પંપની જેમ ઠેર ઠેર હશે ચાર્જિંગ સ્ટેશન, પહેલું ચાર્જિંગ મફત, પછી લેવાશે આટલા રૂપિયા

• ઈ-વ્હિકલ ધારકો માટે મહત્વના સમાચાર
• શહેરમાં 12 ચાર્જિંગ સ્ટેશન ઉભા કરાયા
• PPP ધોરણે ઇ-વેમ્પ કંપની પૂરી પાડશે સેવા 

Ahmedadbad News: દેશમાં ઈલેક્ટ્રિક વાહનોની લોકપ્રિયતા ખૂબ ઝડપથી વધી રહી છે. વાહનોથી થતું કાર્બન ઉત્સર્જન, ગ્લોબલ વોર્મિગ અંગે વધી રહેલી જાગૃતિ, ઉત્સર્જન અંગેના કડક માપદંડ અને સરકાર દ્વારા મળતા પ્રોત્સાહનના કારણે ઇલેક્ટ્રિક વાહનોની ખરીદીમાં વધારો થઈ રહ્યો છે. દેશમાં ઇલેક્ટ્રિક વ્હીકલનો ક્રેઝ વધી રહ્યો છે. ત્યારે અમદાવાદ શહેરમાં ઈ-વ્હિકલ માટે 24 ચાર્જિંગ સ્ટેશન ઊભા કરવામાં આવશે. AMCએ કુલ 24 ચાર્જિંગ સ્ટેશન માટે ટેન્ડર બહાર પાડ્યા હતા. જેમાંથી હાલમાં 12 સ્ટેશન પર કામ ચાલી રહ્યું છે.  

ઈ-વ્હિકલ હવે માત્ર 35 મિનિટમાં થશે ચાર્જ 
અમદાવાદના પ્રહલાદ નગર, સિંધુભવન, ગુરુકુળ સહિતના વિસ્તારોમાં ચાર્જિંગ સ્ટેશનો ઉભા કરાયા છે. AMCએ ઇલેક્ટ્રિક ચાર્જિંગ સ્ટેશન માટે ઈ-વેમ્પ નામની ખાનગી કંપનીને કામ સોંપ્યું છે. AMC દ્વારા PPP ધોરણે ઇ-વેમ્પ કંપની સેવા પૂરી પાડશે. આ ચાર્જિંગ સ્ટેશન શરૂ થયા બાદ EV 35 મિનિટમાં ચાર્જ થઈ જશે. આ ચાર્જિંગ સ્ટેશનો પર પહેલીવાર ફ્રી ચાર્જિંગ કરી આપવામાં આવશે. જ્યારે 5 ચાર્જિંગ સુધી 50 ટકા ડિસ્કાઉન્ટ આપવામાં આવશે.

12 લોકેશન કરાયા છે શોર્ટલિસ્ટ
આ અંગે ઇ વેમ્પ કંપનીના ફાઉન્ડર દેવાંશ શાહે જણાવ્યું કે, અત્યારે અમદાવાદના 12 લોકેશન શોર્ટલિસ્ટ કરવામાં આવ્યા છે. જેમાં સિંધુભવન, ઇન્કમટેક્સ, પ્રહલાદનગર, નરોડા, નિકલો, સીટીએમ વગેરે  વિસ્તારમાં ચાર્જિંગ સ્ટેશનો બનાવવામાં આવી રહ્યા છે. ચાર્જિંગ સ્ટેશન શરૂ થયા બાદ ચાર્જિંગ સ્ટેશનો પર પહેલીવાર ચાર્જિંગ કરાવતા વાહનચાલકોને ફ્રી ચાર્જિંગ કરી આપવામાં આવશે. જ્યારે 5 વખત વાહનોને ચાર્જિંગ કરવા સુધી 50 ટકા ડિસ્કાઉન્ટ આપવામાં આવશે. જેવી અલગ અલગ ઓફરો વાહનચાલકોને આપવામાં આવશે. 

જાણો કેટલા રૂપિયા ચૂકવવા પડશે?
હાલની તારીખમાં ગુજરાતમાં અમારા 18થી વધારે ચાર્જિંગ સ્ટેશન કાર્યરત છે. જેમાં ઈસી ચાર્જિગ અને ડીસી ચાર્જિંગનો સમાવેશ થાય છે. ઈસી ચાર્જિંગમાં વાહનો સ્લો ચાર્જ થાય છે, જેથી તેનો ભાવ 15-17 રૂપિયા પર યુનિટ છે. જ્યારે ડીસી ચાર્જરને ફાર્ટ ચાર્જર તરીકે ગણાય છે, જે 30થી 45 મિનિટમાં ગાડીઓને ફૂલ ચાર્જ કરી નાખે છે. તેનો ભાવ હાલમાં 20-21 રૂપિયા પ્રતિ યુનિટ રાખવામાં આવ્યો છે.