- ઉદ્ધવ ઠાકરેએ રામ મંદિરના ઉદ્ઘાટનને લઈને વિવાદાસ્પદ નિવેદન આપ્યું
- BJP ફરી એકવાર ગોધરા જેવી ઘટના આયોજિત કરી શકે છે - ઉદ્ધવ ઠાકરે
- રામ મંદિરના ઉદ્ઘાટન બાદ ‘વાપસી યાત્રા’ દરમિયાન ‘ગોધરા જેવી’ ઘટના થઈ શકે
શિવસેના (UBT) પ્રમુખ ઉદ્ધવ ઠાકરેએ રામ મંદિરના ઉદ્ઘાટનને લઈને વિવાદાસ્પદ નિવેદન આપ્યું છે. ઉદ્ધવ ઠાકરેએ ભારતીય જનતા પાર્ટી (BJP) સરકાર પર પ્રહાર કરતાં કહ્યું કે' તેઓ ફરી એકવાર ગોધરા જેવી ઘટના આયોજિત કરી શકે છે અને રામ મંદિરના ઉદ્ઘાટન વખતે આ જ પ્રકારની ઘટનાનું પુનરાવર્તન ચૂંટણી જીતવા માટે થઈ શકે છે. '
ઉદ્ધવ ઠાકરેના નિવેદનથી રાજકીય ગરમાવો જોવા મળ્યો
ઉદ્ધવ ઠાકરેએ રવિવારે દાવો કર્યો હતો કે ઉત્તર પ્રદેશના અયોધ્યામાં રામ મંદિરના ઉદ્ઘાટન માટે દેશભરમાંથી મોટી સંખ્યામાં લોકો આવવાની અપેક્ષા છે અને કાર્યક્રમમાં હાજરી આપીને પાછા ફરનારા લોકો સાથે એટલે કે ‘વાપસી યાત્રા’ દરમિયાન ‘ગોધરા જેવી’ ઘટના બની શકે છે. ઉદ્ધવ ઠાકરેના નિવેદનથી રાજકીય ગરમાવો જોવા મળી રહ્યો છે.
રામ મંદિરના ઉદ્ઘાટન માટે મોટી સંખ્યામાં લોકોને આમંત્રિત કરી શકે
મહારાષ્ટ્રના પૂર્વ મુખ્યમંત્રી ઉદ્ધવ ઠાકરેએ અયોધ્યા રામ મંદિરના ઉદ્ઘાટનને લઈને આ નિવેદન રવિવારે મુંબઈથી 400 કિમી દૂર જલગાંવમાં એક કાર્યક્રમને સંબોધતા કહ્યું હતું કે 'એવી સંભાવના છે કે સરકાર રામ મંદિરના ઉદ્ઘાટન માટે અહીંથી મોટી સંખ્યામાં લોકોને બસો અને ટ્રકોમાં આમંત્રિત કરી શકે છે અને તેમની પરત યાત્રામાં ગોધરા જેવી ઘટના બની શકે છે. '
નોંધનીય છે કે 27 ફેબ્રુઆરી, 2002ના રોજ અયોધ્યાથી સાબરમતી એક્સપ્રેસ દ્વારા પરત ફરી રહેલા 'કારસેવકો' (રામ મંદિર આંદોલનમાં ભાગ લેનારા સ્વયંસેવકો માટે સંઘ પરિવારનો શબ્દ) પર ગુજરાતના ગોધરા સ્ટેશન પર હુમલો કરવામાં આવ્યો હતો અને તેમની ટ્રેનના કોચને આગ ચાંપી દેવામાં આવી હતી. જેના કારણે ઘણા લોકો મૃત્યુ પામ્યા હતા. એ બાદ રાજ્યભરમાં મોટા પાયે રમખાણો ફાટી નીકળ્યા હતા.
