જળાશયો છલકાયા / ગુજરાતમાં ભારે વરસાદથી ડેમોમાં આવ્યા નવા નીર, આ ગામોને સાવચેત રહેવા સૂચના

રાજ્યમાં અવિરત કમોસમી વરસાદના પગલે ભાવનગર, અમરેલી, તાપી અને ઉકાઈ વિસ્તારમાં આવેલા વિવિધ ડેમોમાં પાણીની આવક વધી છે. વધતા જળસ્તરને ધ્યાનમાં રાખીને તંત્રએ લોકો માટે એલર્ટ જાહેર કર્યુ છે અને નીચાણવાળા વિસ્તારોમાં સાવચેત રહેવાની અપીલ કરી છે.

શેત્રુંજી ડેમ (ભાવનગર)

ઉપરવાસમાંથી સતત પાણીની આવકને કારણે ભાવનગરનો શેત્રુંજી ડેમ આઠમી વખત ઓવરફ્લો થયો છે. ડેમના 20 દરવાજા એક ફૂટ સુધી ખોલાયા છે, અને હાલમાં ડેમમાં 1800 ક્યુસેક પાણીની આવક ચાલુ છે. ભાવનગરનું તંત્ર સંભવિત તમામ પરિસ્થિતિનો સામનો કરવા એલર્ટ પર છે અને નીચાણવાળા વિસ્તારોમાં રહેતા લોકોને સાવચેતી રાખવા સૂચના આપી છે.

ધાતરવડી ડેમ-2 (અમરેલી)

અમરેલીમાં મોડી રાતથી અવિરત વરસાદ વરસતા ધાતરવડી ડેમ-2ના 19 દરવાજા ખોલવામાં આવ્યા છે. રાજુલા વિસ્તારમાં છેલ્લા 24 કલાકમાં સૌથી વધુ 9 ઈંચ વરસાદ નોંધાયો છે. ડેમની સ્થિતિને ધ્યાનમાં રાખીને નીચાણવાળા વિસ્તારોને સતર્ક રહેવા સૂચના અપાઈ છે. ભારે વરસાદના કારણે ખેડૂતોને મોટી નુકસાની થઈ છે.

શેલ દેદુમલ ડેમ (અમરેલી, સાવરકુંડલા)

અવિરત કમોસમી વરસાદને પગલે શેલ દેદુમલ ડેમ છલકાયો છે. ડેમમાંથી એક દરવાજો ખોલીને પાણીની જાવક શરૂ કરવામાં આવી છે. નેસડી, કરજાળા સહિતના નીચાણવાળા ગામોમાં એલર્ટ જાહેર કરાયું છે.

ઉકાઈ ડેમ (નર્મદા)

ઉકાઈ ડેમમાં પાણીની આવક વધતા ડેમના ત્રણ દરવાજા ખોલી તાપી નદીમાં પાણી છોડવામાં આવ્યું છે. ડેમની સપાટી 345.02 ફૂટ પર પહોંચી છે. હાલ ડેમમાં 46,418 ક્યુસેક પાણીની આવક છે. તાપી નદીના કાંઠાના ગામોને સાવચેતી માટે એલર્ટ આપવામાં આવ્યું છે.

આ પણ વાંચોઃ અરબ સાગરમાં ડિપ્રેશન સક્રિય, આજે આ જિલ્લાઓમાં વરસાદ વારો

ડોસવાડા ડેમ (તાપી, સોનગઢ)

કમોસમી વરસાદના કારણે ડોસવાડા ડેમ ફરી ઓવરફ્લો થયો છે. મીંઢોળા નદીમાં પાણીની આવક વધી છે. ડેમની નીચે આવેલા 10 થી વધુ ગામોને એલર્ટ જાહેર કરવામાં આવ્યા છે. ખેડૂતોને નદી કિનારે ન જવા અને સાવચેત રહેવા અપીલ કરવામાં આવી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ