આગાહી / ચેતવણીઃ આગામી ત્રણ દિવસ દરમિયાન દક્ષિણ ભારતમાં ‘બારે મેઘ ખાંગા’ થશે, ગુજરાતના ત્રણ જિલ્લામાં રેડ એલર્ટ

• કેરળથી દિલ્હી સુધી ભારે વરસાદી રેલમછેલ
• ગુજરાતના ત્રણ જિલ્લામાં વરસાદને પગલે રેડ એલર્ટ
• ત્રણ દિવસ દરમિયાન દક્ષિણ ભારતમાં ‘બારે મેઘ ખાંગા’ થશે

હવામાન વિભાગે કેરળના ૧૨ જિલ્લા માટે 'ઓરેન્જ' એલર્ટ અને એક કોલ્લમ માટે 'યલો' એલર્ટ જાહેર કર્યું છે. કર્ણાટકના છ જિલ્લા બેલગામ, ઉત્તર કન્નડ, બેલ્લારી, શિમોગા, ચિકમંગલુર અને દક્ષિણ કન્નડ માટે 'ઓરેન્જ' એલર્ટની જાહેર કરી છે. તો પશ્ચિમ વિસ્તારમાં હવામાન વિભાગે આગામી પાંચ દિવસ દરમિયાન ગોવા અને મધ્ય મહારાષ્ટ્રના દરિયાકાંઠાના વિસ્તારમાં અને ૬ અને ૭ જુલાઈએ ગુજરાતમાં ભારેથી અતિ ભારે વરસાદની આગાહી કરી છે. હવામાન વિભાગના જણાવ્યા અનુસાર દક્ષિણ ભારતનાં રાજ્યમાં અત્યંત ભારે વરસાદની એક સિસ્ટમ સક્રિય થઈ શકે છે. આ સિવાય દેશના ઘણા ભાગમાં વરસાદી વાતાવરણ રહ્યું છે. દેશના લગભગ ૨૪ રાજ્ય હાલ ચોમાસાની પકડ છે. આમાંનાં કેટલાંક રાજ્યમાં સતત વરસાદ થઈ રહ્યો છે અને કેટલાંક રાજ્યમાં વરસાદની સંભાવના વ્યક્ત કરવામાં આવી છે.

ઉત્તરાખંડમાં આગામી પાંચ દિવસ વરસાદ રહેશે
ખરાબ હવામાનના પગલે દિલ્હી એરપોર્ટથી ચાર ફ્લાઇટ ડાઇવર્ટ કરવામાં આવી હતી. ત્રણ ફ્લાઇટને અમૃતસર અને એક ફ્લાઇટ લખનૌ તરફ ડાઇવર્ટ કરાઈ હતી. વધુમાં બંગાળમાં ભેજવાળાં વાતાવરણથી લોકો ત્રાહિમામ્ છે. બંગાળની ખાડીમાં પૂર્વ તરફથી ભારે પવન ફૂંકાઈ રહ્યો છે. હિમાચલના મનાલીમાં આખું સપ્તાહ વરસાદી માહોલ રહેશે. જેના કારણે તાપમાન ગગડીને ૧૬ ડિગ્રી જઈ શકે છે હિમાચલ અને ઉત્તરાખંડમાં આગામી પાંચ દિવસ વરસાદ રહેશે.

ત્રણ દિવસ દરમિયાન દક્ષિણ ભારતમાં ભારેથી અતિ ભારે વરસાદ
બીજી બાજુ દિલ્હી સહિત દેશના માેટાભાગનાં રાજ્યમાં વરસાદનું એલર્ટ યથાવત્ છે. દક્ષિણ દ્વિપકલ્પ ભારત અને ઉત્તર મહારાષ્ટ્રમાં આવતીકાલ  સુધી અને ગુજરાતમાં ૮ જુલાઈ સુધી વરસાદી  રેલમછેલ  ચાલુ રહેવાની શક્યતા છે. સેન્ટ્રલ વેધર ફોરકાસ્ટિંગ એજન્સીએ મહારાષ્ટ્ર, કેરળ, કર્ણાટક, આંધ્ર પ્રદેશ, ઉત્તર પ્રદેશ અને પશ્ચિમ બંગાળના કેટલાક જિલ્લામાં ૮ જુલાઈ સુધી ભારે વરસાદની ચેતવણી જારી કરી છે. હવામાન વિભાગ અનુસાર  આગામી ત્રણ દિવસ દરમિયાન દક્ષિણ ભારતમાં ભારેથી અતિ ભારે વરસાદ સાથે બારે મેઘ ખાંગા થશે. કોંકણ અને ગોવા અને મધ્ય મહારાષ્ટ્રના દરિયાકાંઠાના વિસ્તારોમાં અને ૭ જુલાઈએ ગુજરાતમાં ભારે વરસાદની શક્યતા છે. ગુજરાત માટે હવામાન વિભાગે ત્રણ જિલ્લા  'રેડ એલર્ટ' અને ચાર જિલ્લા માટે ૭ જુલાઈ માટે 'યલો એલર્ટ' જાહેર કર્યું છે. દિલ્હીમાં આગામી છથી સાત દિવસ આકાશ વાદળછાયું રહી શકે છે અને વચ્ચે વચ્ચે વરસાદ થવાની સંભાવના છે.

ઉત્તર ભારતમાં ભારે વરસાદ
ઉત્તરાખંડમાં આગામી પાંચ દિવસ દરમિયાન ઉત્તરાખંડ અને હિમાચલ પ્રદેશમાં ભારે વરસાદની સંભાવના છે. પૂર્વ ઉત્તર પ્રદેશમાં આજે ૬ જુલાઈ સુધી અને પંજાબ અને હરિયાણામાં ૮ જુલાઈ સુધી ભારે વરસાદની શક્યતા છે. પૂર્વ રાજસ્થાનમાં ૮ જુલાઈ અને પશ્ચિમ રાજસ્થાનમાં ૭ અને ૮ જુલાઈના રોજ ભારે વરસાદની શક્યતા છે.પૂર્વ અને અડીને આવેલા ઉત્તરપૂર્વ ભારતમાં, આગામી પાંચ દિવસ દરમિયાન ઉપ-હિમાલયન પશ્ચિમ બંગાળ, સિક્કિમ અને ઓડિશામાં 'એકદમ વ્યાપક'થી 'અલગ ભારે' વરસાદની સંભાવના છે. આસામ, મેઘાલય, અરુણાચલ પ્રદેશ, નાગાલેન્ડ અને મણિપુરમાં પણ આગામી ત્રણ દિવસ દરમિયાન ભારે વરસાદની શક્યતા છે.

કાશ્મીરમાં તાપમાન અચાનક વધી ગયું
કાશ્મીર ખીણમાં હવામાનમાં અનિશ્ચિતતા જોવા મળી રહી છે. લાંબા સમયગાળા બાદ હવે અચાનક કાશ્મીરનું તાપમાન વધી ગયું છે. જેના કારણે પર્યટકો અને સ્થાનિકોને પરેશાની થઇ રહી છે. ચોમાસાના આ મહિનામાં કાશ્મીરનું તાપમાન ૩૧ ડિગ્રી પહોંચી ગયું છે. જે વધીને ૩૫ ડિગ્રી થવાની સંભાવના છે. આઠ જુલાઈ સુધી કાશ્મીરમાં આવું જ વાતાવરણ રહેશે. બીજી તરફ એક દિવસની રાહત બાદ મુંબઈમાં ફરી વરસાદ શરૂ થયો છે.  આગામી ત્રણ દિવસ મુંબઈ માટે યલો એલર્ટ જાહેર કરાયું છે. નબળા ચોમાસાના કારણે ઓડિશામાં વરસાદનું પ્રમાણ ઘટ્યું છે. ઓડિશાના કેટલાક જિલ્લામાં આગામી પાંચ દિવસ માટે યલો એલર્ટ જાહેર કરાયું છે.

ઉત્તરાખંડમાં હજુ વરસાદ વિરામ લેશે નહીં
ઉત્તરાખંડમાં છેલ્લા એક સપ્તાહથી વરસાદે વિરામ લીધો નથી. હજુ પણ આગામી ચાર દિવસ આ સિલસિલો ચાલુ રહેશે. આજે ઉત્તરાખંડના    દહેરાદૂનમાં વાદળછાયું વાતાવરણ રહેશે, જયારે કેટલાંક સ્થળોએ ગર્જના સાથે ભારે વરસાદ થવાની હવામાન વિભાગે આગાહી કરી છે. ઉત્તરાખંડમાં તાપમાન ગગડીને ૨૫ ડિગ્રી પહોંચ્યું છે. હજુ આગામી બે દિવસ  ઉત્તરાખંડમાં ભારે વરસાદ થવાની શક્યતા છે. બીજી તરફ આસામ મેઘાલય અરુણાચલ પ્રદેશ નાગાલેન્ડ અને મણિપુરમાં આગામી ત્રણ દિવસ ભારે વરસાદ થવાની શક્યતા છે.